ရန်ကုန်မြို့ အနောက်ပိုင်းခရိုင် ကျောက်တံတားမြို့နယ် ပန်းဆိုးတန်းလမ်း နဲ့ မဟာဗန္ဓုလလမ်းထောင့်မှာရှိတဲ့ လူဝင်မှုကြီးကြပ်ရေးနဲ့ နိုင်ငံခြားသားရေးရာဌာနရုံးကို ဖေဖော်ဝါရီလ ၂၂ ရက်နေ့က မိုင်းခွဲတိုက်ခိုက်ခဲ့တယ်လို့ မှော်ဘီတော်လှန်ရေးအင်အားစု (Hmawbi Revolution Force ) က ထုတ်ပြန်ကြေညာလိုက်ပါတယ်။ 

နိုင်ငံခြားသားရေးရာဌာနရုံးမှာ လုံခြုံရေးယူထားတဲ့ အာဏာသိမ်းစစ်ကောင်စီတပ်ဖွဲ့ဝင်တွေကို ပစ်မှတ်ထားပြီး နေ့လယ် ၁ နာရီ ၄၅ မိနစ် မှာ တိုက်ခိုက်ခဲ့တာလို့ ဆိုပါတယ်။

Hmawbi Revolution Force နဲ့အတူ People Force, ACPLF, Yangon People's Defense Force (Bahan), DN PDF အဖွဲ့တို့ ပူးပေါင်းကာ အဝေးထိန်းစနစ် မိုင်း ၂ လုံး နဲ့ တိုက်ခိုက်ခဲ့ပြီး စစ်ကောင်စီဘက်က ထိခိုက်ဒဏ်ရာရတဲ့အခြေအနေကိုတော့ အတည်မပြုနိုင်သေးဘူးလို့လည်း ထုတ်ပြန်ချက်မှာ ဖော်ပြထားပါတယ်။ 

ဒီတိုက်ခိုက်မှုနဲ့ ပတ်သက်လို့ DVB က သီးခြား အတည်မပြုနိုင်သေးပါဘူး။