ထိုင်းဘုရင် မဟာဝဇီရာလောင်ကွန်းနဲ့ မိဖုရား ဆုသီဒါတို့ဟာ နိုင်ငံအရှေ့မြောက်ပိုင်း နောင်ဘိုလမ်းဖူးခရိုင်မှာဖြစ်ပွားခဲ့တဲ့ တိုက်ခိုက်မှုမှာ ဒဏ်ရာရရှိသူတွေနဲ့ သေဆုံးသူတွေရဲ့ ဆွေမျိုးသားချင်းတွေဆီ အောက်တိုဘာ ၇ ရက်မှာ သွားရောက်အားပေးနှစ်သိမ့်ခဲ့ပါတယ်။ 

“ဝမ်းနည်းကြောင်း ထပ်လောင်း ပြောကြားလိုပါတယ်။ ဒီခံစားချက်ကို ဖော်ပြဖို့ တခြား စကားလုံးတွေ မရှိပါဘူး။ စိတ်ခိုင်ခိုင်ထားဖို့ အားလုံးကို အားပေးချင်ပါတယ်။ ဒီလိုဆိုးရွားတဲ့ အဖြစ်အပျက်မျိုး ကြုံခဲ့ရတာ စိတ်မကောင်းစရာပါ၊ ဒါပေမဲ့အခုအချိန်မှာတော့ တတ်နိုင်သမျှ အကောင်းဆုံးဖြစ်အောင် ကျနော်တို့ ဘာလုပ်နိုင်မလဲဆိုတာကို စဉ်းစားရမယ်”လို့ ဘုရင်က သေဆုံးသူတွေရဲ့ ဆွေမျိုးတွေကို ပြောကြားခဲ့ပါတယ်။

အသက်ရှင်ကျန်ရစ်သူ အသက် ၄ နှစ်အရွယ် ကန်တာပွန်ဆီနာ အပါအဝင် နောင်ဘိုလမ်းဖူးဆေးရုံရှိ အထူးကြပ်မတ်ကုသဆောင်မှာ လူနာငါးယောက် ရှိနေသေးတယ်လို့  နန်းတော်သတင်းလွှာမှာ ဖော်ပြထားပါတယ်။ 

ဒဏ်ရာ ပြင်းထန်တဲ့ လူနာ နှစ်ယောက်ကို  အူထုံဌာနီ ဆေးရုံကို ပို့ဆောင်ခဲ့ပြီး  အနီးကပ် ဆေးကုသမှုပေးနေရတာ ဖြစ်ပါတယ်။  

ထိုင်းနိုင်ငံကို ထိတ်လန့်တုန်လှုပ်သွားစေတဲ့ ဓားနဲ့သေနတ် အသုံးပြုပြီး တိုက်ခိုက်မှုမှာ ကလေးငယ်လေးတွေ အများစုအပါအဝင် လူပေါင်း ၃၄ ဦးကို ရဲတပ်ဖွဲ့ဝင်ဟောင်းက သတ်ဖြတ်ပြီး နောက်တရက်မှာ ဝမ်းနည်းပူဆွေးနေတဲ့ ဆွေမျိုးသားချင်းတွေက ကလေးထိန်း ဂေဟာမှာ အရုပ်တွေကို ဆုပ်ကိုင်ထားရင်း ငိုကြွေးနေခဲ့ကြပါတယ်။ 

ဘန်ကောက်မြို့တော်ရဲ့ အရှေ့မြောက်ဘက် ၅၀၀ ကီလိုမီတာ အကွာရှိ  ဥထိုင်းဆဝမ်မြို့ရှိ မူကြိုနေ့ကလေးထိန်းကျောင်းမှာ သတ်ဖြတ်ခံခဲ့ရတဲ့ ကလေးငယ် ၂၃ ဦးအတွက် ဝမ်းနည်းကြေကွဲမှု အထိမ်းအမှတ်အဖြစ် အစိုးရ အဆောက်အအုံတွေမှာ အလံတော်ကို တိုင်တဝက် လွှင့်ထူခဲ့ပါတယ်။ 

တိုက်ခိုက်သူမှာ အသက် ၃၄ နှစ်အရွယ် ရဲတပ်ကြပ်ဟောင်း ပညာခမ်ပရန်ဖြစ်ပြီး သူဟာ မူးယစ် ဆေးဝါးမှုနဲ့ ရာထူးပြုတ်ပြီး မူးယစ်ဆေးဝါးမှု စွဲချက်တွေကို တရားရင်ဆိုင်နေရသူဖြစ်ကြောင်း ရဲတပ်ဖွဲ့က ဖော်ထုတ်ခဲ့ပါတယ်။

Photo- Khaosod