စစ်ကိုင်းတိုင်း၊ ခင်ဦးမြို့နယ်အတွင်း မြို့မရဲစခန်းအပါအဝင် စစ်ကောင်စီတပ်တွေ စခန်းချရာနေရာ ၃ နေရာကို ဧပြီ ၁၄ ရက်က တိုက်ခိုက်ခဲ့ရာမှာ စစ်ကောင်စီဘက်က ၉ ယောက်သေဆုံးပြီး PDF ဘက်က ၂ ယောက် ကျဆုံးသွားတယ်လို့ ဒေသခံ ခင်ဦးကာကွယ်ရေးတပ်ဖွဲ့က ပြောပါတယ်။ 

ခင်ဦးမြို့မရဲစခန်း၊ ပျဥ်ထောင်ရွာ၊ မဒေါင်းလှရွာမှာရှိတဲ့ စစ်ကောင်စီတပ်စခန်းချထားတဲ့နေရာ ၃ ခုကို ဒရုန်းနဲ့ရော မြေပြင်ကနေပါ တိုက်ခိုက်ခဲ့တာမှာ အပြန်အလှန်ပစ်ခတ်မှု ဖြစ်ပွားပြီး  PDF ၂ ယောက်ကျဆုံးခဲ့သလို စစ်ကောင်စီဘက်ကလည်း ပျဉ်ထောင်ရွာမှာ ၆ ယောက်၊  မြို့မရဲစခန်းက ၃ ယောက် စုစုပေါင်း ၉ ယောက် သေဆုံးသွားတာလို့ ဆိုပါတယ်။

ခင်ဦး PDF တပ်ဖွဲ့ဝင် တဦးက “ ကျနော်တို့ နေရာသုံးခုလုံး ကိုဝေဟင်ကနေ ဒရုန်းနဲ့ အသုံးပြုတိုက်ခိုက်ခဲ့တယ်။ စခန်းအတွင်းကနေ စခတွေ ပြန်ပစ်တာတော့ရှိတယ်။ ပျဉ်ထောင်ရွာစခန်းကတော့ ကျနော်တို့နဲ့ နှစ်ဘက်မြေပြင်တိုက်ပွဲတော့ ဖြစ်လိုက်သေးတယ်။ ကျနော်တို့စတိုက်တာက ဧပြီလ‌ ၁၄ ရက်နေ့ နေ့ခင်း ၁၂ နာရီကနေ စတင်တယ် ည ၇ နာရီမှာ စစ်ဆင်ရေးကိုသိမ်းခဲ့တယ်။”လို့ ပြောပါတယ်။ 

ပျဥ်ထောင်ကျေးရွာစစ်ကောင်စီတပ်စခန်းကို  "ဒေါင်းစစ်သည် ခင်ဦးအဖွဲ့ ၊KSO(Khin U Support Organization အဖွဲ့တွေအပါအဝင် မဟာမိတ် ၈ ဖွဲ့က တိုက်ခိုက်ခဲ့ပြီး ခင်ဦးမြို့မရဲ စခန်းကိုတော့ Royal Tiger Guerrilla Forceက တိုက်ခိုက်ခဲ့ကာ မဒေါင်းလှကျေးရွာမှာတော့ ဒေသခံ ကာကွယ်ရေးတပ်ပေါင်းက သွားရောက်တိုက်ခိုက်ခဲ့တာဖြစ်ပါတယ်။