ရုရှားနိုင်ငံခြားရေးဝန်ကြီး ဆာဂေလာဗရော့က ယူကရန်းတပ်တွေ လက်နက်ချရင် ဆွေးနွေးဖို့ အသင့်ပဲလို့  ဖေဖော်ဝါရီ ၂၅ ရက်မနေ့က  သတင်းစာရှင်းလင်းပွဲမှာ ပြောလိုက်ပါတယ်။ 

လာဗရော့က သမ္မတပူတင်အနေနဲ့ နေတိုးအဖွဲ့နဲ့ရော ယူကရိန်းနဲ့ပါ လုံခြုံရေးကိစ္စ ပထမ စကားပြောလိုပြီး ဒုတိယအနေနဲ့ ရုရှားရဲ့ စစ်ရေးထိုးစစ်တွေကို အခြေအနေပေါ်မူတည်ပြီး ရပ်ပေးမယ်လို့ ကမ်းလှမ်းကြောင်း ပြောပါတယ်။

ရုရှားအစိုးရဘက်ကတော့ ဘီလာရုစ်မြို့တော် မင့်စ်မှာ ယူကရိန်းအရာရှိတွေကို တွေ့ဆုံဖို့ ကမ်းလှမ်းထားတာပါ။ ယူကရိန်းကတော့ ပိုလန်နိုင်ငံ ဝါဆောမြို့မှာ တွေ့ဆုံဖို့ ရွေးချယ်ထားတာကြောင့် ညှိနှိုင်းနေဆဲပါ။

အမေရိကန်အစိုးရပြောရေးဆိုခွင့်ရှိသူ နက်ဒ်ပရိုက်စ်ကတော့ ရုရှားတို့ရဲ့ ဆွေးနွေးပွဲ ကမ်းလှမ်းချက်က သေနတ်ထောက်ထားတဲ့ သံတမန်နည်းလမ်းလို့ပြောပြီး ဆွေးနွေးပွဲ အမှန်တကယ် ဖြစ်လိုတယ်ဆိုရင် ပူတင်အနေနဲ့ ယူကရိန်းကို ဗုံးကြဲနေတာတွေ ရပ်ပါလို့ တုံ့ပြန်ပြောဆိုပါတယ်။

ယူကရိန်းနိုင်ငံ ခါဆန်ဒေသကို ရုရှားစစ်ယာဉ်တန်းတွေ မောင်းဝင်လာတာကို လမ်းဘေး စီစီတီဗီတခု  မှတ်တမ်းကနေ တွေ့ရှိရပါတယ်။

ကိယက်ဗ်မြို့ အာဏာပိုင်တွေက ကျူးကျော်ဝင်ရောက်လာတဲ့ ရုရှားတပ်တွေကို ခုခံတိုက်ခိုက်ဖို့ ပြောဆိုနေပေမဲ့ တဘက်မှာ ယူကရိန်းနဲ့ ရုရှားအစိုးရတို့ ဆွေးနွေးမှုတွေ ပြန်စတင်ဖို့ ရှိတယ်လို့ သတင်းတွေ ဖြစ်နေတာပါ။

ယူကရိန်းသမ္မတရဲ့ ပြောရေးဆိုခွင့်ရှိသူ ဆာဂီနီကီဖော်ရိုက ရုရှားတပ်တွေက ဖေဖော်ဝါရီ ၂၄ ရက်ကတည်းက ယူကရိန်း မြောက်ပိုင်း၊ တောင်ပိုင်းနဲ့ အရှေ့ဘက်တို့မှ ခရင်းခွပုံစံ စစ်ကြောင်းချီ  ဝင်လာနေတာပါ။