ဆူဒန်နိုင်ငံ မြို့တော် အွန်ဒါမန်နဲ့ တခြားမြို့ကြီးတွေမှာ စစ်တပ် ဆန့်ကျင်ရေးလုပ်ခဲ့တဲ့ အမျိုးသမီး ၁၃ ယောက် အဓမ္မပြုကျင့်ခံရတာကြောင့်  အမျိုးသမီးတွေ ရာထောင်ချီ ဆန္ဒပြခဲ့ပါတယ်။

ဒီဇင်ဘာ ၁၉ ရက်က စစ်တပ်ရဲ့ အာဏာထိန်းချုပ်ထားမှုကို တနိုင်ငံလုံး ဆန္ဒပြကြရာမှာ၊ အမျိုးသမီး ၁၃ ဦးကို လုံခြုံရေးတွေက အုပ်စုဖွဲ့ အဓမ္မပြုကျင့်ခဲ့တယ်လို့ ကုလသမဂ္ဂ လူ့အခွင့်အရေးရုံးက စွပ်စွဲခဲ့ပါတယ်။

နိုင်ငံရေးပါတီတွေ ကျောထောက်နောက်ခံပြုထားတဲ့ အမျိုးသမီးအုပ်စုတွေဟာ အွန်ဒါမန်၊ ခါတွမ်၊ ဘာရီ၊ ကာစလာ စတဲ့မြို့ကြီးတွေမှာ ချီတက်ဆန္ဒပြခဲ့ကြပြီး ဒရမ်တွေတီး၊ အမျိုးသမီးအခွင့်အရေး သီချင်းတွေ သီဆိုကြပါတယ်။

အမျိုးသမီးရေးလှုပ်ရှားသူ အမီယာဂိုမာက “ဘယ်လောက်ပဲ စော်ကားစမ်းပါစေ၊ ကျမတို့ စိတ်ဓာတ်တွေ ရိုက်ချိုးခံမှာမဟုတ်ဘူးဆိုတာ ဒီဆန္ဒပြပွဲက သက်သေပါပဲ။ အမျိုးသမီးတွေကို အဓမ္မပြုကျင့်သူတွေဟာ ပြစ်ဒဏ်ကျခံရမယ့် ဝံပုလွေတွေပါ” လို့ ပြောပါတယ်။

အွန်ဒါမန်မြို့က အမျိုးသမီးရေးတက်ကြွလှုပ်ရှားသူ ဝါလာ အက်ဒလာဇစ် ကလည်း “လမ်းပေါ်ထွက် ဆန္ဒမပြရဲအောင် သူတို့က အဓမ္မပြုကျင့်ပြီး ကျမတို့ ကြောက်အောင် လုပ်တယ်၊ ဒါပေမဲ့ ကျွန်မတို့ မကြောက်ဘူး၊ ဆက်ခုခံသွားမယ်” လို့ ပြောပါတယ်။

အမေရိကန်၊ အင်္ဂလန်နဲ့ ဥရောပသမဂ္ဂတို့က ကျူးလွန်သူ မည်သူမဆို တာဝန်ခံရမယ်လို့ ကြေညာချက် ထုတ်ပြန်ခဲ့ပါတယ်။ ဆူဒန်စစ်တပ်နဲ့ ရဲတွေကတော့ ရေငုံနှုတ်ပိတ်နေပါတယ်။