ဘုတလင်မြို့ပေါ် ရဲစခန်းကို ပြည်သူ့ကာကွယ်ရေးတပ်ဖွဲ့များ ဝင်ရောက်တိုက်ခိုက်
စစ်ကိုင်းတိုင်း၊ ဘုတလင်မြို့ရှိ မြို့မရဲစခန်းကို ဧပြီ ၄ ရက် ည ၉ နာရီခွဲလောက်မှာ ဒေသခံပြည်သူ့ကာကွယ်တပ်က ဝင်ရောက်တိုက်ခိုက်ခဲ့ပါတယ်။
ဘုတလင်မြို့မရဲစခန်းကို ဘုတလင်နင်ဂျာ၊ ကြေးမုံအဖွဲ့အပါအဝင် ပူးပေါင်းအဖွဲ့တွေက တိုက်ခိုက်ခဲ့တာလို့ ဘုတလင်ပြည်သူ့ကာကွယ်ရေးနင်ဂျာအဖွဲ့တာဝန်ရှိသူက ပြောပါတယ်။
“ကျနော်တို့ ဘုတလင်မြို့မရဲစခန်းကို ရှော့ဒုံး ၆ လုံးနဲ့အရင်ပစ်တယ်။ နောက်ထပ် လက်လုပ်လက်နက်ကြီးနဲ့ရော လက်နက်ငယ်ရောပစ်ခတ်ခဲ့တယ်။ (-) အကျအဆုံးကတော့ မသိရသေးဘူး။ သူတို့ဘက်ကလည်း ပြန်ပစ်တာတော့ ရှိတယ်။ ကျနော်တို့က နယ်မြေ ကျွမ်းကျင်တာကို အသုံးချတိုက်ခဲ့တာကြောင့် အထိအခိုက် အကျအဆုံး မရှိခဲ့ဘူး”လို့ ပြောပါတယ်။
ဝင်ရောက်တိုက်ခိုက်ရာမှာ နှစ်ဘက်အပြန်အလှန်ပစ်ခတ်တာတွေ ရှိနေတာကြောင့် ညအချိန်မှာ ဘယ်မှ မထွက်ရဲ၊ မကြည့်ရဲဘူးလို့ ရဲစခန်းအနီးဝန်းကျင်မှာ နေထိုင်သူတွေက ပြောပါတယ်။
ဘုတလင်မြို့ပေါ်နေ ပြည်သူတဦးက “ပစ်ခတ်တာကတော့ ညပိုင်း ၉ နာရီခွဲအချိန်အကြီးဖြစ်တာဗျ။ လက်နက်အသံတွေတော့ ဆူညံနေတာပဲ။ သူတို့အခုလိုပစ်နေတော့ အပြင်လည်း ထွက်မကြည့်ရဲဘူး။ အထိအခိုက် အကျအဆုံးကတော့ အတိကျမသိရသေးဘူး” လို့ ပြောပါတယ်။
ဘုတလင်မြို့ပေါ်မှာ စစ်ကောင်စီက ကျင်းပတဲ့ တက္ကသိုလ်ဝင်စာမေးပွဲကို ဒေသအခေါ်ခုံမင်းကြီး စာသင်ကျောင်းမှာ ပြုလုပ်နေပြီး PDF အဖွဲ့က တိုက်ခိုက်တာတွေပြုလုပ်နိုင်တယ်လို့ ဒေသခံတွေက ပြောပါတယ်။
