အစ္စရေးအာဏာပိုင်တွေက သိမ်းပိုက်ထားတဲ့ အနောက်ဘက်ကမ်းရှိ ပါလက်စတိုင်း စာသင်ကျောင်း တကျောင်းကို မေလ ၇ ရက်က ဖြိုချခဲ့လို့ ဥရောပသမဂ္ဂ (အီးယူ) က ပြင်းပြင်းထန်ထန် ပြစ်တင်ရှုတ်ချခဲ့ပါတယ်။

ဘက်သလေဟမ်မြို့ကနေ ၂ ကီလိုမီတာလောက် အကွာမှာရှိတဲ့ ဒီအဆောက်အအုံဟာ တရားမဝင် ဆောက်လုပ်ခဲ့တဲ့အဆောက်အဦးဖြစ်ပြီး  လေ့လာနေသူတွေ ဒါမှမဟုတ် တခြား လာရောက်လည်ပတ်သူတွေအတွက် ဘေးကင်းမှုဆိုင်ရာ အန္တရာယ်ရှိတာ တွေ့ခဲ့ရတယ်လို့ အစ္စရေးစစ်တပ်ရဲ့ ဌာနခွဲတခုဖြစ်တဲ့ COGAT က သတင်းထုတ်ပြန်ခဲ့ပါတယ်။  ဒီအဆောက်အဦကို ဖျက်သိမ်းဖို့ အစ္စရေးတရားရုံးက အမိန့်ပေးခဲ့တာဖြစ်ပါတယ်။

ပါလက်စတိုင်း ကလေးငယ် အယောက် ၆၀ ကို ထိခိုက်စေမယ့် စာသင်ကျောင်းကို ဖြိုဖျက်မှုကြောင့် တုန်လှုပ်ချောက်ချားသွားတယ်လို့ ပါလက်စတိုင်းတွေရဲ့ တရားဝင် တွစ်တာအကောင့်မှာ ပါလက်စတိုင်းဆိုင်ရာ ဥရောပသမဂ္ဂ (အီးယူ) ကိုယ်စားလှယ်အဖွဲ့က ပြောပါတယ်။

ဖြိုခွင်းမှုဟာ နိုင်ငံတကာဥပဒေအရ တရားမဝင်ဘဲ ပါလက်စတိုင်း လူဦးရေရဲ့ ဒုက္ခကို တိုးမြင့်လာစေပြီး တင်းမာတဲ့ပတ်ဝန်းကျင်ကို ပိုမိုကြီးထွားလာစေလိမ့်မယ်လို့ အီးယူ ကိုယ်စားလှယ်အဖွဲ့က ပြောပါတယ်။

မဖြိုခင် အဆောက်အအုံရဲ့ အခြေအနေနဲ့ပတ်သက်ပြီး ဆွေးနွေးဖို့ အစ္စရေးအာဏာပိုင်တွေရဲ့ ကြိုးပမ်းမှုအများအပြားကို အဆောက်အအုံပိုင်ရှင်က ငြင်းဆိုခဲ့တယ်လို့ COGAT  က သတင်းထုတ်ပြန် ပါတယ်။