ဥရောပဘောလုံးအဖွဲ့ချုပ် UEFA က ချန်ပီယံလိဂ် ဗိုလ်လုပွဲနဲ့ပတ်သက်တဲ့ အဆင်မပြေမှု အားလုံး အတွက် ပရိသတ်တွေကို တောင်းပန်တဲ့ ကြေညာချက်တစောင်ကို ထုတ်ပြန်ပါတယ်။ 

နောက်ဆုံး ဗိုလ်လုပွဲမတိုင်ခင် မှောင်ခိုလက်မှတ်တွေ ကိစ္စ၊ ပဲရစ်မြို့ရှိ  စတာဒီ ဒီ ဖရန့် ဘောလုံး ကွင်းရှေ့မှာ လူတွေ ဝရုန်းသုန်းကား ဖြစ်ခဲ့တာ၊ ပွဲချိန် နာရီဝက် နောက်ကျခဲ့တာတွေအတွက် ဘောလုံးအဖွဲ့ချုပ် တရားဝင် တောင်းပန်လိုက်တာပါ။ 

ဘောလုံးကွင်းရှေ့က ဝရုန်းသုန်းကား အခြေအနေကို ထိန်းသိမ်းဖို့ ရဲအဖွဲ့က မျက်ရည်ယိုဗုံးတွေပါ သုံးခဲ့ရပါတယ်။

ဒီအဖြစ်အပျက်တွေကြောင့် ဘောလုံးပွဲလာကြည့်တဲ့ပရိသတ်တွေ ပျော်ရွှင်အောင်ပွဲခံရမယ့် ဗိုလ်လုပွဲနောက်ဆုံးညဟာ အထိတ်တလန့်နဲ့ စိတ်အနှောင့်အယှက်ဖြစ်ခဲ့ရတယ်၊ ဒီအတွက် UEFA က ရိုးရိုးသားသား တောင်းပန်တယ်လို့ ကြေညာချက်မှာ ဖော်ပြထားပါတယ်။

ဘောလုံးချစ်တဲ့ ပရိသတ်တွေကို နောက်တခါ ဒီလိုမျိုးတွေ ဘယ်တော့မှ မဖြစ်စေရပါဘူးလို့လည်း အာမခံလိုက်ပါတယ်။ 

အရင်တပတ် စနေနေ့က ပြင်သစ်နိုင်ငံ ပဲရစ်မြို့မှာ ကျင်းပခဲ့တဲ့ UEFA ဥရောပဖလား ချန်ပီယံလိဂ် နောက်ဆုံး ဗိုလ်လုပွဲမှာ ရီးရဲလ်မက်ဒရစ်နဲ့ လီဗာပူး အသင်းတို့ ယှဉ်ပြိုင်ခဲ့တာ ဖြစ်ပြီး ရီးရဲလ်က ၁ ဂိုး ဂိုးမရှိနဲ့ အနိုင်ရပြီး ၁၄ ကြိမ်မြောက် ချန်ပီယံဆုကို ရရှိခဲ့ပါတယ်။