လာမယ့် ၂၀၂၅ ခုနှစ်ကစတင်ပြီး ကလပ်ကမ္ဘာ့ဖလားပြိုင်ပွဲကို အသင်းအရေအတွက် ၃၂ သင်း အထိတိုးမြှင့်ကျင်းပမယ့်အပေါ် အင်္ဂလန်နောက်ခံလူဟောင်းကာရေဂါကဝေဖန်ပါတယ်။
ဖီဖာဟာ ကလပ်ကမ္ဘာ့ဖလားပြိုင်ပွဲကို လက်ရှိအချိန်မှာ အသင်း ၇ သင်းနဲ့ ကျင်းပနေတာဖြစ်ပါတယ်။
၂၀၂၅ ခုနှစ်ကနေစတင်ပြီး ၄ နှစ်တစ်ကြိမ်ကျင်းပမယ့် ဖီဖာရဲ့အစီအစဉ်ဟာ ကမ္ဘာ့ဖလားပြိုင်ပွဲကို ၂ နှစ်တစ်ကြိမ် ကျင်းပမယ်ဆိုတဲ့ စိတ်ကူးလိုပဲ အဓိပ္ပါယ်မရှိတဲ့အစီအစဉ်ဖြစ်ကြောင်း ကာရေဂါက အပြင်းအထန်ဝေဖန်ခဲ့တာပါ။
ကလပ်အသင်း ၃၂ သင်းအထိ တိုးမြှင့်ကျင်းပမယ့်အစီအစဉ်ဟာ ကစားသမားတွေကို တိရစ္ဆာန်တွေလို သဘောထားတာဖြစ်ပြီး သူတို့အတွက် အလွန်အမင်း ပွဲပန်းစေနိုင်လို့ ဥရောပထိပ်တန်းအသင်းတွေဘက်က သပိတ်မှောက်ကြဖို့ ကာရေဂါကတိုက်တွန်းသွားပါတယ်။
ယီမင်နိုင်ငံက ဟူသီသူပုန်တွေရဲ့ ဒုံးကျည်ရန်ရှိပေမယ့် ဖီဖာကလပ်ကမ္ဘာ့ဖလားပြိုင်ပွဲကို ယူအေအီး နိုင်ငံမှာ ဆက်ပြီးကျင်းပဖို့ ဖီဖာက ဆုံးဖြတ်ခဲ့ပါတယ်။
ဖီဖာကလပ် ကမ္ဘာ့ဖလားပြိုင်ပွဲကို တိုက်ကြီးတွေအလိုက် ကလပ်ချန်ပီယံ ၇ သင်းက လာမယ့်ဖေဖော်ဝါရီလအတွင်း ယှဉ်ပြိုင်ကြရမှာပါ။
လက်ခံကျင်းပမယ့် ယူအေအီးနိုင်ငံ ဒူဘိုင်းမြို့အနီးမှာ ပြီးခဲ့တဲ့တစ်ပတ်က ဒုံးကျည် ၂ လုံး ကျရောက်ပေါက်ကွဲခဲ့ပြီး အရပ်သား ၃ ဦး သေဆုံးခဲ့ပါတယ်။
ဒီအခြေအနေကြောင့် ဖီဖာကမ္ဘာ့ကလပ်ပြိုင်ပွဲကို ရွှေ့ဆိုင်းတာပဲဖြစ်ဖြစ်၊ အိမ်ရှင်နိုင်ငံ ကျင်းပတာပဲဖြစ်ဖြစ် လုပ်ဆောင်ဖို့ ကနဦးစဉ်းစားထားခဲ့တာပါ။
လက်ရှိအချိန်မှာတော့ စီစဉ်ထားတဲ့အတိုင်း ဖေဖော်ဝါရီ ၃ ရက်ကနေ ၁၂ ရက်အထိ ဆက်လက်ကျင်းပမှာဖြစ်ပြီး ယူအေအီးနိုင်ငံက လုံခြုံရေးတာဝန်ရှိသူတွေနဲ့ အနီးကပ်ပူးပေါင်းလုပ်ဆောင်သွားမယ်လို့ ဖီဖာက ထုတ်ပြန်ပါတယ်။
ဖီဖာကလပ်ကမ္ဘာ့ဖလားပြိုင်ပွဲကို ဥရောပချန်ပီယံ ချဲလ်ဆီးအသင်းလည်း လာရောက်ယှဉ်ပြိုင်ရမှာဖြစ်ပါတယ်။
ယီမင်က ဟူသီသူပုန်တွေဟာ ယူအေအီးကို တိုက်ခိုက်သွားမယ်လို့ ကြုံးဝါးထားပြီး ဒူဘိုင်းမှာကျင်းပမယ့် ကလပ်ကမ္ဘာ့ဖလားပြိုင်ပွဲက စိုးရိမ်စရာဖြစ်လာခဲ့ရပါတယ်။
