close

ဂျာမန်လေကြောင်းလိုင်းမှ လေယာဉ်မှူးများ သပိတ်မှောက်၊ ခရီးစဉ်ရာချီ ဖျက်သိမ်းခဲ့ရ

ဂျာမန်လေကြောင်းလိုင်း လုဖ်သန်ဆာက လေယာဉ်မှူးတွေ စက်တင်ဘာ ၂ ရက်က သပိတ်မှောက်ခဲ့တာကြောင့် ရာနဲ့ချီတဲ့ လေကြောင်းခရီးစဉ်တွေ ဖျက်သိမ်းလိုက်ရပြီး အားလပ်ရက် ခရီးထွက်မယ့်သူတွေလည်း သောင်တင်နေပါတယ်။

ဖရန့်ခ်ဖတ်နဲ့ မြူးနစ်ချ်ရှိ သူ့ရဲ့အဓိကအခြေစိုက်စခန်းတွေမှာ လေကြောင်းခရီးစဉ် ၈၀၀ လောက်ကို ဖျက်သိမ်းလိုက်ရပြီး ခရီးသည် ၁၃၀,၀၀၀ လောက် ထိခိုက်ခဲ့ကြောင်း လေကြောင်းလိုင်းက ပြောကြားခဲ့ပါတယ်။

သပိတ်ရဲ့သက်ရောက်မှုကို လျှော့ချဖို့လည်း ကျယ်ကျယ်ပြန့်ပြန့် လုပ်ဆောင်နေကြောင်း ပြောပါတယ်။

ဖဲရ်အိုက်နိဂွန် ကော့ခ်ပစ် (VC) အလုပ်သမားသမဂ္ဂဟာ အခုနှစ်မှာ လစာ ၅ ဒသမ ၅ ရာခိုင်နှုန်း တိုးပေးဖို့နဲ့ အလိုအလျောက် ငွေကြေးဖောင်းပွမှုအတွက် လျော်ကြေးငွေပေးဖို့အပြင် လေယာဉ်မှူးဝင်ခွင့် အနိမ့်ဆုံးအဆင့်အတွက် ပိုကောင်းမွန်တဲ့ စည်းကမ်းချက်တွေကို တောင်းဆိုထားတာ ဖြစ်ပါတယ်။

VC သမဂ္ဂဟာ နောက်ဆုံးအကြိမ် လုပ်ခလစာ ညှိနှိုင်းမှု မအောင်မြင်ခဲ့တာကြောင့် လုဖ်သန်ဆာလေယာဉ်မှူး ၅,၀၀၀ ကျော်ကို ၂၄ နာရီပတ်လုံး သပိတ်မှောက်ကြဖို့ ရုတ်တရက် တောင်းဆိုခဲ့တာလို့ ဆိုပါတယ်။

လုဖ်သန်ဆာ အပါအဝင် လေကြောင်းလိုင်း အများအပြားဟာ သပိတ်မှောက်မှုတွေနဲ့ ဝန်ထမ်းရှားပါးမှုတွေကြောင့် အခုနွေရာသီမှာ လေယာဉ်ခရီးစဉ် ထောင်ပေါင်းများစွာကို ဖျက်သိမ်းခဲ့ရပြီး ကိုဗစ်-၁၉ လော့ဒေါင်းတွေ ပြီးဆုံးသွားပြီးနောက် အဓိကလေဆိပ်ကြီးတွေမှာ အရှည်ကြီး တန်းစီနေရပြီးတော့ ခရီးတွေပြန်စထွက်ဖို့ စိတ်အားထက်သန်နေသူတွေ စိတ်ပျက်ခဲ့ရပါတယ်။

ဖရန့်ခ်ဖတ်လေဆိပ်မှာ ခရီးစဉ်ဖျက်သိမ်းခံရတဲ့ ခရီးသည် လီယာနေ ဒစ်ခ်ဆင်ဟာ သူစောင့်နေရတာ ၁၆ နာရီရှိနေပြီး ဘာတွေဖြစ်လဲ၊ ဘာဆက်လုပ်ရမလဲ ဆိုတာကို ဘာအီးမေးလ်နဲ့မှ အကြောင်းမပြန်ဘူးလို့ ပြောပြပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
Up