ကမ္ဘောဒီးယား နှစ်ရှည်အာဏာရပါတီက ဝန်ကြီးချုပ်ဟွန်ဆန်ရဲ့သားကို အနာဂတ် ဝန်ကြီးချုပ်လောင်းအဖြစ် ပါတီတွင်း မဲပေးရွေးချယ်ခဲ့ပါတယ်။ 

ဒါပေမဲ့ ၃၆ နှစ်ကြာ အာဏာရယူထားတဲ့ သူ့ဖခင်က ဘယ်တော့ အာဏာလွှဲပေးမလဲဆိုတာ အတည်မပြုနိုင်သေးပါဘူး။

ကမ္ဘောဒီးယားပြည်သူ့ပါတီ (CPP) ရဲ့ ကြေညာချက်မှာ အသက် ၄၄ နှစ်ရှိ ဟွန်မာနက်ကို အနာဂတ် ဝန်ကြီးချုပ်လောင်းအဖြစ် ပါတီဗဟိုကော်မတီက တညီတညွတ်တည်း ထောက်ခံခဲ့တယ်လို့ ဖော်ပြပါတယ်။

ဝန်ကြီးချုပ်ဟွန်ဆန်က လာမယ့် ၂၀၂၃ ခုနှစ် ရွေးကောက်ပွဲ ဝင်ပြိုင်ဦးမလားဆိုတာ ရှင်းရှင်းလင်းလင်း မရှိသေးပါဘူး။ ဘယ်တော့အနားယူမယ်ဆိုတာ ပြောဆိုမှုမရှိပေမဲ့ သူ့နေရာကို သူ့သား ဆက်ခံမှာ ထောက်ခံတယ်လို့ အစောပိုင်းက ပြောထားပါတယ်။

သားဖြစ်သူ ဟွန်မာနက်ဟာ ကမ္ဘောဒီးယားဘုရင့်တပ်မတော်ရဲ့ ဒုစစ်ဦးစီးချုပ်ဖြစ်ပြီး ၁၉၉၉ မှာ အမေရိကန် စစ်တက္ကသိုလ် West Point ကနေ ဘွဲ့ရရှိခဲ့သူပါ။