ခရိုင်းမီးယားဒေသ ဝင်ရောက်သိမ်းပိုက်မှု ၈ နှစ်ပြည့် အခမ်းအနားကို မတ်လ ၁၈ ရက်က ရုရှားနိုင်ငံ မော်စကိုမြို့ အားကစားရုံမှာကျင်းပခဲ့ရာမှာ  သမ္မတပူတင် စကားပြောနေစဉ် ရုရှားနိုင်ငံပိုင်ရုပ်သံရဲ့ တိုက်ရိုက်လွှင့်နေမှု ရုတ်တရက် ပြတ်တောက်ခဲ့ပါတယ်။ 

သမ္မတက မိန့်ခွန်းကို ပြီးဆုံးအောင် ဆက်ပြောနေပေမဲ့ တီဗီမှာ မျိုးချစ်စိတ်ဓာတ်သီချင်းတွေနဲ့ အကတွေသာ လွှင့်နေပါတယ်။ နည်းပညာဆိုင်ရာ ချို့ယွင်းမှု တစုံတရာကြောင့် ပြတ်တောက်သွားတာလို့ အစိုးရက ကြေညာပါတယ်။ 

ယူကရိန်းကို စစ်ဆင်မှု ၂၃ ရက် မြောက်နေ့မှာ ခရိုင်းမီးယားဒေသသိမ်းပိုက်မှု နှစ်ပတ်လည်အခမ်းအနားကို ကျင်းပတာပါ။

ပူတင်က “ယူကရိန်းကိုစစ်ဆင်မှုဟာ လိုအပ်ချက်အရဖြစ်တယ်၊ ဘာကြောင့်လဲဆိုတော့ အမေရိကန်က ယူကရိန်းကို အသုံးချပြီး ရုရှားကို အန္တရာယ်ပြုနေလို့ပါ။ ရုရှားစကားပြော တဲ့ဒေသတွေမှာ ယူကရိန်းက လူမျိုးတုံးသတ်ဖြတ်မှု လုပ်နေတာတွေကို  မော်စကိုအစိုးရအနေနဲ့ ကာကွယ်ရမယ်” လို့ ပြောပါတယ်။

ယူကရိန်းအစိုးရဘက်ကတော့ ပူတင်စွပ်စွဲနေတဲ့ လူမျိုးတုံးသတ်ဖြတ်မှုဆိုတာ အခြေအမြစ်မရှိဘူး ဝါဒဖြန့်သက်သက်လို့ တုံ့ပြန်ခဲ့ပါတယ်။ 

အမေရိကန်ကလည်း အနောက်အုပ်စုက ရုရှားပြိုကွဲအောင် ခြိမ်းခြောက် လုပ်ဆောင်နေ တယ်ဆိုတာ အဓိပ္ပါယ်မရှိဘူးလို့ ပြောပါတယ်။

ပူတင်စကားပြောခဲ့တဲ့ စင်မြင့်နောက်မှာ ‘နာဇီဝါဒမရှိသော ကမ္ဘာ’ ဆိုတဲ့ ကြွေးကြော်သံနဲ့အတူ ရုရှားစစ်ကားတွေပေါ်မှာ ရေးထားတဲ့ ‘Z’ သင်္ကေတကို ရေးထားပါတယ်။