ကွန်ဂိုဒီမိုကရက်တစ်သမ္မတနိုင်ငံ အရှေ့ပိုင်းရှိ မြို့တော် ဂိုမာအပြင်ဘက်က စစ်ဘေးရှောင်ပြည်သူ ထောင်သောင်းချီပြီး နေထိုင်နေတဲ့ ယာယီစခန်းမှာ အမိုးအကာနဲ့ မိလ္လာမသန့်ရှင်းမှုကြောင့် ကာလဝမ်းရောဂါ ပျံ့နှံ့နေတယ်လို့ နယ်စည်းမခြား ဆရာဝန်များအဖွဲ့ (MSF) က ပြောပါတယ်။

စစ်ဘေးရှောင်ပြည်သူတွေ ရောက်ရှိလာမှု ဒုတိယလှိုင်းနဲ့အတူ ကာလဝမ်းရောဂါဖြစ်ပွားမှု အနည်းငယ်ကို စာရင်းပြုစုထားကြောင်း၊ ရွှေ့ပြောင်းနေထိုင်သူတွေရဲ့ နေရာအသီးသီးမှာ ဝမ်းပျက်ဝမ်းလျှော ဖြစ်ပွားမှုတွေ ရှိနေကြောင်းနဲ့ MSF အနေနဲ့ စုံစမ်းစစ်ဆေးမှုတွေ ပြုလုပ်ခဲ့ပြီး ကာလဝမ်းရောဂါ ဖြစ်ပွားနေကြောင်း အတည်ပြုခဲ့ပြီလို့ MSF ကာလဝမ်းရောဂါ ကုသရေးဌာန အကြီးအကဲ ဒေါက်တာ ဘီရှီကွာဘို အီရန့်ဂျ်က ပြောပါတယ်။

ဂိုမာမြို့ ဆင်ခြေဖုံးရှိ မူဂီးစခန်းမှာ ကာလဝမ်းရောဂါ ကုသရေးစင်တာအသစ်ကို အန်ဂျီအို အဖွဲ့ဖြစ်တဲ့ နယ်စည်းမခြား ဆရာဝန်များအဖွဲ့ (MSF) က နိုဝင်ဘာ ၂၆ ရက်ကတည်းက ဖွင့်လှစ်ထားတာဖြစ်ပြီး လက်ရှိ လူနာ ၂၅၀ ကျော်ကို လက်ခံထားကြောင်း ကာလဝမ်းရောဂါ ကုသရေးစင်တာအသစ်ရဲ့ ဒါရိုက်တာ အီရန့်ဂျ်က ဆိုပါတယ်။

စခန်းကနေလာတဲ့ လူနာအားလုံးကို မဆန့်နိုင်လို့ ပိုကြီးတဲ့ ယူနစ်တခု ဖန်တီးဖို့ တာဝန်ရှိတယ်လို့လည်း ပြောပါတယ်။

MSF မှာ ရန်ပုံငွေ အလုံအလောက်ရှိတယ်လို့ မပြောနိုင်ပေမဲ့ ဆေးဘက်ဆိုင်ရာကဏ္ဍကို ကျော်လွန်ပြီး ကိုင်တွယ်ဖြေရှင်းဖို့ လုံလောက်တဲ့ပမာဏ ကျန်နေပါသေးတယ်လို့လည်း ဆိုပါတယ်။

သူတို့မှာ ရေတင်ကားတွေရှိပြီး ရေဖြန့်ဖြူးရေး နေရာတွေလည်း ရှိကြောင်းနဲ့ ပြည်တွင်းရွှေ့ပြောင်းနေထိုင်သူတွေရဲ့ အိုင်ဒီပီစခန်းတွေမှာ ယင်လုံအိမ်သာအရေအတွက်ကို ဘယ်လိုများအောင် ထားရမလဲဆိုတာ စဉ်းစားနေကြောင်းနဲ့ ဒါကိုဖြေရှင်းဖို့တော့ မတတ်နိုင်ကြောင်းလည်း ပြောသွားပါတယ်။

ကာလဝမ်းရောဂါပြန်လည်ဖြစ်ပွားလာတဲ့ ဟေတီနိုင်ငံရဲ့ မြို့တော်မှာ နယ်စည်းမခြား ဆရာဝန်များအဖွဲ့ (MSF) က ရောဂါကုသရေးဌာနတွေဖွင့်လှစ်ခဲ့ပြီး အရေးပေါ်တုံ့ပြန်မှုတရပ်ကို ပံ့ပိုးပေးပါတယ်။

အုပ်စုဖွဲ့ ပိတ်ဆို့တာတွေကြောင့် လောင်စာဆီနဲ့ သန့်ရှင်းတဲ့ သောက်သုံးရေ ပြတ်လပ်နေတဲ့ နိုင်ငံအတွင်း ကာလဝမ်းရောဂါ ဖြစ်ပွားမှု တိုးလာနေတာပါ။

လူသားချင်းစာနာထောက်ထားမှု အဖွဲ့အစည်းဟာ ဆစ်ဆိုလေမြို့ MSF ဆေးရုံမှာ ကာလဝမ်းရောဂါ ကုသရေးစင်တာကို ဖွင့်လှစ်ခဲ့ပြီး ရေဓာတ်ပြန်ဖြည့်တင်းဖို့နဲ့ ဆေးဝါးကုသပေးဖို့ ဆောင်ရွက်နေပါတယ်။ 

ကာလဝမ်းရောဂါ စတင်ဖြစ်ပွားချိန်ကစပြီး တရက်ကို လူနာ အယောက် ၄၀ လောက် ကုသရေးစင်တာမှာ လက်ခံကုသပေးနေရတယ်လို့ ဟေတီနိုင်ငံမှာရှိတဲ့ MSF ရဲ့ ဆက်သွယ်ရေးမန်နေဂျာ အဲလက်စ် မားကူက အောက်တိုဘာ ၁၅ ရက်မှာ ပြောပါတယ်။

“စုစုပေါင်း လူနာ ၂၀၀ လောက် လက်ခံထားနိုင်တယ်၊ သူတို့ရဲ့ လိုအပ်ချက်တွေကို ကုသပေးနိုင်ဖို့ ရွက်ဖျင်တဲ ကိုးခု တပ်ဆင်ထားပါတယ်” လို့ သူက ဆက်ပြောပါတယ်။

အောက်တိုဘာ ၉ ရက်အထိ ဟေတီမှာ နောက်ဆုံး ကာလဝမ်း ရောဂါကြောင့် သေဆုံးသူ ၁၈ ဦး ရှိခဲ့တယ်လို့  Pan American ကျန်းမာရေးအဖွဲ့ (PAHOက အတည်ပြုခဲ့ပါတယ်။