မြန်မာနိုင်ငံမှာ မတရားအာဏာသိမ်းကာလ ၁ နှစ်ကျော်အကြာ စစ်ကောင်စီတပ်တွေရဲ့ အကြမ်းဖက်ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၅၅၇ ယောက်နဲ့ ဖမ်းဆီး ထိန်းသိမ်းခံရသူပေါင်း ၁၂၁၇၃ ယောက်ထိ ရှိလာခဲ့ပြီလို့ နိုင်ငံရေးအကျဉ်းသားများ ကူညီ စောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ ဖေဖော်ဝါရီ ၁၆ ရက် အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ်ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ဒီနေ့အထိ ၉၁၆၀ ယောက် လက်ရှိချုပ်နှောင်ခံထား ရဆဲဖြစ်ပြီး အဲဒီထဲက ၇၁၁ ယောက်ကတော့ ထောင်ဒဏ်ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၄၅ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

ဖမ်းဝရမ်းထုတ်ခံထားရတာကြောင့် တိမ်းရှောင်နေသူ ၁၉၇၄ ယောက်ထဲက မျက်ကွယ် သေဒဏ်ချမှတ်ခြင်းခံထားရသူ ၃၉ ယောက်အပါအဝင် ၁၁၈ ယောက်ကတော့ မျက်ကွယ် ပြစ်ဒဏ်ချခံထားရပြီး သေဒဏ်ချမှတ်ခံထားရသူ စုစုပေါင်း ၈၄ ယောက် ရှိပြီဖြစ်ပါတယ်။

ကချင်ပြည်နယ်၊ ပူတာအိုမြို့နယ်၊ ဖတ်မာကျေးရွာက ဇနီးမောင်နှံတွေဖြစ်တဲ့ အားခီဇီပါနဲ့ လီဂျာဒွေတို့ဟာ ဖေဖော်ဝါရီ ၁၅ ရက်ညအချိန်က ဖြစ်ပွားခဲ့တဲ့ တိုက်ပွဲကြောင့် ဆိုင်ကယ်နဲ့ ထွက်ပြေး‌နေချိန် စစ်ကောင်စီတပ်က ပစ်သတ်ခဲ့ကြောင်း သိရှိရပါတယ်။ အားခီဇီပါမှာ ရင် ဘတ်ကို ကျည် ၂ ချက်၊ လီဂျာဒွေမှာ ရင်ဘတ်ကို ကျည် ၁ ချက် ထိမှန်ကာ ကျဆုံးသွားခဲ့ကြတာ ဖြစ်ပါတယ်။

ဒါ့အပြင် ဖေဖော်ဝါရီ ၁၁ ရက်ည ၁၁ နာရီလောက်က ကချင်ပြည်နယ် မြစ်ကြီးနားမြို့၊ စီတာပူရပ်ကွက်မှာ ကားနဲ့ဖြတ်လာတဲ့ လူငယ် ၇ ယောက်လောက်ကို စစ်ကောင်စီတပ်ဖွဲ့တွေ ပစ်ခတ်ခဲ့တဲ့အတွက် အသက် ၂၃ နှစ်အရွယ် မတိန်ရောင်ကိုင်ရာမှာ ကျည်ထိမှန်ကာ ကျဆုံးသွားခဲ့ပြီး အမျိုးသမီး နောက်တယောက်မှာ ပေါင်ကို ကျည်ထိမှန်ခဲ့ကြောင်း သိရှိရပါတယ်။ ဒါ့အပြင် ကျန်လူငယ်တွေကိုလည်း ဖမ်းဆီးခဲ့ပြီး သူတို့ရဲ့ ကားကို ရပ်တန့်ခိုင်းရာ ရပ်တန့်ခြင်းမရှိဘဲ ကားမောင်းသွားတဲ့အတွက် ပစ်ခတ်ခဲ့တာဖြစ်တယ်လို့ သိရှိရပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော် လှန်ရေးကာလအတွင်း ကျဆုံးသွားသူတွေရဲ့ အချက်အလက်တွေကိုသိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီးအချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။