နာမည်ကြီး လူ့အခွင့်အရေးရှေ့နေ အာမယ် ကလူနေးက ကုလသမဂ္ဂအဖွဲ့ဝင် နိုင်ငံတွေအနေနဲ့ ရုရှားက ယူကရိန်းမှာ ကျူးလွန်နေတဲ့ စစ်ရာဇဝတ်မှုတွေအတွက် တရားမျှတမှုရအောင် ဆောင်ရွက်ကြဖို့ ဧပြီ ၂၇ ရက်က တိုက်တွန်းလိုက်ပါတယ်။

"အခု ယူကရိန်းဟာ သားသတ်ရုံလို ဖြစ်နေပါပြီ၊ ဥရောပရဲ့ အသည်းနှလုံးနေရာ၊ အလယ်ခေါင်တည့်တည့်မှာ ဒီလိုတွေ ဖြစ်နေတာပါ" လို့ ကုလသမဂ္ဂ လုံခြုံရေးကောင်စီ အဖွဲ့ဝင်တွေ ပြင်သစ်နဲ့ အယ်လ်ဘေးနီးယားတို့က စီစဉ်တဲ့ လုံခြုံရေးကောင်စီ အင်ဖောမယ် အစည်းအဝေးမှာ ပြောလိုက်တာပါ။

၂၀၁၇ ခုနှစ်တုန်းက အီရတ်မှာ အိုက်ဇစ် Islamic State အဖွဲ့က ကျူးလွန်တဲ့ စစ်ရာဇဝတ်မှုတွေကို စုံစမ်းဖော်ထုတ်ဖို့ လုံခြုံရေးကောင်စီမှာ မဲခွဲအတည်ပြုခဲ့ဖူးပါတယ်။ သူကိုယ်တိုင်လည်း ပါဝင်ကူညီခဲ့တဲ့ အဲဒီကိစ္စဟာ ၅ နှစ် ကြာလာတဲ့ အခုအချိန်အထိ ဘာမှ ထိထိရောက်ရောက် မဆောင်ရွက်နိုင်တာကိုလည်း သူက ဝေဖန်ပါတယ်။

"အဲဒီနှစ်မှာ မွေးခဲ့တဲ့ ကျမကလေးနှစ်ယောက်တောင် ငါးနှစ်ရှိနေပြီ၊ ကုလသမဂ္ဂက စုဆောင်းထားတဲ့ သက်သေ အထောက်အထားတွေကလည်း မှတ်တမ်းအဆင့်ကနေ ဘာမှ ဆက်ဖြစ်မလာဘူး။ ဘယ် နိုင်ငံတကာ ခုံရုံးမှလည်း ISIS ကို တရားစွဲထားတာ မရှိဘူး" လို့ ဝေဖန်သွားတာပါ။

ဒါပေမဲ့ အီရတ်နဲ့ ဆီရီးယားဟာ ICC နိုင်ငံတကာခုံရုံး အဖွဲ့ဝင်တွေ မဟုတ်တဲ့အတွက် ဆိုပြီး အခုထိ အမှုကို ဆက်လက် မကိုင်တွယ်နိုင်တာပါ။

နာမည်ကျော် ဟောလိဝုဒ်မင်းသားကြီး ကလူနေးရဲ့ ဇနီးဖြစ်တဲ့ အာမယ်ကလူနေးဟာ အခုလည်း ရုရှားက ယူကရိန်းကို ကျူးကျော်တိုက်ခိုက်တဲ့ ကိစ္စ၊ အရပ်သားတွေ သေကျေနေတဲ့ ကိစ္စတွေနဲ့ပတ်သက်လို့ ရုရှားဘက်က တာဝန်ခံမှုရှိလာအောင် နိုင်ငံတကာ ဥပဒေအထောက်အကူပြု အဖွဲ့မှာ တာဝန်ရှိသူတယောက် ဖြစ်ပါတယ်။

သူတို့အဖွဲ့ဟာ စစ်ရာဇဝတ်မှု၊ လူသားတွေအပေါ် ကျူးလွန်တဲ့ ရာဇဝတ်မှု၊ ဂျီနိုဆိုက် လူမျိုးတုံးသတ်ဖြတ်ကို ကိုင်တွယ်တဲ့ နိုင်ငံတကာတရားရုံး ICC နဲ့လည်း ပူးပေါင်းဆောင်ရွက်နေပါတယ်။