ရခိုင်ပြည်နယ်၊ ဘူးသီးတောင်မြို့နယ်၊ သပိတ်တောင်ကျေးရွာအနီး ပန်ဇင်းချောင်းအတွင်းမှာ ဇန်နဝါရီ ၂၃ ရက် ဒီနေ့မနက် ၈ နာရီလောက်က မှောင်ခိုနွားတွေ တင်ဆောင်လာတဲ့ စက်လှေ ၃ စီးကနေ နွားကောင်ရေ ၁၇၉ ကောင်နဲ့အတူ တရားခံ ၁၆ ဦးကို စစ်ကောင်စီ တပ်ဖွဲ့ဝင်တွေက ဖမ်းဆီးရမိခဲ့တယ်လို့ တာဝန်ရှိသူတွေဆီကနေ သိရပါတယ်။

“စက်လှေ ၃ စီးကို မသင်္ကာလို့ ကမ်းကပ်စစ်ဆေးခဲ့တာ၊ တရားမဝင်သယ်လာတဲ့ နွား ၁၇၉ ကောင် ဖမ်းမိတာ။ စက်လှေသမားနဲ့ နွားထိန်း ၁၆ ဦး ဖမ်းမိခဲ့တယ်။ သူတို့ကို အရေးကြီးကုန်စည်နဲ့ ဝန်ဆောင်မှုဥပဒေ ပုဒ်မ ၅ နဲ့ အမှုဖွင့်ထားတယ်။”

ကျောက်ဖြူမြို့နယ် ပန်းတောပြင်ကျေးရွာသား စက်လှေပိုင်ရှင် ဝင်းနိုင်ရဲ့ စက်လှေက လူ ၆ ဦးနဲ့ နွား ၆၈ ကောင်၊ ကျောက်ဖြူမြို့ နယ်ပိုင်ချောင်းကျေးရွာနေ စက်ဆရာ နေအောင်ရဲ့ စက်လှေက လူ ၅ ဦး၊ နွား ၅၇ ကောင်နဲ့ မြေပုံမြို့နယ်၊ သရက်တောင်ကျေးရွာနေ စက်ဆရာ ထွန်းထွန်းကြည်ရဲ့ စက်လှေက လူ ၅ ဦး၊ နွားထီး ၅၄ ကောင်၊ ကာလတန်ဖိုး ကျပ်သိန်းပေါင်း ၂,၃၂၇ ရှိ စုစုပေါင်းနွားကောင်ရေ ၁၇၉ ကောင် ဖမ်းဆီးရမိခဲ့တာ ဖြစ်ပါတယ်။

ဖမ်းဆီးခံရသူတွေရဲ့ ထွက်ဆိုချက်အရ နွား ၁ ကောင်ကို စက်လှေပိုင်ရှင်တွေက ၈၀,၀၀၀ ကျပ်၊ နွားထိန်း ၁ ဦးကို ၅၀,၀၀၀ ကျပ်နဲ့ မှောင်ခိုရောင်းချဖို့ သယ်ဆောင်လာတာဖြစ်ပြီး နွားပိုင်ရှင်တွေကို စစ်ဆေးဖော်ထုတ်နေကာ ဖမ်းမိသူတွေကို အရေးကြီးကုန်စည်နဲ့ ဝန်ဆောင်မှုဥပဒေပုဒ်မ ၅ နဲ့ အမှုဖွင့် အရေးယူထားကြောင်း ရဲမှတ်တမ်းတွေအရ သိရပါတယ်။

၂ဝ၂၂ မတ် ၁၈ ရက်ကလည်း ဘင်္ဂလားဒေ့ရှ်နိုင်ငံကို သွားမယ့် နွား ၅၈ ကောင်ပါ မှောင်ခိုစက်လှေတစီးကို မာန်အောင်မြို့နယ်မှာ ဖမ်းမိခဲ့ပြီး ဇွန်လ ၄ ရက်ကလည်း တောင်ကုတ်မြို့နယ်မှာ တရားမဝင် နွား ၁၃ ကောင် သယ်ဆောင်သူ ၄ ဦးကို ဖမ်းဆီးရမိခဲ့ပါတယ်။