ဆာလ်ဗေဒိုးသမ္မတ နာယစ်ဘ်ဘူကီလီဟာ မြို့ကြီးတွေမှာ လုံခြုံရေးတင်းကျပ်ဖို့ နိုဝင်ဘာ ၂၃ ရက်က ကတိပြုလိုက်ပြီး ဂိုဏ်းအုပ်စုဖွဲ့ အကြမ်းဖက်သောင်းကျန်းမှုကို ဆန့်ကျင်တဲ့ ၈ လကြာ တိုက်ပွဲကို အဆုံးသတ်ဖို့ အရှိန်မြှင့်လိုက်တာလို့ ဆိုပါတယ်။ 

မတ်လကတည်းက ဘူကီလီဟာ အကြမ်းဖက်သမားတွေလို့ သူ ခေါ်ဆိုတဲ့ သံသယရှိ ဂိုဏ်းဝင် ၅၀,၀၀၀ ကျော်ကို ဖမ်းဆီးဖို့ အမိန့်ပေးခဲ့ပြီး ပိုက်စိပ်တိုက် ရှာဖွေဖမ်းဆီးထားသူတွေကို အခြေခံ လုပ်ငန်းစဉ်ဆိုင်ရာ အခွင့်အရေးတွေ မပေးဖို့ ကန့်ကွက်ထားပါတယ်။ 

ဒီဖြိုခွင်းမှုဟာ သူ လက်မှတ်ရေးထိုး ထုတ်ပြန်ထားတဲ့ မူဝါဒတွေထဲက တခုဖြစ်ပြီး ဗဟိုအမေရိက နိုင်ငံရဲ့ လူသတ်မှုနှုန်းကို တစ်ရက်ကို နှစ်ဦးထက်နည်းအောင် လျှော့ချဖို့ ရည်ရွယ်ထားပါတယ်။

သူဟာ ရပ်ရွာတွေထဲမှာ ကျန်ရှိနေသေးတဲ့ ရာဇ၀တ်ကောင်တွေကို ဆွဲထုတ်နိုင်ဖို့ မြို့ကြီးတွေမှာ ကင်းလှည့်တဲ့ စစ်သား ၂၀၀,၀၀ မှာ ရဲတပ်ဖွဲ့က ၂၀၀ ကျော် ထပ်ဖြည့်ပေးမယ် လို့ စစ်တပ် အရာရှိများ သင်တန်းဆင်းပွဲမှာ ပြောသွားပါတယ်။ 

အစိုးရအချက်အလက်တွေအရ ဒီဖြိုခွင်းမှုမှာ ဂိုဏ်းတွေနဲ့ဆက်စပ်တဲ့ သတ်ဖြတ်မှုတွေ သိသိသာသာ လျော့ကျသွားပြီး ဒီနှစ် ရက်ပေါင်း ၂၀၀ ကျော်အတွင်း ဂိုဏ်းတွေနဲ့ပတ်သက်တဲ့ သေဆုံးမှုတွေဟာ ကင်းစင်ကြောင်း သိရပါတယ်။ 

ဘူကီလီဟာ ပြီးခဲ့တဲ့မတ်လက သီတင်းပတ်ကုန်တခုတည်းမှာ ဆယ်လ်ဗေဒိုနိုင်ငံသား ၇၆ ဦး သေဆုံးပြီး နောက်မကြာခင်မှာပဲ သူ့ရဲ့အငြင်းပွားဖွယ်ရာ နှိမ်နင်းမှုကို စတင်ခဲ့တာပါ။

လူ့အခွင့်အရေးပိုင်းကတော့ ဒီမူဝါဒကို ကျယ်ကျယ်လောင်လောင် ဝေဖန်ကြပြီး ဖမ်းဆီးခံရသူ အများအပြားဟာ ရာဇ၀တ်ပြစ်မှုဟောင်း မရှိထားကြောင်း သိရပါတယ်။