အစိုးရဆီ လက်နက်ချတဲ့ အခြေအနေတွေကို လိုက်နာပြီး မူးယစ်ကုန်သွယ်မှုကနေ ထွက်ခွာလိုက်တဲ့ မူးယစ်ဆေးဝါး မှောင်ခိုသမားတွေကို ပြည်ပမှာ တရားရင်ဆိုင်ဖို့အတွက် နိုင်ငံခြားကို လွှဲအပ်မှာမဟုတ်ကြောင်း ကိုလံဘီယာသမ္မတ Gustavo Petro က သြဂုတ် ၂၄ ရက်မှာ ပြောကြားခဲ့ပါတယ်။
ကိုလံဘီယာကို ‘လုံးဝငြိမ်းချမ်းရေး’ ဆောင်ကြဉ်းပေးမယ်ဆိုတဲ့ ကတိတွေနဲ့ အခုလမှာ ကျမ်းသစ္စာကျိန်ဆိုခဲ့တဲ့ Petro က သူ့အစိုးရဟာ တိုင်းပြည်ရဲ့ အကျပ်အတည်းကနေ လွတ်မြောက်ရေး ညှိနှိုင်းလိုတဲ့ လက်နက်ကိုင်အဖွဲ့အစည်း အမျိုးမျိုးနဲ့ အဆက်အသွယ်ရှိကြောင်း ပြောကြားခဲ့ပါတယ်။
ရာဇဝတ်မှုတွေအတွက် အစွမ်းထက် အဟန့်အတားတခုအဖြစ် ဝါရှင်တန်က ယူဆထားတဲ့ တရားခံလွှဲပြောင်းရေးရဲ့ ထိရောက်မှုကို လက်ဝဲဝါဒီ Petro က ကျယ်ကျယ်ပြန့်ပြန့် မေးခွန်းထုတ်ခဲ့ပါတယ်။
သူ့အစိုးရဟာ မူးယစ်ဆေးဝါး ရောင်းဝယ်ဖောက်ကားမှုဆိုင်ရာ အချက်အလက်တွေကို ပံ့ပိုးပေးပြီး လက်နက်ချတဲ့ ရာဇဝတ်ဂိုဏ်းဝင်တွေကို ပြစ်ဒဏ်လျှော့ပေါ့ပေးတဲ့ ဥပဒေအကျိုးခံစားခွင့်တွေ ကမ်းလှမ်းထားပါတယ်။
“ပြည်နယ်အစိုးရနဲ့ မညှိနှိုင်းတဲ့ မူးယစ်ဆေးဝါး မှောင်ခိုသမားတွေကို ပြည်ပကို လွှဲအပ်မှာဖြစ်ပြီး ညှိနှိုင်းပြီးတော့မှ ပြန်ကျူးလွန်သူတွေကိုတော့ ဘာညှိနှိုင်းမှုမှ မလုပ်တော့ဘဲ အမေရိကန်ပြည်ထောင်စုကို လွှဲပေးလိုက်မှာဖြစ်ကြောင်း” အလည်အပတ်ရောက်ရှိနေတဲ့ စပိန်သမ္မတ Pedro Sanchez နဲ့ တွေ့ဆုံအပြီးမှာ Petro က သတင်းထောက်တွေကို ပြောကြားခဲ့ပါတယ်။
တွေ့ဆုံမှုအတွင်း Sanchez က သူ့နိုင်ငံဟာ FARC သဘောတူညီချက်ကို အကောင်အထည်ဖော်ဖို့ ကိုလံဘီယာရဲ့ ကြိုးပမ်းမှုတွေကို ဆက်လက်ထောက်ခံပြီး တက်ကြွသော အမျိုးသားလွတ်မြောက်ရေးတပ်မတော် (ELN) သူပုန်တွေနဲ့ ငြိမ်းချမ်းရေး ဆွေးနွေးပွဲတွေ ပြန်လည်စတင်မှာဖြစ်ကြောင်း ပြောကြားခဲ့ပါတယ်။
စပိန်ဟာ ELN ဆွေးနွေးပွဲကျင်းပမယ့်နေရာ ဖြစ်လာနိုင်ကြောင်း ဆန်းချက်ဇ်က ပြောကြားခဲ့ပါတယ်။
ဘယ်နေရာမှာလုပ်မယ်ဆိုတဲ့ ဆုံးဖြတ်ချက်မှန်သမျှကို သူပုန်တွေနဲ့ ပူးပေါင်းဆောင်ရွက်ရမယ်လို့ Petro က ပြောကြားခဲ့ပါတယ်။
ကိုလံဘီယာနိုင်ငံရဲ့ M-19 ပြောက်ကျားအဖွဲ့ဝင် သူပုန်ဟောင်း ဂတ်စ်တာဗို ပေထရိုဟာ ကိုလံဘီယာရဲ့ ပထမဆုံး လက်ဝဲယိမ်းသမ္မတ ဖြစ်လာပါတယ်။
မညီမျှမှုနဲ့ ရာသီဥတုပြောင်းလဲမှု တိုက်ဖျက်ရေးမှာ ညီညွတ်ကြဖို့၊ လက်ဝဲယိမ်းသူပုန်တွေ၊ ရာဇဝတ်ဂိုဏ်းတွေနဲ့ ငြိမ်းချမ်းရေး အရယူမယ်လို့ သူက ကတိပြုလိုက်ပါတယ်။
သမ္မတဟာ တနင်္ဂနွေ မွန်းလွဲပိုင်းမှာ ဘိုကိုတာမြို့တော် ဘိုလီဗာ ပလာဗာမှာ အထက်လွှတ်တော်ဥက္ကဋ္ဌ ရိုင်ဘာရဲရက်စ်ရဲ့ ရှေ့မှောက်မှာ ကျမ်းသစ္စာ ကျိန်ဆိုခဲ့တာပါ။
ဒီပွဲကို စပိန်ဘုရင် ဆဋ္ဌမမြောက် ဖိလစ်၊ လက်တင်အမေရိကသမ္မတ ၉ ဦးထက်မနည်းနဲ့ သမ္မတကိုယ်တိုင် ဖိတ်ကြားထားတဲ့ တခြား ကိုလံဘီယာနိုင်ငံသားတွေ အပါအဝင် ဧည့်သည် အယောက်တသိန်းလောက် တက်ရောက် ကြည့်ရှုခဲ့ကြပါတယ်။
“ကျနော် လူ့အဖွဲ့အစည်း ၂ ရပ်၊ နိုင်ငံ ၂ နိုင်ငံကို မလိုချင်ဘူး။ ကျနော်က အားကောင်းခိုင်မာပြီး ညီညွတ်တဲ့ ကိုလံဘီယာနိုင်ငံ တနိုင်ငံတည်းကို လိုချင်တယ်” လို့ ကျမ်းသစ္စာကျိန်ဆိုပွဲ မိန့်ခွန်းမှာ သမ္မတက ပြောပါတယ်။
လက်နက်ကိုင်အုပ်စုတွေဟာ ငြိမ်းချမ်းရေး သဘောတူညီချက် အပေးအယူတွေကို လက်ခံသင့်တယ်လို့လည်း ပေထရိုက ပြောပါတယ်။
သူ့ရဲ့ ထိပ်တန်းဦးစားပေးက လူဦးရေ တဝက်နီးပါး ဆင်းရဲမွဲတေနေပြီး လူဦးရေ သန်းငါးဆယ် ရှိတဲ့ နိုင်ငံအတွင်း ဆာလောင်မွတ်သိပ်မှု တိုက်ဖျက်ရေးပဲလို့ အသက် ၆၂ နှစ်အရွယ် ပေထရိုက ပြောပါတယ်။
အခမဲ့ ပြည်သူ့တက္ကသိုလ် ပညာရေးနဲ့ ကျန်းမာရေးစောင့်ရှောက်မှု အပြောင်းအလဲတွေကိုလည်း ပေထရိုက ကတိပြုခဲ့ပါတယ်။ အငြိမ်းစားအခွင့်အရေး ပြုပြင်ပြောင်းလဲရေးကိုလည်း သူက ကတိပြုပါတယ်။
ဒုသမ္မတ ဖရန်စီယာ မားကက်ဇ်ကတော့ သဘာဝပတ်ဝန်းကျင်ဆိုင်ရာ တက်ကြွလှုပ်ရှားသူနဲ့ အိမ်ရှင်မဖြစ်ပြီး ကိုလံဘီယာမှာ ပထမဆုံး အာဖရိက-ကိုလံဘီယာ ကပြား ဒုသမ္မတ အမျိုးသမီး ဖြစ်လာပါတယ်။
ထောင်နဲ့ချီတဲ့ ထောက်ခံသူတွေဟာ ဘိုကိုတာမြို့တော်နဲ့ နိုင်ငံတလွှား အများဆိုင်နေရာတွေမှာ အောင်ပွဲခံနေခဲ့ပါတယ်။
