ကိုလံဘီယာ အမျိုးသားရဲတပ်ဖွဲ့ဟာ FARC သူပုန်အဖွဲ့ပိုင်ဆိုင်တဲ့ သေနတ်တွေ၊ လက်ပစ်ဗုံးတွေနဲ့ စက်သေနတ်တလက် အပါအဝင် လက်နက်တိုက်တခုကို သိမ်းဆည်းခဲ့ကြောင်း ဇန်နဝါရီ ၁၆ ရက်က ပြောပါတယ်။

ကိုလံဘီယာနိုင်ငံ အနောက်တောင်ပိုင်း၊ နာရီနိုပြည်နယ်မှာ စွန့်ပစ်ထားတဲ့ မော်တော်ယာဉ် ၂ စီးထဲမှာ တွေ့ရှိရတဲ့ သေနတ် ၃၃ လက်၊ M-60 စက်သေနတ်တလက်၊ လက်ပစ်ဗုံးတွေ၊ ကျည်ဆန် ၃၀၀၀၀ ကျော်နဲ့ ယူနီဖောင်းတွေကို သိမ်းဆည်းသယ်လာခဲ့ကြတာပါ။

ကိုလံဘီယာရဲတပ်ဖွဲ့ အထွေထွေညွှန်ကြားရေးမှူး ဟင်နရီ အာမန်ဒို ဆာနာဘရီယာက “အခုသိမ်းဆည်းရမိတဲ့ လက်နက်တွေဟာ လတ်တလောနှစ်တွေအတွင်းမှာ အရေးကြီးဆုံး ထိုးနှက်ချက်တခုဖြစ်ပြီး ဒီလက်နက်တွေကလည်း အသုံးပြုဖို့ ပြည့်ပြည့်စုံစုံ တပ်ဆင်ထားတဲ့ ပစ္စည်းတွေဖြစ်တယ်” လို့ သတင်းထောက်တွေကို ပြောပါတယ်။

အဆိုပါ သေနတ်တွေဟာ အမေရိကန်၊ အစ္စရေးနဲ့ ရုရှားနိုင်ငံတွေမှာ ထုတ်လုပ်တဲ့ သေနတ်တွေ ဖြစ်ပါတယ်။

ဒီလက်နက်တိုက်ကိစ္စဟာ  FARC အဖွဲ့နဲ့ အစိုးရအကြား လက်မှတ်ရေးထိုးထားတဲ့ ၂၀၁၆ ငြိမ်းချမ်းရေးသဘောတူညီချက်ကို ချိုးဖောက်မှုရှိမရှိဆိုတာကို သတ်မှတ်ဆုံးဖြတ်ဖို့ အစိုးရအပေါ်မှာပဲ မူတည်နေတယ်လို့ ဆာနာဘရီယာက ပြောပါတယ်။

ငြိမ်းချမ်းရေးဖော်ဆောင်ဖို့ ဒါမှမဟုတ် လက်နက်ချဖို့ ကတိပြုထားတဲ့ လက်ဝဲသမ္မတ ဂူစတာဗို ပေဒရို အစိုးရဟာ လတ်တလောမှာ ကိုလံဘီယာ လက်နက်ကိုင်အဖွဲ့တွေနဲ့ အပစ်အခတ်ရပ်စဲရေး  သဘောတူထားကြတာ ဖြစ်ပါတယ်။

အမေဇုန်မှာ တရားမဝင်ရွှေတူးဖော်နေတဲ့ သောင်တူးစက် ၇ ခုကို ထိန်းချုပ်စက်နဲ့ ဖောက်ခွဲပစ်လိုက်တယ်လို့ ကိုလံဘီယာရဲတပ်ဖွဲ့က ထုတ်ပြန်ပါတယ်။

ဒီ တရားမဝင် ရွှေတူးဖော်တဲ့ဖောင်တွေဟာ အိမ်နီးချင်း ဘရာဇီးနိုင်ငံမှ လာကြောင်း၊ သူတို့ ဝင်ရောက်မှုကို ဂြိုဟ်တုကနေ စောင့်ကြည့်ပြီးတော့ ကိုလံဘီယာ အမျိုးသားလေတပ်မှ ပံ့ပိုးပေးထားတဲ့ ဓာတ်ပုံတွေကတဆင့် အတည်ပြုခဲ့ကြောင်း အမျိုးသားရဲတပ်ဖွဲ့ရဲ့ နယ်ခြားစောင့်တပ်နဲ့ သဘာဝပတ်ဝန်းကျင် ထိန်းသိမ်းရေးရဲ့ ညွှန်ကြားရေးမှူး ဗိုလ်မှူးကြီး ဝီလျံ ကက်စတာနိုက ပြောပါတယ်။

အိမ်နီးချင်း ဘရာဇီးလ်စတိုင် နဂါးတွေလို့ လူသိများတဲ့ ဒရာဂါစ် ရွှေတူးဖော်ရေးဖောင်တွေနဲ့ ရွှေသောင်တူးစက်တွေကြောင့် အမေဇုန်သစ်တော နယ်မြေကြီးမှာရှိတဲ့ ရေလက်တက်တွေ ပျက်စီးပြီး ဂေဟစနစ်ကို ထိခိုက်စေတယ်လို့ ဆိုပါတယ်။

ရာဇဝတ်ဂိုဏ်းပေါင်းစုံဟာ ဒီ တရားမဝင် လုပ်ဆောင်မှုတွေကနေ အကျိုးအမြတ်တွေ ရနေကြပေမဲ့ ကိုလံဘီယာရဲ့ ဂေဟစနစ်ကို ဆိုးဆိုးရွားရွား ထိခိုက်စေတယ်လို့လည်း ဆိုပါတယ်။

စုဆောင်းထားတဲ့ အချက်အလက်တွေအရ မိုင်းတွင်းလုပ်သားတွေဟာ သူတို့ထုတ်ယူလိုက်တဲ့ ရွှေ ၁ ဂရမ်စီအတွက် ပြဒါး ၅ ဂရမ်မှ ၇ ဂရမ်ကြား မြစ်ထဲကို လောင်းချတာကြောင့် ပူးရေးမြစ်နဲ့ ကော်သူးဟေးမြစ်တွေရဲ့ ရေလက်တက်တွေအနီးက ဂေဟစနစ်တွေနဲ့ ဒေသခံနေထိုင်သူတွေကို ဆိုးဆိုးရွားရွား ထိခိုက်စေတာ တွေ့ရှိရကြောင်း ပြောပါတယ်။