ထိုင်ဝမ်နဲ့ ရှင်ကျန်းပြည်နယ်တွေနဲ့ ပတ်သက်ပြီး  ပေကျင်းအိုလံပစ်ပွဲတော်တာဝန်ရှိ   အရာရှိ တယောက်ကထုတ်ဖော်ပြောကြားလိုက်ပြီး တရုတ်တနိုင်ငံတည်း ရှိတယ်လို့   ဖေဖော်ဝါရီ ၁၇ ရက်က ပြောလိုက်ပါတယ်။

နိုင်ငံတကာ အိုလံပစ်ကော်မတီ  (IOC) ရဲ့ ပြောခွင့်ရ မာ့ခ်အဒမ်စ်က အိုလံပစ်ပွဲတော်ပိတ်ပွဲမှာ ထိုင်ဝမ် တက်ရောက်မယ့်ကိစ္စနဲ့ ပတ်သက်ပြီး သတင်းစာရှင်းလင်းပွဲမှာ မေးမြန်းရာမှာ ပေကျင်း အိုလံပစ်ပွဲတော်ဆိုင်ရာ ပြောခွင့်ရ ယန်ကျားရုံက တရုတ်တနိုင်ငံတည်း ရှိတယ်လို့ ပြောခဲ့တာပါ။

ဒီမိုကရေစီနည်းကျ အုပ်ချုပ်နေတဲ့ ထိုင်ဝမ်အပေါ် တရုတ်ရဲ့ ရပ်တည်ချက်ကို သူက ထပ်လောင်း အတည်ပြုလိုက်တာလည်း ဖြစ်ပါတယ်။ 

တရုတ်ဟာ ထိုင်ဝမ်ကို သူ့ရဲ့ သင်းကွဲပြည်နယ်အဖြစ် သတ်မှတ်ထားပြီး လိုအပ်ရင် စစ်အင်အားသုံးရင်း သူ့လက်အောက် ပြန်ရောက်အောင် လုပ်မယ်လို့ ပြောဖူးပါတယ်။

အားကစားပွဲတော်အတွင်း ဝတ်စုံတွေမှာ ရှင်ကျန်းပြည်နယ်ထဲက ဝီဂါ တိုင်းရင်းသား အဓမ္မ လုပ်အားပေး ခိုင်းစေခံရတဲ့ ပြည်သူတွေ ထုတ်လုပ်ထားတဲ့ ထုတ်ကုန်တွေ မပါဘူးလို့ ယုံကြည်ချက် ရှိသလားလို့ သတင်းထောက် တယောက်က အဲဒီ သတင်းစာ ရှင်းလင်းပွဲမှာ မေးခဲ့ပါတယ်။

ရှင်းကျန်းက အဓမ္မလုပ်အားပေးခိုင်းစေမှုဆိုတာ အုပ်စုတွေက တမင်သက်သက် ပြောနေတဲ့ အလိမ်အညာတွေလို့ ယန်ကျားရုံက ပြောပါတယ်။

ရှင်ကျန်းက ကုန်စည်တွေကို အရင်းအမြစ်အဖြစ် သုံးနေတဲ့ တချို့ အထည်အလိပ် ကုမ္ပဏီတွေက ရှင်းကျန်းပြည်နယ်ထဲက ဝီဂါတိုင်းရင်းသားတွေကို ညှဉ်းပန်း နှိပ်စက်မှုတွေကို လျစ်လျူရှုနေ တယ်လို့ လူ့အခွင့်အရေးအုပ်စုတွေက စွပ်စွဲ ထားပါတယ်။

ပေကျင်း ဆောင်းရာသီအိုလံပစ်ပွဲတော်ကို အမေရိကန် ဗြိတိန်နဲ့ တခြား အနောက်နိုင်ငံတွေက တရုတ်ရဲ့ လူ့အခွင့်အရေး စံချိန်တွေကြောင့် သံတမန်ရေးအရ သပိတ်မှောက်ထားပါတယ်။

နိုင်ငံတကာ အိုလံပစ်ကော်မတီကတော့ အားကစားပွဲတော်ကို နိုင်ငံရေးနဲ့ ခွဲခြားထားဖို့ ကြိုးစား ခဲ့ပါတယ်။