လက်ဘနွန်၌ ကျန်းမာရေးစနစ် ပြိုလဲစပြု
စီးပွားရေးအကျပ်အတည်းကြုံတွေ့နေရတဲ့ လက်ဘနွန်နိုင်ငံမှာ အစိုးရဆေးရုံတွေက ဆရာဝန်နဲ့ သူနာပြုတွေ ထောင်နဲ့ချီ အလုပ်ထွက်သွားတာကြောင့် ကျန်းမာရေးစနစ် ပြိုလဲကျဆင်းနေပါတယ်။
ပြင်ပပုဂ္ဂလိကလုပ်ငန်းပေါင်းစုံကို ပြောင်းသွားတဲ့ ကျန်းမာရေးဝန်ထမ်းတွေကြောင့် အစိုးရဆေးရုံ တွေ ပိတ်ပစ်ရမယ့်အနေအထား ရင်ဆိုင်နေရတာပါ။
ကျန်းမာရေးဝန်ကြီး Firass Abiad က “ဒီပြဿနာကို မဖြေရှင်းဘူးဆိုရင် အကျပ်အတည်းက ပိုကြီးလာပြီး ကျန်းမာရေးစနစ်တခုလုံး ပြိုလဲကျမှု ကြုံတွေ့ရတော့မယ်” လို့ ရိုက်တာ သတင်းဌာနကို ပြောခဲ့ပါတယ်။
လက်ဘနွန်စီးပွားရေးက ၂၀၁၉ ကတည်းက ပြိုလဲနေပြီး ငွေကြေးတန်ဖိုး ၉၀ ရာခိုင်နှုန်း ကျဆင်းနေတာပါ။
တနိုင်ငံလုံး ဆင်းရဲမွဲတေမှု မြင့်မားလာပြီး၊ ကျန်းမာရေးကျွမ်းကျင်ဝန်ထမ်းတွေ နိုင်ငံခြားထွက်ကုန်ပါတယ်။
အခုအကျပ်အတည်းမတိုင်ခင် လူထုက ကျန်းမာရေးကုသမှု ၈၀ ရာခိုင်နှုန်းကို ပုဂ္ဂလိက ဆေးရုံတွေကိုပဲ မှီခိုအားထားခဲ့တာပါ။
အခု လူအများစုက ပြင်ပဆေးခန်းတွေ မကပ်နိုင်တော့သလို အစိုးရဆေးရုံတွေကလည်း လူဦးရေ ၇ သန်းအတွက် ဘတ်ဂျက် ဒေါ်လာ သန်း ၂၀ ပဲ ရှိတာကြောင့် ကျန်းမာရေးဝန်ထမ်း၊ ဆေးဝါးနဲ့ ဆေးဘက်ဆိုင်ရာ အထောက်အကူပစ္စည်းတွေအတွက် အခက်အခဲကြုံတွေ့နေရတာပါ။
