ကနေဒါနိုင်ငံ မွန်ထရီယယ်မြို့မှာ ကျန်းမာရေးအရာရှိတွေဟာ ဇွန် ၆ ရက်က ရောဂါကူးစက်နိုင်ခြေများတဲ့သူတွေကို မျောက်ကျောက်ရောဂါကာကွယ်ဆေး ထိုးပေးနေပါတယ်။ 

ကာကွယ်ဆေးထိုးနှံသူတွေဟာ အဲဒီဒေသမှာ ကူးစက်မှုတွေ မြင့်တက်နေချိန်မှာ ပြီးခဲ့တဲ့ ၁၄ ရက်အတွင်း အတည်ပြုလူနာတွေနဲ့ ထိတွေ့ဖူးသူတွေ ပါဝင်ပါတယ်။ ရောဂါပိုးကူးစက်မှု မြင့်တက်လာခြင်းကြောင့် သူ့ကို ကာကွယ်ဆေးထိုးဖို့ လှုံ့ဆော်ခဲ့တယ်လို့ Montreal မြို့ခံ Frederic က ပြောပါတယ်။ 

ဇွန် ၃ ရက် သောကြာနေ့အထိ ကနေဒါ ပြည်သူ့ကျန်းမာရေး အေဂျင်စီ (PHAC) မှ နိုင်ငံတွင်း တခြားဒေသတွေမှာ ကူးစက်မှုပိုများမယ်လို့ ခန့်မှန်းထားပြီး မျောက်ကျောက်ရောဂါဖြစ်ပွားမှု ၇၇ မှုကို အတည်ပြုထားပါတယ်။ 

ကွေးဘက်ခ်မှာ မျောက်ကျောက်ရောဂါဖြစ်ပွားမှု ၇၁ ခု၊ အွန်တေရီယိုမှာ ၅ ခု နဲ့ အလ်ဘာတာမှာ ၁ ခု ဖြစ်ပါတယ်။ ကမ္ဘာ့ကျန်းမာရေးအဖွဲ့၊ ရိုက်တာ သတင်းပေးပို့ချက်တွေနဲ့ ဒေသဆိုင်ရာ အချက်အလက်တွေအရ မျောက်ကျောက်ရောဂါ အစုလိုက်ဖြစ်တဲ့ဒေသ မဟုတ်တဲ့ နိုင်ငံပေါင်း ၃၀ ဝန်းကျင်မှာ ဗိုင်းရပ်စ် ပျံ့နှံ့ဖြစ်ပွားနေကြောင်း သတင်းရရှိပြီး အဓိကအားဖြင့် ဥရောပမှာ အတည်ပြုလူနာ သို့မဟုတ် သံသယရှိသူ ၉၁၁ ကျော် ရှိနေတာပါ။

သိပ္ပံပညာရှင်တွေကတော့ ပြန့်ပွားမှုရဲ့ နောက်ကွယ်မှ အကြောင်းရင်းတွေကို ဖော်ထုတ်ဖို့ ကြိုးစားနေကြပါတယ်။ မျောက်တွေမှာ ပထမဆုံး တွေ့ရှိရပြီး မျောက်တွေနဲ့ အနီးကပ် ထိတွေ့ရာကနေ ပျံ့နှံ့တတ်တဲ့ မျောက်ကျောက်ရောဂါဟာ ပုံမှန်အားဖြင့် တုပ်ကွေးလိုမျိုး လက္ခဏာတွေနဲ့ ရက်သတ္တပတ်တွေအတွင်း ကိုယ်တိုင် ဖြေရှင်းကုသနိုင်တဲ့ အဖုတွေပြည့်နေတဲ့ အရေပြားဒဏ်ရာတွေ ဖြစ်ပေမယ့်လည်း ရောဂါပိုးကူးစက်ခံရသူတွေထဲက အနည်းငယ်ဟာ သေဆုံးကြရပါတယ်။ 

ကမ္ဘာ့ကျန်းမာရေးအဖွဲ့ (WHO) ရဲ့ အဆိုအရ မျောက်ကျောက်ရောဂါဟာ ၁၉၇၀ ပြည့်နှစ်တွေက ကွန်ဂိုဒီမိုကရက်တစ်သမ္မတနိုင်ငံမှာ ပထမဆုံး မှတ်တမ်းတင်ခဲ့တဲ့ လူသားကျောက်ရောဂါနဲ့ ဆင်တူပြီး နည်းနည်း ပိုအပျော့စားဖြစ်တဲ့ ရှားပါးဗိုင်းရပ်စ်ပိုးတစ်မျိုး ဖြစ်ပါတယ်။