PDF အယောင်ဆောင်ပြီး ဒေသခံတွေကို ဖမ်းဆီးသတ်ဖြတ် ပစ္စည်းလုယက်သူ ၃ ဦးကို MPDF ဂန့်ဂေါ တပ်ဖွဲ့ကနေ စုံစမ်းဖော်ထုတ် ဖမ်းဆီးနိုင်ခဲ့တယ်လို့ သိရပါတယ်။ 

မကွေးတိုင်း ဂန့်ဂေါမြို့နယ် မဲကျေးရွာမှာနေထိုင်တဲ့ လင်မယားနှစ်ယောက်ကို ဖမ်းဆီးပြီး ယောကျ်ားဖြစ်သူကို သတ်ဖြတ်ခဲ့ကာ အမျိုးသမီးဖြစ်သူကို ဖမ်းဆီးသွားပြီးတဲ့နောက် ဖမ်းခံရတဲ့ အမျိုးသမီးက ထွက်ပြေးလွတ်မြောက်သွားပြီး အခုလို ဖော်ထုတ်နိုင်ခဲ့တာပါ။ 

အဲဒီဖြစ်စဉ်နဲ့ပတ်သက်လို့ MPDF ဂန့်ဂေါက စုံစမ်းစစ်ဆေးခဲ့ပြီးတဲ့နောက် ကျူးလွန်သူတွေကို လိုက်လံဖမ်းဆီးခဲ့ရာမှာ နောက်ထပ် ခိုးမှုပေါင်း ၁၂ ခုကို သက်သေခံပစ္စည်းတွေနဲ့အတူ ဖော်ထုတ်ဖမ်းဆီးနိုင်ခဲ့တယ်လို့ သိရပါတယ်။ 

အဆိုပါ ပြစ်မှုကျူးလွန်သူတွေဟာ PDF တွေကို အထင်မြင်လွဲမှားစေဖို့ရည်ရွယ်ပြီး ဂန့်ဂေါမြို့နယ် ကြံသာကျေးရွာက ပျူစောထီး ခေါင်းဆောင်တွေရဲ့ စေခိုင်းချက်အရ လုပ်ခဲ့ရတာလို့ ဝန်ခံထွက်ဆိုခဲ့ပါတယ်။

အခုဖြစ်စဉ်နဲ့ပတ်သက်လို့ MPDF ဂန့်ဂေါအဖွဲ့က ပြစ်မှုကျူးလွန်သူတွေကို အရေးယူနိုင်ဖို့အတွက် သက်ဆိုင်ရာ အဖွဲ့အစည်းတွေဆီကို လွှဲအပ်ခဲ့တယ်လို့လည်း MPDF ရဲ့ ထုတ်ပြန်ချက်မှာ ရေးသားဖော်ပြထားပါတယ်။