နည်းပြ တန်ဟတ်ချ်ကို ထွက်ခွာခွင့်မပေးဘဲ ဆက်ထိန်းသွားဖို့ ကြိုးပမ်းနေတယ်လို့ အိုင်းယက်စ်နည်းစနစ်ဒါရိုက်တာ ဂါရီဟမ်စထရာက ပြောပါတယ်။ 

ဟော်လန်နည်းပြ တန်ဟတ်ချ်ဟာ အိုင်ယက်စ်ကို ရာသီအကုန်ထိသာ တာဝန်ယူကိုင်တွယ်သွားမှာဖြစ်ပြီး မန်ယူအသင်းဆီ ပြောင်းရွှေ့ဖို့အတွက် အကြိုသဘောတူညီမှုရရှိထားတယ်လို့ သတင်းတွေက ဖော်ပြခဲ့ကြတာပါ။ 

နည်းစနစ်ဒါရိုက်တာ ဂါရီကတော့ နည်းပြတန်ဟတ်ချ်ကို အသင်းမှာဆက်ရှိနေဖို့အတွက် အစွန်းကုန် ကြိုးပမ်းနေပြီး စာချုပ်သက်တမ်းတိုးဖို့လည်း ကမ်းလှမ်းထားတယ်လို့ ပြောပါတယ်။

“ကျနော်တို့ အရာအားလုံး လုပ်ဆောင်နေပါတယ်။ သူ့ကို ဆက်ထိန်းနိုင်ဖို့အတွက် အရာအားလုံး ကြိုးပမ်းနေတယ်ဆိုတာ ရှင်းရှင်းလင်းလင်းပြောနိုင်ပါတယ်” လို့ နည်းနစ်ဒါရိုက်တာ ဂါရီက ပြောပါတယ်။ 

ပြီးခဲ့တဲ့တပတ်က ထွက်ပေါ်လာတဲ့သတင်းတွေအရတော့ မန်ယူအသင်းဟာ နည်းပြတန်ဟတ်ချ်ကို ၄ နှစ်စာချုပ်နဲ့ ခေါ်ယူဖို့ အကြိုသဘောတူညီမှုရရှိခဲ့တယ်လို့ သတင်းထွက်ပေါ်လာခဲ့တာပါ။ 

နည်းပြတန်ဟတ်ချ် ကိုယ်တိုင်ကတော့ ယူနိုက်တက်နဲ့ အကြောင်းတွေကို ဖွင့်ဟပြောဆိုခြင်းမရှိသေးဘဲ အိုင်းယက်စ် နဲ့ ရာသီကုန်အထိ ဖြတ်သန်းပြီး အောင်မြင်မှုရယူနိုင်ဖို့ပဲ ပစ်မှတ်ထားနေတယ်လို့ ပြောဆိုထားပါတယ်။