ကမ္ဘာ့ဖလားဗိုလ်လုပွဲစဉ်ကို ဒိုင်တွေရဲ့ မှားယွင်းမှုကြောင့် ပြန်ကန်ပေးဖို့ တောင်းဆိုခဲ့တဲ့ ပြင်သစ်ပရိသတ်တွေကို ကွင်းလယ်ဒိုင်လူကြီး ဆီမွန်မာချီညက်က ပြန်လည်တုံ့ပြန်လိုက်ပါတယ်။
ပြင်သစ်ပရိသတ် နှစ်သိန်းကျော်ဟာ ဗိုလ်လုပွဲစဉ်ကို ပြန်ကန်ပေးဖို့ အွန်လိုင်းကနေ လက်မှတ်ရေးထိုး တောင်းဆိုခဲ့ပြီး အာဂျင်တီးနားရရှိခဲ့တဲ့ သွင်းဂိုး နှစ်ဂိုးဟာ ခွင့်မပြုသင့်တဲ့ ဂိုးတွေလို့လည်း ဆိုပါတယ်။
ပရိသတ်တွေအပြင် ပြင်သစ်မီဒီယာတချို့ကလည်း မက်ဆီရဲ့ အချိန်ပို သွင်းဂိုးမှာ ဂိုးမဝင်ခင် အရန်ခုံတန်းက ကစားသမား နှစ်ဦးက ကွင်းထဲကို ရောက်ရှိနေလို့ စည်းမျဉ်းအရ ဂိုးမပေးသင့်ဘူး လို့ ဖော်ပြခဲ့ကြတာပါ။
ဘောလုံး ဥပဒေ(၃)၊ အပိုဒ်(၉)မှာ ဂိုးသွင်းနေချိန်မှာ အပြင်က လူ တစ်ဦးဦးက ကွင်းထဲဝင်နေမယ်ဆိုရင် သွင်းဂိုးကို ခွင့်မပြုဘဲ အလွတ်တည်ကန်ဘောသာပေးရမယ်လို့ ပါရှိကြောင်း ပြင်သစ်သတင်းစာ L’Equipe က ထောက်ပြခဲ့တာပါ။
ဗိုလ်လုပွဲကို ကိုင်တွယ်ခဲ့တဲ့ ပိုလန်ဒိုင်လူကြီး မာချီညက်ကတော့ အမ်ဘာပေဂိုး သွင်းနေချိန်မှာ အရန်ခုံတန်းက ပြင်သစ်ကစားသမား ၇ ဦးအထိ ကွင်းထဲဝင်ရောက်နေကြောင်း ဖုန်းထဲက ဓာတ်ပုံ သက်သေနဲ့တကွ ပြန်လည်တုံ့ပြန်ခဲ့တာဖြစ်ပါတယ်။
ရီးရဲလ်မက်ဒရစ်အသင်းနဲ့အတူ ခြေစွမ်းပွဲမှာပါဝင်ကစားခဲ့တဲ့ တိုက်စစ်မှူး ဘင်ဇီမာဟာ ပြင်သစ် အသင်းနဲ့ ပူးပေါင်းဖို့မရှိတော့ဘူးလို့ သိရပါတယ်။
ပြင်သစ်တိုက်စစ်မှူးဟာ ဒဏ်ရာပြဿနာကြောင့် ပြိုင်ပွဲအစမှာပဲ အသင်းလူစာရင်းကနေ နုတ်ထွက်ခဲ့ရတာပါ။
သောကြောနေ့က ကစားခဲ့တဲ့ လီဟီနက်ဇ်နဲ့ ခြေစမ်းပွဲမှာ ဘင်ဇီမာက အသင်းခေါင်းဆောင်လက်ပတ်ဝတ်ဆင်ပြီး ပါဝင်ကစားခဲ့ပါတယ်။
ဒါကြောင့် တနင်္ဂနွေနေ့မှာကစားမယ့် ကမ္ဘာ့ဖလားဗိုလ်လုပွဲမှာ ဘင်ဇီမာကို တွေ့မြင့်ရဖို့မရှိတော့ဘဲ ရီးရဲလ်အသင်းကလည်း ပြန်လည်စေလွှတ်ခြင်းမပြုတာဖြစ်နိုင်တယ်လို့ သုံးသပ်ကြပါတယ်။
ဘင်ဇီမာဟာ ပြင်သစ်အသင်းရဲ့ ၂၆ ဦးစာရင်းမှာ ပါဝင်နေဆဲဖြစ်ပြီး ဗိုလ်လုပွဲမှာ ပါဝင်ကစားခွင့်ရှိနေတာပါ။
နည်းပြ ဒစ်ရှ်ရွှန့်ကတော့ ဘင်ဇီမာကို ပြန်ခေါ်မလားဆိုတဲ့မေးခွန်းနဲ့ ပတ်သက်ပြီး မဖြေလိုကြောင်းနဲ့ နောက်ထပ်မေးခွန်းသာမေးဖို့ မေတ္တာရပ်ခံသွားခဲ့ပါတယ်။
