အယ်လ်ဂျီးရီးယားဘောလုံးအဖွဲ့ချုပ်ဟာ ကင်မရွန်းနဲ့ ကစားခဲ့တဲ့ ကမ္ဘာ့ဖလားခြေစစ်ပွဲ ဒုတိယအကျော့ပွဲစဉ်ကို ပြန်ကစားခွင့်ပေးဖို့ ကမ္ဘာ့ဖလားလုံးအဖွဲ့ချုပ်(ဖီဖာ)ကို တောင်းဆိုထားပါတယ်။
အယ်လ်ဂျီးရီးယားဟာ ပထမအကျော့မှာ ၁ ဂိုး ဂိုးမရှိနဲ့ အနိုင်ရခဲ့ပေမယ့် ဒုတိယအကျော့မှာ ပြန်လည်ရှုံးနိမ့်ခဲ့ပါတယ်။ အချိန်ပိုဆက်ကစားခဲ့ရာမှာ ပွဲပြီးခါနီးနောက်ဆုံးမိနစ်မှာ အီကမ်ဘီက ကင်မရွန်းအတွက် အနိုင်ဂိုးသွင်းခဲ့တာကြောင့် အယ်လ်ဂျီးရီးယားအသင်းက ကမ္ဘာ့ဖလားနဲ့ လွဲချော်ခဲ့ရတာပါ။
အဲဒီပွဲစဉ်မှာ ဒိုင်လူကြီးရဲ့ ဘက်လက်မှုတွေရှိခဲ့ပြီး တိုက်စစ်မှူး ဆလီမန်နီသွင်းခဲ့တဲ့ ၂ ဂိုးကိုလည်း ခွင့်မပြုခဲ့တာကြောင့် ဒုတိယအကျော့ကို ပြန်ကစားပေးဖို့ တောင်းဆိုခဲ့တာပါ။
“ပွဲရလဒ်ကို ပြောင်းလဲစေနိုင်တဲ့ အငြင်းပွားဖွယ်ရာ ဆုံးဖြတ်ချက်တွေ ချမှတ်ခဲ့တဲ့အပေါ် ဘောလုံးအဖွဲ့ချုပ်အနေနဲ့ ဖီဖာကို တရားဝင် အယူခံတင်သွင်းသွားမှာပါ။
ဒုတိယအကျော့ပွဲစဉ်ကို ဘက်မလိုက်မှုနဲ့ရိုးသားမှုကို အာမခံနိုင်တဲ့ အခြေအနေအောက်မှာ ပြန်ကစားပေးဖို့အတွက် ဥပဒေပါ လုပ်ပိုင်ခွင့်တွေကို အသုံးပြုပြီးဖို့ ဆုံးဖြတ်ထားပါတယ်” လို့ အယ်ဂျီးရီးယားအသင်းရဲ့ ထုတ်ပြန်ချက်မှာပါရှိပါတယ်။
အယ်လ်ဂျီးရီးယားဘက်က ပွဲပြန်ကစားဖို့ တောင်းဆိုနေပေမယ့် ဖီဖာဘက်က အုပ်စုမဲခွဲမှုတွေ ပြုလုပ်ပြီးပါပြီ။ ကင်မရွန်းအသင်းက ဘရာဇီး၊ ဆားဘီး ယား၊ ဆွစ်ဇာလန် အသင်းတွေနဲ့ အုပ်စု G မှာ ကျရောက်ခဲ့ပါတယ်။
လီဗာပူးအသင်းဖော် ဆာလက်ကို ပြိုင်ပွဲ ၂ ကြိမ်စလုံးမှာ အနိုင်ရခဲ့တာက ကံကောင်းမှုကြောင့်ဖြစ်တယ်လို့ မာနေးက ပြောပါတယ်။
မာနေး ဦးဆောင်တဲ့ ဆီနီဂေါအသင်းဟာ အာဖရိကဖလားဗိုလ်လုပွဲမှာ ဆာလက် ဦးဆောင်တဲ့ အီဂျစ်ကို အနိုင်ရဗိုလ်စွဲခဲ့သလို ကမ္ဘာ့ဖလားခြေစစ်ပွဲမှာလည်း အနိုင်ရပြီး ခြေစစ်ပွဲ အောင်မြင်ခဲ့တာပါ။
မာနေးက “ကျနော်က ၂ ကြိမ်စလုံး အနိုင်ရပြီး သူက ၂ ကြိမ်စလုံး ရှုံးနိမ့်ခဲ့ရတယ်။ ကျနော်က ကံကောင်းခဲ့တာကြောင့် နိုင်ပွဲတွေ ရခဲ့တာပါ။ အာဖရိကဖလားချန်ပီယံဆုနဲ့ ကမ္ဘာ့ဖလားဝင်ခွင့် ရခဲ့တာတွေက ဂုဏ်ယူစရာကောင်းပြီး ကျနော်အမြဲတမ်း အိပ်မက်ခဲ့ရတဲ့အရာတွေပါ” လို့ ပြောပါတယ်။
ဆီနီဂေါအသင်းဟာ အီဂျစ်ကို ပင်နယ်တီ အဆုံးအဖြတ်နဲ့ အနိုင်ရခဲ့ပေမဲ့ အိမ်ရှင်ပရိသတ်တွေရဲ့ အားပေးမှုကတော့ အများရဲ့ဝေဖန်မှုတွေ ခံခဲ့ရပါတယ်။
ဆာလက် ပင်နယ်တီမကန်ခင်မှာ ဆီနီဂေါပရိသတ်တွေ လေဆာမီးတွေထိုးပြီး နှောင့်ယှက်ခဲ့သလို အီဂျစ်ကစားသမားတွေကိုလည်း လူမျိုးရေးခွဲခြားတဲ့ သင်္ကေတတွေနဲ့ လှောင်ပြောင်ခဲ့ကြတာပါ။
ဒါ့အပြင် ပွဲချိန်အတွင်းနဲ့ ပွဲအပြီးမှာလည်း အီဂျစ်ကစားသမားတွေကို ပုလင်းတွေ၊ ကျောက်ခဲတွေနဲ့ ပစ်ပေါက်ခဲ့ပြီး လုံခြုံရေးအကူအညီနဲ့ ကွင်းပြင်ကို ထွက်ခဲ့ရပါတယ်။
မာနေးနဲ့ ဆာလက်တို့ ၂ ဦးဟာ ပြိုင်ဘက်တွေအနေနဲ့ ယှဉ်ပြိုင်ခဲ့ရပြီး ရက်ပိုင်းအတွင်းမှာပဲ လီဗာပူးအသင်းမှာ ပြန်လည်တွဲဖက်ကစားရမှာ ဖြစ်ပါတယ်။
