ဘရာဇီးနိုင်ငံ၊ ရီယိုဒီဂျနေရိုမြို့မှာ မိုးကြီးပြီး မြေပြိုလို့ လူ ၁၆ ယောက်ထက် မနည်း သေဆုံးတယ်လို့ မီဒီယာတွေက ဧပြီ ၄ ရက်မှာ ဖော်ပြပါတယ်။

ပြည်နယ်အတွင်း ရှင်သန်ကျန်ရစ်သူတွေကို ကယ်ဆယ်ရေးသမားတွေက ရှာနေကြပါတယ်။ ဒီပြည်နယ်ထဲက ရီယိုမြို့ပြီးရင် ဒုတိယ လူဦးရေ အများဆုံး ဒေသဖြစ်တဲ့ ဘိုင်ဇာဒါ ဖလူမီနန့်စ်နဲ့ ကမ်းရိုးတန်း မြို့တွေမှာ မိုးကြီးခဲ့ပါတယ်။

မုန်တိုင်းတွေကြောင့် မတ် ၁ ရက်နဲ့ ၂ ရက်နေ့တွေက မြို့အတော်များများမှာ လမ်းတွေဟာ မြစ်တွေ ဖြစ်ကုန်ခဲ့ပါတယ်။ ဒါဟာ မိုးရာသီမှာ ဖြစ်လေ့ ရှိပေမယ့် အခြေအနေက ဒီနှစ်မှာ ပိုဆိုးခဲ့ပါတယ်။

သစ်တောပြုန်းပြီး အမှိုက်ပစ်စနစ် ညံ့ဖျင်းတဲ့ လူတွေရဲ့ လုပ်ရပ်တွေကြောင့် တမြို့လုံး ရေကြီးခဲ့တာက ပြဿနာပဲလို့ ဒေသခံ တယောက်က ပြောပါတယ်။

ဒေသတွင်းမှာ မိုးက ၆၅၅ မီလီမီတာထိ ရွာချခဲ့ပြီး ဒါဟာ မှတ်တမ်းတင်ဖူးသမျှ အမြင့်ဆုံး ပမာဏလို့ ဒေသခံ အာဏာပိုင်တွေက ပြောပါတယ်။

ရီယိုပြည်နယ်အတွင်း ပေထရိုပိုလစ် ရှေးဟောင်း သမိုင်းဝင်မြို့မှာ မိုးကြီးလို့ လူ ၂၃၃ ယောက် သေဆုံးပြီး သီတင်းပတ် ၆ ပတ်အကြာမှာ ခုလို ရုတ်တရက် ရေကြီးပြီး မြေပြိုခဲ့တာလို့ ရိုက်တာ သတင်းမှာ ဖော်ပြပါတယ်။

ဒါဟာ ပစိဖိတ် သမုဒ္ဒရာအတွင်း လာနီညာ ရာသီဥတု ဖြစ်စဉ်ကြောင့် ဘရာဇီးမှာ မိုးကြီးခဲ့တာလို့ ပညာရှင်တွေက ယုံကြည်ကြပါတယ်။