အာဂျင်တီးနားနိုင်ငံမှာ ဘတ်စ်ကားယာဉ်မောင်းတွေဟာ ဧပြီ ၃ ရက်က  သူတို့ရဲ့ လုပ်ဖော်ကိုင်ဖက် တယောက် အသတ်ခံရမှုနဲ့ ဒေသတွင်း မလုံခြုံမှုတွေကို ဆန္ဒပြနေကြချိန်မှာ သူတို့နဲ့ဆွေးနွေးဖို့ ချဉ်းကပ်လာတဲ့ ဗျူနိုအေးရိစ်ပြည်နယ် လုံခြုံရေးဝန်ကြီး ဆာဂျီယိုဘာနီ ကို ဝိုင်းဝန်းတိုက်ခိုက် ရိုက်နှက်ခဲ့ကြပါတယ်။

မနေ့ မနက်က်အစောပိုင်း အရုဏ်တက်ချိန်လောက်က ရာဇ၀တ်ဂိုဏ်းအုပ်စုတစုဟာ ဘတ်စ်ကားပေါ် တက်လာပြီး ဘတ်စ်ကား ယာဉ်မောင်းတစ်ဦးကို ပစ်ခတ်သတ်ဖြတ်ခဲ့တာဖြစ်ပြီး အမှုကို ရာဇ၀တ်မှုဆိုင်ရာ စုံစမ်းစစ်ဆေးရေး အရာရှိက စစ်ဆေးနေပါတယ်။

အမည်မသိ ဘတ်စ်ကားဒရိုင်ဘာတယောက်က သူတို့ကို အာဏာပိုင်တွေက လာမာတန်ဇာမှာ လုံခြုံရေးကို မထိန်းနိုင်တော့ဘူးလို့ပဲ အမြဲပြောနေတာကြောင့် ဆန္ဒပြတာဖြစ်ကြောင်းနဲ့ အခု လုပ်ဖော်ကိုင်ဖက်တစ်ယောက် အသတ်ခံရလို့ အားလုံး စိတ်ထိခိုက်ရကြောင်း၊ တယောက် ယောက်က သူတို့ကို အာရုံစိုက်ပြီး တိကျတဲ့ အရေးယူမှုတွေ လုပ်မပေးမချင်း ဆန္ဒပြမှုကို ရုတ်သိမ်းမှာ မဟုတ်ပါဘူးလို့ ပြောပါတယ်။ 

သူတို့ တစ်ခုခု တောင်းဆိုလိုက်တိုင်း အာဏာပိုင်တွေက သွင်းအားစု မရှိလို့၊ ရန်ပုံငွေ မရှိလို့ သွင်းအားစု မရှိဘူး၊ ဘတ်စ်ကား သယ်ယူပို့ဆောင်ရေးကို ထိန်းချုပ်ဖို့ နည်းလမ်းမရှိဘူး ဆိုတာချည်းပဲ ပြန်ပြန်ပြောနေတာ လို့လည်း ဆိုပါတယ်။ 

ဗီဒီယိုဖိုင်ထဲမှာတော့ ဗျူနိုအေးရိစ်ပြည်နယ် လုံခြုံရေးဝန်ကြီး ဆာဂျီယိုဘာနီဟာ ကြမ်းပြင်ပေါ်မှာ လဲကျနေပြီး နှာခေါင်းမှာလဲ သွေးထွက်နေပါတယ်။ 

လုံခြုံရေးဝန်ကြီး ဆာဂျီယိုဘာနီက သူဟာ ဗျူနိုအေးရိစ်ပြည်နယ်မှာ နေ့စဥ်ကြုံတွေ့နေရတဲ့ မလုံခြုံမှုအခြေအနေကို ရပ်တန့်ဖို့ ဘယ်လိုရှေ့ဆက်လုပ်ဆောင်ရမယ် ဆိုတာကို နားလည် ပေးနိုင်ပြီး အဲဒါကို ဆန္ဒပြယာဉ်မောင်းတွေနဲ့ စကားပြောဆို ဆွေးနွေးလို့ မပြီးမချင်း ထွက်မသွားဘူး လို့ ပြောပါတယ်။