ရခိုင်ပြည်နယ် ကျောက်ဖြူမြို့မှာ စက်တင်ဘာ ၂၂ ရက်က မြို့ပေါ်ရပ်ကွက်နေ အမျိုးသား ၃ ယောက်နဲ့ မလကျွန်းကျေးရွာနေ လူငယ် ၄ ယောက်တို့ကို စစ်ကောင်စီတပ်က လာရောက် ဖမ်းဆီးခေါ်ဆောင်သွားခဲ့တယ်လို့ ဒေသခံတွေက ပြောပါတယ်။

မလကျွန်းကျေးရွာနေ ဖမ်းဆီးခံရသူ လူငယ် ၄ ယောက်အနက် ၂ ယောက်က အထက်တန်းပညာကို သင်ကြားနေကြသူတွေဖြစ်ပြီး ကျန်လူငယ် ၂ ယောက်က တခြားရွာကနေ ဘောလုံးကစားဖို့ ရောက်ရှိနေတဲ့သူတွေဖြစ်ပါတယ်။ 

ရွာရဲ့ခန်းမမှာ အိပ်နေကြစဉ် စစ်ကောင်စီတပ်ဖွဲ့ဝင်တွေက စက်တင်ဘာ ၂၂ ရက် မနက် ၄ နာရီခွဲက လာရောက် ဖမ်းဆီးခဲ့တာလို့ မလကျေးရွာနေသူ တဦးက ပြောပါတယ်။

“ကျေးရွာခန်းမကို မနက် ၄ နာရီခွဲလောက်မှာ လာဝိုင်းတယ်။ အဲဒီအထဲမှာက ဘောလုံးကန်တဲ့ ကောင်လေးတွေက အိပ်နေကြတယ်။ သူတို့က ဘောလုံးနိုင်လို့ စုပြီးထမင်းချက်စားပြီးတော့ ကောင်လေး ၄ ယောက်က အိပ်နေကြတာပေါ့။ အဲဒီအချိန်မှာ စစ်တပ်ကဝင်ပြီး ဖမ်းသွားတာပါ။ သူတို့ကို ဖမ်းပြီး ခန်းမထဲမှာရှိတဲ့ လေအေးပေးစက် ၂ လုံးရယ်၊ စားပွဲခုံ ၃ လုံးရယ်၊ ဗီဒို ၃ လုံးရယ်၊ ဟောပြောတဲ့စင်ကို ဖြိုဖျက်သွားခဲ့တယ်။ ပြီးတော့ လေအေးပေးစက် ၁ လုံးကို ယူသွားကြတယ်။”

ကျောက်ဖြူမြို့ အစိုးရရပ်ကွက်က ကိုရန်နိုင်မင်း(ခ) သောက်ဆန်းနဲ့ ကုလဘာတောင်ရပ်ကွက်က အမျိုးသား ၁ ယောက်တို့ကို စက်တင်ဘာ ၂၂ ရက်‌ မနက် ၁ နာရီလောက်မှာ စစ်ကောင်စီတပ်ဖွဲ့ဝင်တွေက နေအိမ်ကနေ လာရောက်ကာ ဖမ်းဆီ‌ေခေါ်ဆောင်သွားခဲ့သလို စေတီတောင်ရပ်ကွက်က ကိုလှကျော်ဆိုသူကိုလည်း မနက် ၁၁ နာရီ လောက်မှာ စစ်ကောင်စီတပ်ဖွဲ့ဝင်တွေက နေအိမ်ကိုလာရောက်ပြီး ဖမ်းဆီးသွားတယ်လို့ ကျောက်ဖြူ မြို့နေ ဒေသခံတွေက ဆိုပါတယ်။

စက်တင်ဘာ ၈ ရက်ကစပြီး ၁ ပတ်အတွင်း ကျောက်ဖြူမြို့ပေါ်က အရပ်သား ၇ ယောက်ကိုလည်း စစ်ကောင်စီတပ်ဖွဲ့ဝင်တွေက ဖမ်းဆီးကာ ၃၄ စစ်တပ်ထဲခေါ်ယူသွားပြီးနောက် သုံးလေးရက်အကြာမှာ ကျောက်ဖြူမြို့မရဲစခန်းကို ပို့ဆောင်ကာ အေအေနဲ့ဆက်စပ်တယ်ဆိုပြီး ပုဒ်မ-၅၀၅ (က)နဲ့ အမှုဖွင့်ထားတယ်လို့ ဖမ်းဆီးခံမိသားစုတွေက ဆိုပါတယ်။

ရခိုင်မှာ စစ်ကောင်စီတပ်နဲ့ ရခိုင့်တပ်တော်တို့ကြား တကျော့ပြန်တိုက်ပွဲပြင်းထန်လာနေတဲ့အချိန်မှာ စစ်ကောင်စီတပ်က အရပ်သားပြည်သူတွေကို သံသယနဲ့ဖမ်းဆီးတာတွေ၊ တိုက်ပွဲဖြစ်ပွားတဲ့ နေရာတွေမဟုတ်ဘဲ အရပ်သားတွေရှိတဲ့ နေရာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်နေတယ်လို့ ဒေသခံတွေက ဆိုပါတယ်။