ဟေတီတွင် လောင်စာဆီယာဉ် ပေါက်ကွဲမှုကြောင့် လူ ၅၀ ထက်မနည်း သေဆုံး
ဟေတီနိုင်ငံရဲ့ ဒုတိယအကြီးဆုံးမြို့ဖြစ်တဲ့ ကပ်ဟေတီအန်မြို့မှာ လောင်စာဆီတင်ယာဉ်တစီး ဒီဇင်ဘာ ၁၃ ရက် ညက ပေါက်ကွဲတာကြောင့် သေဆုံးသူ ဦးရေ ၅၀ ထက်မနည်း ရှိပြီလို့ မြို့တော်ဝန်က ဒီဇင်ဘာ ၁၄ ရက်မှာ ပြောလိုက်ပါတယ်။
ဒဏ်ရာရသူ အများအပြားကို ဒေသန္တရဆေးရုံမှာ တင်ပို့ကုသနေရပြီး လူသားရင်းမြစ်ရော ဆေးဝါး ပံ့ပိုးမှုပါ လိုအပ်နေတယ်လို့လည်း သူက ပြောပါတယ်။
မီးကို ထိန်းချုပ်ပြီး အသေအပျောက် မများအောင် ဟန့်တားရာမှာ အသက်ကို ရင်းခဲ့တဲ့အတွက် မီးသတ်သမားတွေနဲ့ အရပ်ဘက်ကာကွယ်ရေးအဖွဲ့ကို ဂုဏ်ပြုချီးကျူးချင်တယ်လို့လည်း မြို့တော်ဝန်က ပြောပါတယ်။
ဒီဖြစ်ရပ်ကြောင့် ကယ်ရစ်ဘီယံ ကမ်းခြေဒေသနိုင်ငံ ဟေတီမှာ ၃ ရက်ကြာ ဝမ်းနည်းခြင်းကာလ သတ်မှတ်ထားမယ်လို့လည်း ဝန်ကြီးချုပ် အေရီယယ်ဟင်နရီက ပြောပါတယ်။
ဓာတ်ဆီတွေ တင်လာတဲ့ ကုန်ကားဟာ ညသန်းခေါင်အချိန် မြို့အရှေ့စွန်းက စာမာရီဒေသမှာ တိမ်းမှောက်ခဲ့တာလို့ ဒေသခံမီဒီယာက ပြောပါတယ်။
ဝန်ကြီးချုပ် ရာထူးက နုတ်ထွက်ဖို့ တောင်းဆိုတဲ့ ဂိုဏ်းတွေက လောင်စာတင်ပို့ဖြန့်ဖြူးတဲ့ ပံ့ပိုးမှု တွေကို အချိန်တလကြာ ပိတ်ဆို့ထားခဲ့လို့ ဟေတီနိုင်ငံဟာ ဒီနှစ်ထဲမှာ ဆိုးရွားတဲ့ လောင်စာဖြန့်ဖြူးရေးပြဿနာကို ရင်ဆိုင်နေရပါတယ်။
