ကိုယ်ဝန်ဖျက်ချခွင့်အပေါ် အကာအကွယ်ပေးနိုင်ဖို့ တိုက်ပွဲဝင်ရမယ်လို့ အမေရိကန်သမ္မတ ဂျိုးဘိုင်ဒင်က မတ် ၂၂ ရက်နေ့က အမျိုးသမီးများသမိုင်းဆိုင်ရာလအတွက် အခမ်းအနားတစ်ခုမှာ စည်းရုံးပြောဆိုခဲ့ပါတယ်။
ဒီအခမ်အနားအတွင်း မျိုးဆက်ပြန့်ပွားရေးဆိုင်ရာ အခွင့်အရေးတွေအတွက် အကာအကွယ်ပေးဖို့ တိုက်ပွဲဝင်ရာမှာ ဦးဆောင်ခဲ့တဲ့ ဒုသမ္မတ ကမယ်လာဟားရစ်အပေါ် ကျေးဇူးတင်ကြောင်းလည်း သမ္မတဘိုင်ဒင်က လူသိရှင်ကြား ပြောဆိုခဲ့ပါတယ်။
လွန်ခဲ့တဲ့နှစ်မှာ အမေရိကန် တရားရုံးချုပ်က ကိုယ်ဝန်ဖျက်ချခွင့်အပေါ် ဖွဲ့စည်းပုံအခြေခံ ဥပဒေအရ အာမခံချက်ပေးခဲ့တဲ့ သမိုင်းဝင် အလှည့်အပြောင်း ဖြစ်ရပ်အပြီးမှာ ဒီကိစ္စအတွက် အပေးအယူလုပ် ညှိနှိုင်းခဲ့ရပါသေးတယ်။
အမေရိကန်နိုင်ငံတဝန်း လိင်ပြောင်းထားသူတွေအပေါ် ပစ်မှတ်ထားတဲ့ အမုန်းပွားစရာ ဥပဒေတွေကို ဘိုင်ဒင်က ရှုတ်ချ ပြောဆိုခဲ့ပြီး LGBT တွေရဲ့ အခွင့်အရေးအပေါ် အကာအကွယ် ပေးနိုင်မယ့် တန်းတူညီမျှရေးဥပဒေကို လွှတ်တော်အနေနဲ့ အတည်ပြုပေးဖို့ တောင်းဆိုခဲ့ပါတယ်။
အာကန်ဆက်စ် ပြည်နယ်အုပ်ချုပ်ရေးမှူး ဆာရာ ဟက်ကဘီးဆန်းဒါးစ်က လိင်ပြောင်း လူမှုအသိုင်းအဝိုင်းအပေါ် ပစ်မှတ်ထားတဲ့ ဥပဒေတစ်ရပ်ကို မတ် ၂၁ ရက်မှာ လက်မှတ်ရေးထိုး ခဲ့ပြီး ဒီဥပဒေဟာ အများပြည်သူစာသင်ကျောင်းတွေမှာ လိင်ပြောင်းထားသူတွေအနေနဲ့ သူတို့ရဲ့ လိင်စိတ်ခံယူမှုနဲ့ ကိုက်ညီတဲ့ သန့်စင်ခန်း အသုံးပြုမှုကို တားမြစ် ပိတ်ပင်လိုက်တာပါ။
လိင်ပြောင်းလူငယ်တွေအပေါ် တိုက်ရိုက်ရည်ရွယ်တဲ့ အလားတူဥပဒေမျိုးကို အလာဘားမားနဲ့ အိုကလာဟိုးမား ပြည်နယ်တွေမှာလည်း ပြဋ္ဌာန်းထားပါတယ်။
အမေရိကန် နိုင်ငံအနှံ့အပြားက ရီပတ်ဘလီကန် ပါတီဝင် ဥပဒေပြုအမတ်တွေဟာ လိင်ပြောင်း လူငယ်တွေအတွက် ကျန်မာရေးစောင့်ရှောက်မှုတချို့အပေါ် ပိတ်ပင်တားမြစ်မယ့် လှုပ်ရှား မှုတစ်ရပ်ကို အရှိန်မြှင့်လုပ်ဆောင်ခဲ့ကြပါတယ်။
တချို့ကိစ္စရပ်တွေမှာ မိဘဖြစ်သူနဲ့ ဆရာဝန်တွေက ကုသမှု ထောက်ပံ့ပေးခဲ့ရင် ကလေးသူငယ်ညှဉ်းပန်းမှုအဖြစ် တရားစွဲနိုင်ဖို့ ရီပတ်ဘလီကန်တွေဘက်က ကြိုးပမ်း ပေးနေပါတယ်။
အမေရိကန်ပြည်ထောင်စု တရားလွှတ်တော်ချုပ် တွဲဖက်တရားရေးအရာရှိ ဘရက်ဒ် ကာဗနောကို ခြိမ်းခြောက်တဲ့ လက်နက်ကိုင်အမျိုးသားတဦးကို ကွန်ဆာဗေးတစ် အမေရိကန် တရားရုံးချုပ် တရားသူကြီးရဲ့ မေရီလန်းနေအိမ်အနီးမှာ ဇွန် ၈ ရက် အစောပိုင်းက ဖမ်းဆီးလိုက်တယ်လို့ တရားရုံး ပြောရေးဆိုခွင့်ရှိသူတဦးက ပြောပါတယ်။
အဲဒီနေရာဟာ မကြာသေးမီ သီတင်းပတ်တွေအတွင်း ကိုယ်ဝန်ဖျက်ချခွင့်အရေး ထောက်ခံသူတွေရဲ့ ဆန္ဒပြပွဲတွေ ပြုလုပ်တဲ့နေရာလည်း ဖြစ်ပါတယ်။
အဲဒီအမျိုးသားကို ဝါရှင်တန်မြို့ ဆင်ခြေဖုံးရှိ မွန့်ဂိုမာရီကောင်တီရှိ ရဲဌာနတခုကို ပို့ဆောင်ခဲ့ကြောင်း တရားရုံး ပြောရေးဆိုခွင့်ရှိသူ ပက်ထရစ်ရှာ မက်ကေ့ဘ်က ပြောပါတယ်။ အဲဒီလူ ဘယ်သူဆိုတာကိုတော့ မက်ကေ့ဘ်က မဖော်ထုတ်ခဲ့ပါဘူး။
ဝါရှင်တန်ပို့စ်သတင်းစာမှာတော့ အဲဒီသူဟာ အသက် ၂၀ ဝန်းကျင်ရှိပြီး စီရင်ချက်မူကြမ်းအပေါ် ဒေါသထွက်နေတယ်လို့ ဆိုပါတယ်။
နိုင်ငံတဝန်း တရားဝင် ကိုယ်ဝန်ဖျက်ချခွင့်ဖြစ်တဲ့ အထင်ကရ 1973 Roe v. Wade ဆုံးဖြတ်ချက်ကို ဖျက်သိမ်းပစ်ဖို့ တရားရုံးရဲ့ ကွန်ဆာဗေးတစ်အများစုက ပြင်ဆင်နေကြောင်း သတင်းပေါက်ကြားခဲ့ပြီး မေ ၂ ရက်မှာ စီရင်ချက်မူကြမ်းကို ထုတ်ပြန်ခဲ့ပါတယ်။
အဲဒီအချိန်ကတည်းက ကိုယ်ဝန်ဖျက်ချခွင့်ကို ထောက်ခံသူတွေဟာ ကာဗနောရဲ့နေအိမ်နဲ့ တခြား တရားသူကြီး ၂ ယောက်ရဲ့နေအိမ်တွေ အပြင်ဘက်မှာ ဆန္ဒပြပွဲတွေ ပြုလုပ်ခဲ့ကြပြီး တရားရုံးအပြင်ဘက်မှာလည်း စုဝေးခဲ့ကြပါတယ်။
ပေါက်ကြားလာတဲ့ သဘောထားမူကြမ်းကြောင့် တရားရုံးချုပ် တရားသူကြီးတွေအတွက် လုံခြုံရေး တိုးမြှင့်ထားတယ်လို့ အမေရိကန် တရားရေးဌာနက မေ ၁၁ ရက်မှာ ပြောပါတယ်။
တရားရုံးရဲ့ ရှိပြီးသား ရဲတပ်ဖွဲ့ကို ပံ့ပိုးကူညီမှုတွေ ထပ်ဆောင်းပေးဖို့ အမေရိကန်ရှေ့နေချုပ် မားရစ်ခ် ဂါလန်းဒ်က US Marshals Service ကို ညွှန်ကြားထားပါတယ်။
