ယူကရိန်းနိုင်ငံ ပြည်တွင်းလုံခြုံရေးဌာန (SBU) ရဲ့ ဒုတိယအကြီးအကဲတဦးကို ထုတ်ပယ်ပစ်လိုက်ပြီးနောက်မှာ SBU ရဲ့ ဒေသဆိုင်ရာ အကြီးအကဲအသစ် အတော်များများကို ခန့်အပ်ခဲ့ကြောင်း သမ္မတ ဗိုလိုဒီမီယာ ဇလန်းစကီးက ဇူလိုင် ၁၉ ရက်မှာ ပြောကြားခဲ့ပါတယ်။ 

ယူကရိန်းလုံခြုံရေးဌာနကို စာရင်းစစ်ဆေးမှုတွေ လုပ်ဆောင်နေပြီး အများစုဟာ ကျေနပ်စရာ မကောင်းတဲ့ လုပ်ငန်းရလဒ်တွေကြောင့် အရာရှိ ၂၈ ဦးကို ထုတ်ပယ်ခဲ့တာလို့ သမ္မတ ဇလန်းစကီး က ဇူလိုင် ၁၈ ရက် နှောင်းပိုင်းမှာ ပြောကြားခဲ့ပါတယ်။ 

သမ္မတ ဇလန်းစကီးဟာ သူနဲ့ပုဂ္ဂိုလ်ရေးပိုင်းမှာလည်း အရင်းနှီးဆုံးဖြစ်တဲ့ ပြည်တွင်းလုံခြုံရေး အကြီးအကဲနဲ့ အစိုးရရှေ့နေချုပ်တို့ကို ရာထူးကနေ ရပ်ဆိုင်းခဲ့ပြီးနောက် နှစ်ရက်အကြာမှာပဲ ယူကရိန်းပါလီမန်က သူတို့ကို ရာထူးထုတ်ပယ်ခဲ့ပါတယ်။ 

သမ္မတ ဇလန်းစကီးဟာ အီဗန် ဘာကာနော့ဗ်အား သူ့ရဲ့ငယ်သူငယ်ချင်း ဆိုတာကို ဘေးဖယ်ထားပြီး SBU ပြည်တွင်းလုံခြုံရေးဌာနအကြီးအကဲတယောက်အနေနဲ့ စုံစမ်းစစ်ဆေးရေး လုပ်ဆောင်ခဲ့တာပါ။ 

ရှေ့နေချုပ် အီရီနာ ဗာနယ်ဂျီတိုဗာကိုလည်း သမ္မတနဲ့ ရင်းနှီးတဲ့ မဟာမိတ်ကဏ္ဍကနေ ဘေးဖယ်ပြီး ကိယက်ဗ်ရဲ့ အကြီးမားဆုံး စစ်ပွဲကာလ အတွင်းစည်း သုတ်သင်ရှင်းလင်းမှုမှာ ထိပ်တန်းအစိုးရရှေ့နေအဖြစ် စစ်ဆေးခဲ့ပါတယ်။ 

ရုရှားရဲ့ ကျူးကျော်မှုအပြီး ငါးလနီးပါးအကြာမှာ သူ့ရဲ့မဟာမိတ်နှစ်ဦးဟာ သူတို့ရဲ့ အဖွဲ့အစည်းအတွင်းရှိ သစ္စာဖောက်တွေနဲ့ ပူးပေါင်းဆောင်ရွက်သူတွေကို အမြစ်ပြတ်ချေမှုန်းဖို့ ပျက်ကွက်ခဲ့ကြောင်း သမ္မတက အခိုင်အမာ ပြောကြားခဲ့ပါတယ်။ 

SBU အကြီးအကဲအဖြစ်ကနေ ဘာကာနော့ဗ်ကို ထုတ်ပယ်ကြောင်း အတည်မပြုရသေးခင် မိနစ်ပိုင်းအလိုမှာ တယ်လီဂရမ်ကနေ ထုတ်ပြန်တဲ့ ကြေညာချက်မှာ ဘာကာနော့ဗ်က သူ့ရဲ့သက်တမ်းအတွင်း တွက်ချက်မှု မှားယွင်းမှုတွေ ရှိခဲ့ပေမယ့်လည်း သူ့ရဲ့ မှတ်တမ်းအတွက် ဂုဏ်ယူကြောင်း ပြောကြားခဲ့ပါသေးတယ်။