ထိုင်းနိုင်ငံအရှေ့မြောက်ပိုင်း၊ ဘူရီရမ်ခရိုင်၊ စတိတ်မြို့နယ်မှာ စက်သုံးဆီဈေးနှုန်း ကြီးမြင့်နေတာကြောင့်  မူလတန်းကျောင်းသူလေး တယောက်ဟာ ဆင်စီးပြီး နေ့စဉ် ကျောင်းလာတက်တဲ့အကြောင်း လူမှုကွန်ရက်မှာ ရေပန်းစားနေပါတယ်။ 

အသက် ၁၁ နှစ်ရွယ် နောင့်ပူပေ့ ဆိုတဲ့ မိန်းကလေးဟာ ပြီးခဲ့တဲ့အပတ်က ကျောင်းထဲကို ဆင်စီးပြီး ဝင်လာတာတွေ့လို့ ကျောင်းသူကျောင်းသားတွေရော ဆရာ/ဆရာမတွေပါ အံ့အားသင့် ကုန်ကြတာပါ။ 

ဘာကြောင့် ဆင်စီးလာသလဲလို့ ဝိုင်းမေးရာမှာ မိန်းကလေးက ဆီဈေးကြီးလို့ ဆိုပြီး ရယ်ရယ်မော မော ပြန်ပြောခဲ့ပါတယ်။ 

အဆိုပါဆင်ကြီးမှာ အမြင့် ၃ မီတာခွဲရှိ ဆင်ထီးတစ်ကောင်ဖြစ်ပြီး အိုလေ့လို့အမည်ပေးထားကာ အသက် ၂၅ နှစ်ရှိပြီဖြစ်ပါတယ်။ 

သူတို့ဆီမှာ မွေးထားတဲ့ဆင် ၄ ကောင်ရှိကြောင်း၊ သားသမီးတွေဟာ မွေးကတည်းက ဆင်နဲ့ယဉ်ပါးနေပြီး နောင့်ပူပေ့ဟာဆိုရင် ဆင်ကြီးနဲ့အတူရေချိုးကာ ၆ နှစ်သမီးအရွယ်ကတည်းက သူ့ဘာသာ ဆင်ပေါ်တက်စီးတတ်နေပြီလို့ ဆိုပါတယ်။ 

နောင့်ပူပေ့ဟာ ဆင်ပေါ်မတက်ခင် ဆင်ကြီးကို အရင်ရှိခိုးလေ့ရှိကြောင်း၊ ဒီလိုလုပ်ရတာဟာ သူတို့ မိသားစုဟာ ဆင်ကိုအမှီပြုပြီး အသက်မွေးဝမ်းကျောင်းပြုတာမို့ ဆင်ဟာ မိမိတို့ကျေးဇူးရှင်၊ ကျေးဇူးရှင် ကျောကုန်းပေါ် စီးရတာကို ခွင့်လွှတ်ဖို့ တောင်းပန်တဲ့အနေနဲ့ရော၊ နောက်တချက်ဟာ ထိုင်း ထုံးစံမှာ ဆင်ပြောင်ကြီးတွေဆိုရင် အမျိူးသမီးတွေ စီးနင်းရိုးထုံးစံမရှိတာကြောင့် ဝန်ချတောင်းပန်တဲ့အနေနဲ့ ရှိခိုးရတာလို့ ဆိုပါတယ်။ 

ဆင်လိမ္မာကြီး အိုလေ့ကလည်း ပူပေ့ကျောင်းသွားခါနီးဆို ခန္ဓာကိုယ်ကို ထိုင်ချပေးပြီး အစွယ်ကနေ ဖက်တွယ်တက်စေကာ နှာမောင်းနဲ့ ချွန်းကိုလှမ်းပေးလိုက်ပါသေးတယ်။ 

ဒါ့အပြင် နောင့်ပူပေ့ရဲ့ ထမင်းထုပ်၊ မုန့်ထုပ်တွေကိုလည်း အစွယ်နဲ့ချိတ်ကာ သယ်သွားပေးပြီး ခြံတံခါးကိုလည်း နှာမောင်းနဲ့တွန်းဖွင့်တတ်ပါသေးတယ်။ 

နောင့်ပူပေ့ ကြီးလာရင် ဆင်ဦးစီးလုပ်မှာလားလို့ သတင်းထောက်တွေက မေးရာမှာ သူက မလုပ်ချင်ကြောင်း၊ ဆင်တွေ နေမကောင်းရင် ပြုစုနိုင်ဖို့ တိရစ္ဆာန်ဆေးကုဆရာဝန်ပဲ ဖြစ်ချင်တယ်လို့ ပြောသွားပါတယ်။ 

Ref- ThaiPBS