ထိုင်းနိုင်ငံ၊ ဘန်ကောက် အပြည်ပြည်ဆိုင်ရာလေဆိပ်မှာ ခရီးတထောက်လာနားပြီး ဩစတြေးလျကို ဆက်လက်ထွက်ခွာသွားတဲ့ ခရီးသည်တယောက်ထံမှာ မျောက်ကျောက်ရောဂါ တွေ့ရှိတယ်လို့ ထိုင်းနိုင်ငံကူးစက်ရောဂါထိန်းချုပ်ရေးဗဟိုဌာနက ပြောပါတယ်။

အဆိုပါခရီးသည်ဟာ  လွန်ခဲ့တဲ့အပတ်က ဥရောပနိုင်ငံကနေ ဝင်ရောက်လာပြီး သုဝဏ္ဏဘူမိ နိုင်ငံတကာလေဆိပ်မှာ ၂ နာရီကြာ ခရီးတထောက်လာနားခဲ့ကြောင်း၊ အဲဒီနောက် ခရီးဆက်ထွက်ခွာသွားရာ ဩစတြေးလျနိုင်ငံရောက်မှ မျောက်ကျောက်ရောဂါ ကူးစက်ခံထားရတာ တွေ့ရှိတယ်လို့ထိုင်းနိုင်ငံကူးစက်ရောဂါထိန်းချုပ်ရေးဦးစီးဌာန ညွှန်ကြားရေးမှူး ဒေါက်တာ ကျရရတ် ဖိထယားဝုန်းအားနွန်းက ပြောပါတယ်။

ဒါကြောင့် အဆိုပါခရီးသည်နဲ့ ထိတွေ့ခဲ့သူ ၁၂ ဦးကို စောင့်ကြည့်စစ်ဆေးနေသလို၊ သူတို့တွေဟာ ပိုးရှိသူနဲ့ လေယာဉ်တစ်စီးတည်း အတူတကွစီးနင်းလိုက်ပါလာသူတွေလို့ ဆိုပါတယ်။

ဒီမတိုင်ခင်က ထိုင်းတောင်ပိုင်း ဖူးကက်မြို့မှာ လက်ဝှေ့သင်တန်းလာတက်နေတဲ့ အိုင်ယာလန်နိုင်ငံသား ၅ ဦးမှာ အရည်ကြည်ဖုတွေ တွေ့ရှိတဲ့အတွက် သံသယလူနာအနေနဲ့ စောင့်ကြည့်စစ်ဆေးရာမှာ သာမန်ရေယုန်ရောဂါသာဖြစ်ပြီး စိုးရိမ်စရာမရှိဘူးလို့ ဒေါက်တာ ကျရရတ်က ပြောပါတယ်။

အာဖရိကတိုက်ကနေ စတင်တွေ့ရှိခဲ့တဲ့ မျောက်ကျောက်ရောဂါဟာ အခုဆိုရင် နိုင်ငံပေါင်း ၃၂ နိုင်ငံက လူပေါင်း ၄၉၄ ဦးကို ကူးစက်သွားပြီဖြစ်ပါတယ်။

ထိုင်းနိုင်ငံထဲမှာ ပြည်တွင်းကူးစက်သူ မရှိသေးဘဲ ဒီရောဂါအတွက် ကာကွယ်ဆေးလည်းရှိကြောင်း၊ လွန်ခဲ့တဲ့နှစ်ပေါင်း ၄၀ ကျော်ကလည်း တနိုင်ငံလုံးကို ကျောက်ရောဂါကာကွယ်ဆေး ထိုးထားပြီးသားဖြစ်လို့ အသက် ၄၅ နှစ်အောက်သူတွေမှာသာ သတိထားရမှာဖြစ်တယ်လို့ ဆိုပါ တယ်။

ထိုင်းနိုင်ငံမှာ ဒီရောဂါကို ကြိုတင်ကာကွယ်နှိမ်နင်းဖို့ ကော်မတီလည်း ဖွဲ့စည်းထားပြီး ဖြစ်ပါတယ်။ 

ကိုးကား- The Reporters