ကမ္ဘာ့နိုင်ငံများ၏ ရာသီဥတုပြောင်းလဲမှုပန်းတိုင် လမ်းကြောင်းမှန်ပေါ်မရှိဟု ဂျွန်ကယ်ရီ ပြော
ရာသီဥတုပြောင်းလဲမှုရဲ့ ဆိုးရွားတဲ့အကျိုးဆက်တွေကို ရှောင်ရှားဖို့ ကမ္ဘာ့နိုင်ငံတွေရဲ့ ဆောင်ရွက်မှုနဲ့ ဦးတည်ချက်ပန်းတိုင်တွေဟာ မှန်ကန်တဲ့လမ်းကြောင်းပေါ်မှာ ရှိမနေဘူးလို့ အမေရိကန် ရာသီဥတုပြောင်းလဲမှုဆိုင်ရာ အထူးသံတမန် ဂျွန်ကယ်ရီက ပြောပါတယ်။
ကာဘွန်စစ်ထုတ်တဲ့ နည်းပညာမပါဘဲနဲ့ ကျောက်မီးသွေးစက်ရုံသစ်တွေ ကမ္ဘာအနှံ့မှာ မကြာခင်က တည်ဆောက်လာနေတာ စိုးရိမ်ဖွယ်ကောင်းတယ်လို့ ဆိုပါတယ်။
အီဂျစ်မှာ ကျင်းပမယ့် ကုလသမဂ္ဂ ရာသီဥတု ထိပ်သီးအစည်းအဝေးပွဲအကြို၊ UN COP27 အွန်လိုင်းစည်းအဝေးမှာ ဂျွန်ကယ်ရီက “ကျွန်ုပ်တို့ ဒုက္ခရောက်နေပြီ၊ ဒါကို လူတိုင်း သဘောပေါက်သင့်ပြီ” လို့ ပြောပါတယ်။
အစည်းအဝေးကို တက်ရောက်တဲ့ အီဂျစ်နိုင်ငံခြားရေးဝန်ကြီးက လာမယ့် ကုလသမဂ္ဂ ရာသီဥတု ထိပ်သီးညီလာခံကို အီဂျစ်က အိမ်ရှင်ဆောင်ရွက်ရတဲ့ အကြောင်းတခုက ရာသီဥတု ပြောင်းလဲမှုရဲ့ အကျိုးသက်ရောက်မှုတွေ အများကြီးခံစားနေရတဲ့ အာဖရိကနိုင်ငံတွေရဲ့အသံကို တကမ္ဘာလုံး အာရုံစိုက်စေချင်တာကြောင့်လို့ ပြောပါတယ်။
