ကာလဝမ်းရောဂါပြန်လည်ဖြစ်ပွားသည့် ဟေတီတွင် MSF က ရောဂါကုသရေးဌာနများ ဖွင့်လှစ်

ကာလဝမ်းရောဂါပြန်လည်ဖြစ်ပွားလာတဲ့ ဟေတီနိုင်ငံရဲ့ မြို့တော်မှာ နယ်စည်းမခြား ဆရာဝန်များအဖွဲ့ (MSF) က ရောဂါကုသရေးဌာနတွေဖွင့်လှစ်ခဲ့ပြီး အရေးပေါ်တုံ့ပြန်မှုတရပ်ကို ပံ့ပိုးပေးပါတယ်။
အုပ်စုဖွဲ့ ပိတ်ဆို့တာတွေကြောင့် လောင်စာဆီနဲ့ သန့်ရှင်းတဲ့ သောက်သုံးရေ ပြတ်လပ်နေတဲ့ နိုင်ငံအတွင်း ကာလဝမ်းရောဂါ ဖြစ်ပွားမှု တိုးလာနေတာပါ။
လူသားချင်းစာနာထောက်ထားမှု အဖွဲ့အစည်းဟာ ဆစ်ဆိုလေမြို့ MSF ဆေးရုံမှာ ကာလဝမ်းရောဂါ ကုသရေးစင်တာကို ဖွင့်လှစ်ခဲ့ပြီး ရေဓာတ်ပြန်ဖြည့်တင်းဖို့နဲ့ ဆေးဝါးကုသပေးဖို့ ဆောင်ရွက်နေပါတယ်။
ကာလဝမ်းရောဂါ စတင်ဖြစ်ပွားချိန်ကစပြီး တရက်ကို လူနာ အယောက် ၄၀ လောက် ကုသရေးစင်တာမှာ လက်ခံကုသပေးနေရတယ်လို့ ဟေတီနိုင်ငံမှာရှိတဲ့ MSF ရဲ့ ဆက်သွယ်ရေးမန်နေဂျာ အဲလက်စ် မားကူက အောက်တိုဘာ ၁၅ ရက်မှာ ပြောပါတယ်။
“စုစုပေါင်း လူနာ ၂၀၀ လောက် လက်ခံထားနိုင်တယ်၊ သူတို့ရဲ့ လိုအပ်ချက်တွေကို ကုသပေးနိုင်ဖို့ ရွက်ဖျင်တဲ ကိုးခု တပ်ဆင်ထားပါတယ်” လို့ သူက ဆက်ပြောပါတယ်။
အောက်တိုဘာ ၉ ရက်အထိ ဟေတီမှာ နောက်ဆုံး ကာလဝမ်း ရောဂါကြောင့် သေဆုံးသူ ၁၈ ဦး ရှိခဲ့တယ်လို့ Pan American ကျန်းမာရေးအဖွဲ့ (PAHOက အတည်ပြုခဲ့ပါတယ်။