ဆန္ဒပြသူများကို အီရန် အစောင့်တပ်အကြီးအကဲ သတိပေး
အီရန် ဆန္ဒပြသူတွေကို အီရန်ရဲ့ အင်အားကြီး တော်လှန်ရေး အစောင့်တပ် အကြီးအကဲ ဟူစိန် ဆာလာမီက အောက်တိုဘာ ၂၉ ရက် မှာ သတိပေးလိုက်ပါတယ်။
နိုင်ငံတွင်း မငြိမ်မသက် ဖြစ်နေတဲ့အပေါ် လုံခြုံရေးတပ်ဖွဲ့တွေက အပြင်းအထန် နှိမ်နင်းတာတွေ အရှိန်မြှင့်လာနိုင်တဲ့ လက္ခဏာလို့ မီဒီယာတွေက သုံးသပ်ပါတယ်။
“လမ်းမပေါ် မလာပါနဲ့” လို့ ဆာလာမီက ပြောရင်း အကျပ်အတည်းအတွင်း အပြင်းထန်ဆုံး စကားလုံးတွေကို သူက ပြောခဲ့တာပါ။
အီရန် ဘာသာရေးခေါင်းဆောင်တွေကတော့ အကျပ်အတည်းရဲ့ အကြောင်းရင်းအဖြစ် အစ္စရေးနဲ့ အမေရိကန် အပါအဝင် ပြည်ပရန်သူတွေကို အပြစ်တင်ခဲ့ပါတယ်။
အမျိုးသမီးတွေက အရေးပါတဲ့ အခန်းကဏ္ဍကနေ ပါဝင်ခဲ့တဲ့ ဆန္ဒပြလှုပ်ရှားနေသူတွေကတော့ အီရန်နိုင်ငံသားတွေက သတိပေးချက်တွေကို ဖီဆန်ခဲ့ကြပါတယ်။
အောက်တိုဘာ ၂၉ ရက်က သွေးထွက်သံယိုနဲ့ ဆန္ဒပြပွဲတွေ အသစ်တဖန် ထပ်ဖြစ်တယ်ဆိုတဲ့ သတင်းတွေ ထွက်လာခဲ့ပါတယ်။
ဆာကက်ရှ်မြို့က မိန်းကလေးကျောင်းတစ်ကျောင်းမှာ လုံခြုံရေးတပ်ဖွဲ့ဝင်တွေက ကျောင်းသူတွေ ကို ပစ်ခတ်ခဲ့တယ်လို့ လူ့အခွင့်အရေးအဖွဲ့ ဟန်းဂါက သတင်းထုတ်ပြန်ခဲ့ပါတယ်။
ကာဒစ်စတန်ပြည်နယ် မြို့တော် ဆာနန်ဒက်ရှ်က ဆေးသိပ္ပံတက္ကသိုလ် ကျောင်းသားတွေကို လုံခြုံရေးတပ်ဖွဲ့ဝင် တွေက ပစ်ခတ်ခဲ့လို့ ကျောင်းသား အများအပြား ဒဏ်ရာရခဲ့ပြီး တယောက်က ဦးခေါင်းကို သေနတ်နဲ့ ပစ်ခံခဲ့ရတယ်လို့ ဟန်းဂါ က ပြောပေမဲ့ သီးခြားအတည်မပြုနိုင်ပါဘူး။
ပြီးခဲ့တဲ့လက အကျင့်စာရိတ္တ ထိန်းသိမ်းရေးရဲတွေ ဖမ်းထားချိန်မှာ အသက် ၂၂ နှစ်အရွယ် ကာ့ဒ်အမျိုးသမီး မာဆာအာမီနီ သေဆုံးပြီးတဲ့နောက် အီရန်နိုင်ငံတဝန်းမှာ ဆန္ဒပြပွဲတွေ ပေါ်ပေါက်ခဲ့ပါတယ်။
