နေပြည်တော်အခြေစိုက် အမှတ် ၉၄၈ ဆောက်လုပ်ရေးတပ်ခွဲက တပ်ကြပ်ကြီး ၁ ဦးဟာ အာဏာဖီဆန် CDM ပါဝင်လာပြီး ပြည်သူ့တော်လှန်ရေးတပ်ဖွဲ့ (PRA)နဲ့  လာရောက်ပူးပေါင်း ခဲ့တယ်လို့ သိရပါတယ်။

ပြည်သူ့ကာကွယ်ရေးတပ်ဖွဲ့ (PRA) ထံကို လာရောက်ပူးပေါင်းလာသူဟာ နေပြည်တော်၊ အမှတ် ၉၄၈ ဆောက်လုပ်ရေးအင်ဂျင်နီယာတပ်ခွဲက အသက် ၂၉ နှစ်ရှိတဲ့ ကိုယ်ပိုင်အမှတ် - တ/၄၆၆၇၉၃၊ တပ်ကြပ်ကြီး ကျော်ရဲနိုင်ဖြစ်တယ်လို့ ပြည်သူ့တော်လှန်ရေးတပ်ဖွဲ့ PRA တာဝန်ခံက ပြောပါတယ်။

တပ်ကြပ်ကြီး ကျော်ရဲနိုင်ဟာ ၂၀၁၂ ခုနှစ်မှာ ဖောင်ကြီး၊ အမှတ် ၁ စစ်အခြေခံလေ့ကျင့်ရေးတပ်ကနေ တပ်မတော်သို့ စတင်ဝင်ရောက်လာပြီး စစ်လုပ်သက် ၉ နှစ် ရှိချိန်မှာ စစ်ကောင်စီတပ်ကို စွန့်ခွာပြီး CDM ပြုလုပ်ကာ ပြည်သူ့ရင်ခွင်ကို ခိုလှုံလာတာလို့ သိရပါတယ်။

ပြီးခဲ့တဲ့ရက်ပိုင်းကလည်း ချင်းပြည်နယ် မတူပီအခြေစိုက် ခမရ ၁၄၀ တပ်ရင်းက ပေါက်မြို့နယ်၊ သက္ကယ်ကျင်းရွာမှာ တပ်စွဲထားတဲ့ စစ်ကောင်စီတပ်က  တပ်သား ၅ ယောက်ဟာ မကွေးတိုင်း၊ ပေါက်တောင်ပိုင်းပြောက်ကျားတပ်ဖွဲ့ကို လာရောက်ပူးပေါင်းခဲ့ပါတယ်။

ပြည်သူရင်ခွင်ကိုခိုလှုံမယ့် စစ်သားတွေနဲ့ ရဲတပ်ဖွဲ့ဝင်တွေကို နွေးထွေးစွာကြိုဆိုပြီးတော့ လက်နက်အပြည့်စုံနဲ့ အလင်းဝင်လာသူတွေကိုလည်း ထိုက်သင့်တဲ့ဆုကြေငွေချီးမြှင့်ကာ လွတ်မြောက်နယ်မြေတွေကို ပို့ဆောင်ပေးသွားမယ်လို့ ဒေသခံပြည်သူ့ကာကွယ်ရေးတပ်ဖွဲ့ တွေဆီကသိရပါတယ်။