ကမ္ဘာ့ဖလားချန်ပီယံဆုဖလား ရရှိတိုင်း GOAT လို့ခေါ်ကြတဲ့ သမိုင်းတလျှောက် အကြီးကျယ်ဆုံးနဲ့ အခမ်းနားဆုံး ကစားသမားတယောက် မဖြစ်စေနိုင်ကြောင်း ပီယားစ်မော်ဂန်က ပြောပါတယ်။
ဗြိတိန်နိုင်ငံသား အစီအစဉ်တင်ဆက်သူ ပီယားစ်မော်ဂန်ဟာ စီရော်နယ်ဒိုနဲ့ အလွန်ရင်းနှီးတဲ့ ဆက်ဆံရေး ရှိသလို အာဆင်နယ်နဲ့ ရော်နယ်ဒိုရဲ့ အမာခံပရိသတ်တဦးလည်း ဖြစ်ပါတယ်။
ကမ္ဘာ့ဖလားမတိုင်ခင်ကတည်းက ရော်နယ်ဒိုနဲ့ အင်တာဗျူးကြောင့် ရော်နယ်ဒိုဟာ မန်ယူအသင်းနဲ့ လမ်းခွဲခဲ့ရတဲ့အထိ ဖြစ်ခဲ့ပါတယ်။
မက်ဆီဟာ ခရိုအေးရှားနဲ့ ဆီမီးဖိုင်နယ်ပွဲစဉ်မှာ ထူးချွန်ပြောင်မြောက်စွာ ကစားနိုင်ခဲ့ပြီး အခမ်းနားဆုံး ကစားသမားတဦးဆိုတာ မှန်ပေမဲ့ သမိုင်းတလျှောက် အကောင်းဆုံး ကစားသမားလား ဆိုတာကတော့ ငြင်းခုံစရာရှိကြောင်း ပီယားစ်မော်ဂန်က ပြောပါတယ်။
“ကျနော်က ရော်နယ်ဒိုဘက်ကပဲ အမြဲတမ်း စိတ်အားထက်သန်စွာနဲ့ ကာကွယ်သွားမှာပါ။ ရော်နယ်ဒိုက ကမ္ဘာ့ဖလားဆုတံဆိပ်နဲ့ ထိုက်တန်ပါတယ်။ ကမ္ဘာ့ဖလားပြိုင်ပွဲ ချန်ပီယံဆု တခုက သမိုင်းတလျှောက် အခမ်းနားဆုံး ကစားသမား မဖြစ်စေနိုင်ပါဘူး။ ဒီလိုပြောပေမဲ့ မက်ဆီက ဆုဖလားရယူနိုင်သေးတာလည်း မဟုတ်ပါဘူး” လို့ ပီယားစ်မော်ဂန်က ပြောပါတယ်။
မက်ဆီဟာ ကမ္ဘာ့ဖလားဗိုလ်လုပွဲအထိ တက်ရောက်ခဲ့လို့ ချန်ပီယံဆုဖလား ရယူနိုင်ခဲ့မယ် ဆိုရင် ရော်နယ်ဒိုထက် အသာရသွားမယ်လို့ သုံးသပ်ကြပါတယ်။
လာမယ့် ကာတာကမ္ဘာ့ဖလားပြိုင်ပွဲမှာ အင်္ဂလန်အသင်းက ချန်ပီယံနိုင်တယ်လို့ယုံကြည်ကြောင်း တိုက်စစ်မှူး ဝီလ်ဆင်က ပြောပါတယ်။
နယူးကာဆယ်တိုက်စစ်မှူးဟာ ပြိုင်ပွဲနီးကပ်ချိန်ရောက် မှ အင်္ဂလန်အသင်းလူစာရင်းမှာ ပါဝင်လာခဲ့တာဖြစ်ပေမဲ့ လွန်ခဲ့တဲ့ ၄ လကတည်းက လက်ရွေးစင်မှာ ပြန်အရွေးချယ်ခံရလိမ့်မယ်လို့ ဒိုင်ယာရီစာအုပ်မှာ ရေးသားခဲ့ကြောင်း ဝီလ်ဆင်ကပြောပါတယ်။
ဝီလ်ဆင်ဟာ ဒဏ်ရာပြဿနာတွေကြောင့် လပေါင်းများစွာ အနားယူခဲ့ရပါသေးတယ်။ ဒါပေမဲ့ အောက်တိုဘာလအတွင်းမှာ ၄ ဂိုး သွင်းယူနိုင်ခဲ့ပြီး ကလပ်အသင်းကိုလည်း အဆင့်မြင့်မြင့်ရပ်တည်နိုင်အောင် စွမ်းဆောင်နိုင်ခဲ့ပြီးနောက် နည်းပြဆောက်ဂိတ်က ပြန်လည်ရွေးချယ်ခဲ့တာပါ။
အင်္ဂလန်အသင်းဟာ ကာတာကမ္ဘာ့ဖလားမှာ ချန်ပီယံဖြစ်နိုင်ပြီး ချန်ပီယံဖြစ်မယ်လို့ ရာနူန်းပြည့် ယုံကြည်ထားကြောင်းလည်း တိုက်စစ်မှူး ဝီလ်ဆင်က မှတ်ချက်ပေးသွားခဲ့ပါတယ်။
