ရုရှား နိုက်ထ်ဝုဖ်စ် မော်တော်ဆိုင်ကယ်ကလပ်အသင်းက ဆိုင်ကယ်စီးသူ ဒါဇင်ပေါင်းများစွာဟာ ဥရောပနိုင်ငံအများအပြားကနေ ဂျာမနီနိုင်ငံ ဘာလင်မြို့တော်ဆီ မေ ၉ ရက်က ရောက်လာပြီး ဒုတိယကမ္ဘာစစ်ကြီးပြီးဆုံးချိန် နာဇီဂျာမနီကို ဆိုဗီယက်ယူနီယံက အောင်နိုင်မှု အထိမ်းအမှတ်အဖြစ် ပန်းခွေတွေကို ချထားခဲ့ပါတယ်။

ဘာလင်မြို့တော်က ဆိုဗီယက်စစ်ပွဲ အောက်မေ့ဖွယ်အခမ်းအနားမှာ အစွန်းရောက် အမျိုးသားရေးဝါဒီ ရုရှားမော်တော်ဆိုင်ကယ်ကလပ် အဖွဲ့ဝင်တွေနဲ့ ထောက်ခံသူတွေကို စာနာအားပေးသူ ရာပေါင်းများစွာက “ရုရှား၊ ရုရှား!” လို့ ကြွေးကြော်ရင်း ကြိုဆိုခဲ့ကြပါတယ်။

နှစ်ပတ်လည်နေ့ မတိုင်ခင်လေးမှာ ဘာလင်တရားရုံးတရုံးက ရုရှားအလံတွေ ခင်းကျင်းပြသတာကို တားမြစ်ခဲ့တာပါ။

အောက်မေ့ဖွယ် အထိမ်းအမှတ်ဆီကို ဂျာမန်ရဲတွေက မော်တော်ဆိုင်ကယ်သမားတွေကို လူ ၁၀ ယောက်လောက်ကို တအုပ်စုနှုန်းနဲ့ ခေါ်ဆောင်ခဲ့ပါတယ်။

အဲဒီမှာ အနီရောင် ဇော်မွှားပန်းတွေကို ချထားပြီး သီချင်းတွေ သီဆိုကြပါတယ်။ ယူကရိန်းနိုင်ငံတော်အလံတွေကို ခြုံထားတဲ့ ယူကရိန်းပြည်သူတွေကတော့ ရုရှားတွေကို ထရပ္ပတိုပန်းခြံ အထိမ်းအမှတ်နေရာက လှေကားမှာ ပက်ပင်းတိုးကြတဲ့အခါ ခံစားချက်တွေ လက်ဖြာနေခဲ့တာပါ။

ဒီနေရာမှာ ဆိုဗီယက်စစ်သည်တယောက်က ဂျာမန်ကလေးတယောက်ကို ချီထားပြီး နာဇီစကြာတံဆိပ်ကို နင်းထားတဲ့ပုံရုပ်တု ရှိနေပါတယ်။ ဒါဟာ ရုရှားတွေအပေါ် ဂျာမန်တွေက အကြွေးတင်နေတာကို သတိပေးဖို့ သင်္ကေတလို့လည်း  ဆိုကြပါတယ်။

ရုရှားဟာ နယ်ချဲ့သမားတွေလို့ ဆိုထားတဲ့ ရန်လိုနေတဲ့ တပ်ဖွဲ့တွေအပေါ် အောင်နိုင်ပါလိမ့်မယ်လို့ မြောက်ကိုရီးယားခေါင်းဆောင် ကင်မ်ဂျုံအန်းက ပြောကြားကြောင်း နိုင်ငံပိုင်ရုပ်မြင်သံကြား KRT က သတင်းထုတ်ပါတယ်။

နိုင်ငံတကာ တရားမျှတမှုကို ဖော်ဆောင်ပြီး ကမ္ဘာလုံးဆိုင်ရာ ငြိမ်းချမ်းရေးကို ကာကွယ်ဖို့နဲ့ ဩဇာအာဏာ လက်တံရှည်သူတွေနဲ့ နယ်ချဲ့တွေရဲ့ မတရားပြုမူမှုတွေကနေ ကာကွယ်ဖို့အတွက် မြင့်မြတ်တဲ့စစ်ပွဲကို သတ္တိရှိရှိ ဆင်နွှဲနေတဲ့ သမ္မတ ဗလာဒီမာ ပူတင်၊ ရုရှားစစ်တပ်နဲ့ ရုရှားပြည်သူတွေကို နွေးထွေးတဲ့ နှုတ်ခွန်းဆက်စကား ပြောကြားချင်တယ်လို့ ကင်မ်ဂျုံအန်းက ပြောပါတယ်။

ရုရှားသမ္မတ ဗလာဒီမာပူတင်ထံ ပေးစာတစောင်မှာ ကင်မ်က ပြောကြားခဲ့ကြောင်း KRT သတင်းမှာ ဖော်ပြပါတယ်။

ဒီမှတ်ချက်စကားတွေဟာ ယူကရိန်းနဲ့ သူ့ကို ကျောထောက်နောက်ခံပေးထားတဲ့ အမေရိကန်လို အနောက်နိုင်ငံကို ရည်ရွယ်ကြောင်း ရှုမြင်ထားပါတယ်။

မြောက်ကိုရီးယားဟာ ကရင်မလင်နန်းတော်နဲ့ ပိုနီးကပ်တဲ့ ဆက်ဆံရေးကို တည်ဆောက်ခဲ့ပြီး မနှစ်က ယူကရိန်းကို ကျူးကျော်တိုက်ခိုက်ခဲ့တဲ့ မော်စကိုကို ကျောထောက်နောက်ခံ ပြုခဲ့ပါတယ်။

ရုရှားဟာ ပင်လယ်နက်ထဲကို ဝင်လာမယ့် သင်္ဘောတွေကို မှတ်ပုံတင်ခွင့်ပြုဖို့ ငြင်းဆန်ရင်း ပင်လယ်နက်ကိုဖြတ်သန်းပြီး ကောက်ပဲသီးနှံသယ်ဖို့ သဘောတူညီချက်ကို ထိထိရောက်ရောက် ရပ်တန့်လိုက်ပြီလို့ ယူကရိန်း ပြန်လည်တည်ဆောက်ရေးဝန်ကြီးဌာနက မေ ၈ ရက်မှာ ပြောလိုက်ပါတယ်။

ရုရှားရဲ့ ဒီလုပ်ရပ်က လက်ရှိသဘောတူညီချက်ရဲ့ စည်းကမ်းချက်တွေကို ဆန့်ကျင်နေတယ်လို့ ဝန်ကြီးဌာနက ထုတ်ပြန်ချက်ထဲမှာ ဖော်ပြထားပါတယ်။

ယူကရိန်းရဲ့ ပင်လယ်နက်ဆိပ်ကမ်းတွေကို မနှစ်က ရုရှားက ကျူးကျော်ပြီးတဲ့နောက် ပိတ်ဆို့ထားပေမဲ့ အဲဒီထဲက ၃ ခုကို ရုရှားနဲ့ ယူကရိန်းတို့ကြား သဘောတူညီချက်အရ ပြီးခဲ့တဲ့ ဇူလိုင်လက ပြန်ဖွင့်ပေးခဲ့ပါတယ်။

ကုန်တင်ဆောင်ဖို့ သင်္ဘော ၆၂ စင်း အပါအဝင် သင်္ဘောအစီး ၉၀ ဟာ ယူကရိန်း ဆိပ်ကမ်းတွေဆီ သွားဖို့ ခွင့်ပြုချက်အတွက် တူရကီရေပိုင်နက်မှာ စောင့်ဆိုင်းနေတယ်လို့ ဝန်ကြီးဌာနက ဆိုပါတယ်။

သဘောတူညီချက်ဟာ မေ ၁၈ ရက်မှာ သက်တမ်းကုန်ဆုံးမှာပါ။ ရုရှားအစိုးရကတော့ ကမ္ဘာ့စားနပ်ရိက္ခာ အကျပ်အတည်းကို ဖြေလျှော့ဖို့ ရည်ရွယ်ထားတဲ့ သဘောတူညီချက်ကနေ နုတ်ထွက်မယ်လို့ ခြိမ်းခြောက်ထားပါတယ်။

တူရကီနဲ့ ကုလသမဂ္ဂတို့ကတော့ သဘောတူညီချက်ကို သက်တမ်းတိုးဖို့ လုပ်ဆောင်နေပါတယ်။