ထိုင်းမြောက်ပိုင်း ချင်းရိုင်းခရိုင်က စုံတွဲ ၂ ဦးဟာ မွေးနေ့အထိမ်းအမှတ်အနေနဲ့  စားသောက်ဆိုင်မှာ ပင်လယ်စာမှာစားစဉ် ခရုထဲကနေ ဘတ်သန်းချီတန်ဖိုးရှိ လိမ္မော်ရောင်ပုလဲတလုံး တွေ့ရှိတယ်လို့ ထိုင်းသတင်းတွေမှာ ဖော်ပြပါတယ်။ 

အသက် ၂၀ ကျော်ရွယ် ဆစ်ထိတေချ် နဲ့ ဖတ်ချ်ရိယားဆိုသူ ချစ်သူစုံတွဲဟာ မွေးနေ့ အထိမ်းအမှတ်အနေနဲ့ နောက်ထပ်အဖော် ၂ ဦးနဲ့အတူ ဒီလ ၁၁ ရက်နေ့က ချင်းရိုင်းရာ့ချ်ဖတ် တက္ကသိုလ်အနီးရှိ စားသောက်ဆိုင်တဆိုင်မှာ ပင်လယ်စာမှာစားခဲ့တယ်လို့ ဆိုပါတယ်။ 

အမျိုးသားဖြစ်သူက ခရုစားရင်း မာကြောတဲ့အရာကို သွားနဲ့ ၂ ကြိမ် ကိုက်မိကြောင်း၊ ဒါကြောင့် သဲအမှတ်နဲ့ ထွေးထုတ်ရာမှာ လိမ္မော်ရောင်အလုံးလေး ဖြစ်နေတာကို တွေ့ရတယ်လို့ ဆိုပါတယ်။ 

ဒါကြောင့် ကြားဖူးနားဝရှိတဲ့ တန်ဖိုးကြီးပုလဲဖြစ်လေမလားဆိုပြီး အင်တာနက်ထဲက အချက်အ လက်တွေနဲ့ တိုက်ကြည့်ရာမှာ ဆင်တူလို့ ပိုပြီးသေချာအောင် ချင်းမိုင်တက္ကသိုလ် ဘူမိဗေဒ ကျောက်မျက်ဌာနကို သွားပြခဲ့ကြောင်း၊ ဌာနက စစ်ဆေးပြီး Melo Pearls အစစ်ဖြစ်ကြောင်း ထောက်ခံစာပါ ထုတ်ပေးလိုက်တဲ့အတွက် ချစ်သူနှစ်ဦးလုံး ပျော်ရွှင်နေကြတယ်လို့ သတင်းမှာ ဖော်ပြထားပါတယ်။ 

စားသောက်ဆိုင်ပိုင်ရှင်ကလည်း သူတို့ဆိုင်မှာ လာစားရင်း ကံထူးသွားတဲ့အတွက် ဝမ်းသာကြောင်း၊ အဆိုပါ ပင်လယ်စာတွေကို မဟာချိုင်ကနေ တိုက်ရိုက်မှာယူချက်ပြုတ်တာဖြစ်ပြီး၊ ပုလဲသတင်းကြီးသွားတဲ့နောက် ဆိုင်က အရင်ထက်ပိုလူစည်ကားလာတယ်လို့ သတင်းထောက်ကို ပြောပါတယ်။ 

အဆိုပါ ပုလဲရဲ့တန်ဖိုးမှာ အင်တာနက်ထဲက အချက်အလက်တွေအရ ဘတ်သန်းချီတန်ဖိုး ရှိကြောင်း၊ စိတ်ဝင်စားလို့ မေးမြန်းလာသူ လေးငါးဦးရှိပေမယ့် သူတို့က ဘယ်လောက်နဲ့ရောင်း ရမှန်းမသိသေးတာကြောင့် မရောင်းဖြစ်သေးဘူးလို့ ဆိုပါတယ်။ 

ကျောက်မျက်ရောင်းဝယ်ရေး အတွေ့အကြုံရှိသူတွေကတော့ ရတနာတွေရဲ့တန်ဖိုးဟာ နှစ်ခြိုက်တဲ့ သူအပေါ်မှာသာ မူတည်တယ်လို့ ပြောပါတယ်။

သူတို့စုံတွဲကတော့ အများကြီးမမျှော်လင့်ဘဲ လောလောဆယ်တင်ရှိနေတဲ့ အကြွေးတွေ၊ မော် တော်ကား ၂ စီး အရစ်ကျဝယ်ထားတွေကြေရင် ကျေနပ်ပြီလို့ သတင်းထောက်တွေကို ပြောသွားပါတယ်။