မန်ယူနိုက်တက် တိုက်စစ်မှူးဟောင်း ကာဗာနီဟာ အီတလီစီးရီးအေ တန်းတက်ကလပ် မွန်ဇာအသင်းဆီ ပြောင်းရွှေ့ဖို့ ဆွေးနွေးနေပါတယ်။

အသက် ၃၅ နှစ်ရှိ ဥရုဂွေးတိုက်စစ်မှူးဟာ မနှစ်ကအထိ မန်ယူအသင်းမှာ ကစားခဲ့ပြီး စာချုပ်သက်တမ်း ကုန်ဆုံးခဲ့တာကြောင့် အသင်းလက်မဲ့ ဖြစ်နေတာပါ။

လက်ရှိအချိန်မှာတော့ အီတလီစီးရီးအေကို ပြန်သွားဖို့ရှိနေပြီး တန်းတက်ကလပ် မွန်ဇာအသင်းက ခေါ်ယူဖို့ ဆွေးနွေးမှုတွေ ပြုလုပ်နေတယ်လို့ စကိုင်းစပေါ့အီတလီယာက ဖော်ပြပါတယ်။

မွန်ဇာအသင်းဟာ မနှစ်က စီးရီးဘီမှာ အဆင့် ၄ ပဲ ရခဲ့ပေမဲ့ ပလေးအော့ဖ်အဆင့်တွေမှာ အနိုင်ရခဲ့လို့ ပထမဆုံးအကြိမ် အီတလီ အမြင့်ဆုံးလိဂ်မှာ ယှဉ်ပြိုင်ခွင့်ရတော့မှာပါ။

ကာဗာနီကိုခေါ်ယူဖို့ လုပ်ဆောင်နေတဲ့အကြောင်း မွန်ဇာအသင်း ဒါရိုက်တာ ဂယ်လီယန်နီက အတည်ပြုထားပြီး အပြီးသတ်ဆွေးနွေးမှုတွေ ဆက်လက်လုပ်ဆောင်နေပါတယ်။

ကာဗာနီဟာ အီတလီကလပ်တွေဖြစ်တဲ့ ပါလာမိုနဲ့ နာပိုလီအသင်းတွေမှာ ပွဲပေါင်း ၁၅ဝ ကျော် ကစားခဲ့ပြီး ဂိုး ၁၀၀ ကျော် သွင်းယူခဲ့ပါတယ်။

အခုနှစ်ရာသီမှာ မန်ယူအသင်းကို ပိုပြီးကူညီချင်ခဲ့ပေမဲ့ မစွမ်းဆောင်နိုင်ခဲ့ကြောင်း အသင်းကနေ ထွက်ခွာသွားတဲ့ တိုက်စစ်မှူး ကာဗာနီက ပြောပါတယ်။ 

ဥရုဂွေးတိုက်စစ်မှူး ကာဗာနီဟာ မန်ယူအသင်းနဲ့ ပထမဆုံးရာသီမှာ ၁၇ ဂိုး အထိသွင်းပြီး ခြေစွမ်းပြနိုင်ခဲ့ပေမယ့် ပြီးခဲ့တဲ့ရာသီမှာ ၂ ဂိုးသာသွင်းယူနိုင်ခဲ့ပါတယ်။ 

အသင်းနဲ့ စာချုပ်သက်တမ်းကုန်ဆုံးခဲ့တာကြောင့် ထွက်ခွာသွားတဲ့ ကာဗာနီဟာ ယူနိုက်တက်အသင်းကို နှုတ်ဆက် စကားပြောကြားရာမှာ ပိုပြီးကူညီချင်ခဲ့ကြောင်း ထည့်သွင်းပြောသွားတာပါ။ 

“ကျနော် စတင်ရောက်ရှိတဲ့အချိန်ကစပြီး ပရိသတ်တွေရဲ့အားပေးမှုတွေက လေးစားစရာကောင်းပါတယ်။ ကျနော့်အနေနဲ့လည်း အကောင်းဆုံးပေးဆပ်ကစားခဲ့တယ်။ ဒါတွေကြောင့် အသင်းကနေ ထွက်ခွာရပေမယ့် ပျော်ရွှင် စရာကောင်းတဲ့ အမှတ်တရာတွေကျန်ခဲ့တယ်။ ဒီရာသီမှာ ကျနော့်အနေနဲ့ပိုပြီး ပါဝင်ကူညီချင်ခဲ့ပေမယ့် ပြီးခဲ့တဲ့ရာသီကလောက် မစွမ်းဆောင်နိုင်ခဲ့ပါဘူး” လို့ ကာဗာနီကပြောပါတယ်။ 

မန်ယူအသင်းမှာ ကာဗာနီအပါအဝင် ကွင်းလယ်လူ မာတစ်နဲ့ ဂိုးသမား လီးဂရန့် တို့ဟာလည်း စာချုပ်သက်တမ်း ကုန်ဆုံးခဲ့တာကြောင့် အသင်းကနေ ထွက်ခွာသွားပါတယ်။ 

ဒါ့အပြင် ကွင်းလယ်လူ မာတာ၊ ပေါ့ဘာ နဲ့ လင်ဂတ်တို့ဟာလည်း မကြာခင်မှာ  အသင်းနဲ့ တရားဝင်လမ်းခွဲသွားဖို့ရှိနေပါတယ်။