ချဲလ်ဆီးအသင်းဟာ အသင်းပိုင်ရှင် အေဗရာမိုဗစ်ကို ပေးချေရမယ့်အကြွေးက ပေါင် ၁ ဒသမ ၅ ဘီလီယံ ကျော်ရှိလာခဲ့တယ်လို့ သိရပါတယ်။ 

ဗြိတိန်သတင်းစာThe Times ရဲ့အဆိုအရ အသင်းပိုင်ရှင် အေဗရာမိုဗစ်ဟာ ပြီးခဲ့တဲ့ရာသီက ပေါင် ၁၉ ဒသမ ၉ သန်းထုတ်ချေးခဲ့ပြီး အကြွေးစုစုပေါင်း ပေါင် ၁ ဒသမ ၅၁၄ ဘီလီယံရှိ သွားပြီဖြစ် တယ်လို့ဆိုပါတယ်။ 

အသင်းပိုင်မိခင်ကုမ္ပဏီ Fordstam ရဲ့ နှစ်စဉ်စာရင်းတစ်ခုမှာ မနှစ်က ပေါင် ၁၉ ဒသမ ၉သန်း ထုတ်ချေးခဲ့ကြောင်း ဖော်ပြထားတယ်လို့ သိရပါတယ်။ 

ချဲလ်ဆီးဟာ မနှစ်က ဥရာပချန်ပီယံလိဂ်ဖလားရယူနိုင်ခဲ့တာကြောင့် ကစားသမားတွေအပေါ်မှာ လုပ်ခနဲ့ ဆုကြေးတွေ ပိုပေးခဲ့ရပြီး ၁၇ ဒသမ ၅ ရာခိုင်နှုန်းမြင့်တက်လာခဲ့ပါတယ်။ 

တစ်နှစ်စာ လုပ်ခပေးချေမှု စုစုပေါင်း ပေါင် ၃၃၃ သန်းရှိပြီး ပရီးမီးယားလိဂ်မှာ မန်စီးတီးအသင်းပြီးရင် လုပ်ခအများဆုံး ပေးချေရတဲ့အသင်းဖြစ်လာခဲ့ပါတယ်။ 

မန်စီးတီးရဲ့ တစ်နှစ်စာအတွက် လုပ်ခပေးချေရမှုစုစုပေါင်းက ပေါင် ၃၅၁ သန်းရှိပြီး ချဲလ်ဆီးက ပေါင် ၃၃၃ သန်း၊ လီဗာပူးက ပေါင် ၃၂၆ သန်း၊ မန်ယူက ပေါင် ၃၂၂ ဒသမ ၆ သန်းရှိတယ်လို့ ဆိုပါတယ်။