ဒီအပတ်အတွင်း မတ်လ ၁၁ ရက်နေ့အထိ ကမ္ဘာ့စီးပွားရေးကတော့ နိုင်ငံတိုင်းလိုလိုမှာ ကုန်ဈေးနှုန်းကြီးမှု၊ ငွေကြေးဖောင်းပွမှု သတင်းတွေက လွှမ်းမိုးနေပါတယ်။

ရေနံ၊ သတ္တု၊ အရာအားလုံး ဈေးမြင့်တက်နေပြီး မတ် ၁၃ ရက်က ရေနံတစည်ကို ၁၃၉ ဒေါ်လာထိ စံချိန်တင် အမြင့်ဆုံးတက်ခဲ့ကာ နိုင်ငံအများစုရဲ့ အထွေတွေကုန်ဈေးနှုန်းတွေကို ရိုက်ခတ်ခဲ့ပါတယ်။

ရုရှားရဲ့ တင်ပို့မှုကို ဒဏ်ခတ်ဖို့ရှိတာကြောင့် နီကယ်ဈေးနှုန်းက ၁ တန်ကို ဒေါ်လာ ၁ သိန်းအထိ တက်သွားပါတယ်။ နှစ်စဉ် ငွေကြေးဖောင်းပွမှုနှုန်း ၂ ဒသမ ၅ ရာခိုင်နှုန်း လျာထားတဲ့ အမေရိကန်နိုင်ငံမှာ ငွေကြေးဖောင်းပွမှု ၇ ဒသမ ၉ ရာခိုင်နှုန်းထိ မြင့်တက်နေပြီး နှစ်ပေါင်း ၄၀ အတွင်း စံချိန်တင် မြင့်တက်နေတာပါ။

စားသုံးသူတွေအနေနဲ့ မရပ်တမ်း တက်နေတဲ့ အိမ်ငှားခ၊ အစားအစာနဲ့ ဓာတ်ဆီဈေးတွေကို ညည်းညူနေပါတယ်။ 

အမေရိကန်လွှတ်တော်က ပြည်ထောင်စုအစိုးရကို ဒေါ်လာ ၁ ဒသမ ၅ ထရီလီယံ ရန်ပုံငွေပေးဖို့ မတ် ၁၀ ရက်က အတည်ပြုခဲ့ပါတယ်။

အဲဒီအထဲမှာ ယူကရိန်းကို အရေးပေါ်  ဒေါ်လာ ၁၃ ဒသမ ၆ ဘီလီယံ ကူညီဖို့လည်း ပါဝင်ပါတယ်။ လွှတ်တော်က အစိုးရဘတ်ဂျက်ပိတ်ပင်မှု ဖြစ်ရပ်ကို ရှောင်ရှားဖို့ ပါတီကြီးနှစ်ခုက လပေါင်းများစွာ ဆွေးနွေးညှိနှိုင်းနိုင်ခဲ့ပါတယ်။

Amazon အွန်လိုင်းအရောင်းကုမ္ပဏီကြီးကတော့ မတ် ၁၀ ရက်က ရှယ်ယာ ၅ ရာခိုင်နှုန်း တက်သွားပါတယ်။ ကုမ္ပဏီက အသေးစားရင်းနှီးမြှုပ်နှံမှုကို ပိုမိုဆွဲဆောင်ဖို့ ဈေးချိုတဲ့ စတော့ ၂၀ လောက်ကို ထပ်ခွဲထုတ်ပေးမယ်လို့ ကြေညာပါတယ်။

မြန်မာကျပ်ငွေနဲ့  လဲလှယ်ရာမှာ တရုတ်ငွေယွမ်စျေး မြင့်တက်နေပြီး မြန်မာကျပ်ငွေစျေးကျနေတာကြောင့် တရုတ်-မြန်မာ နယ်စပ်မြို့ဖြစ်တဲ့ ​မူဆယ်မြို့မှာ ကုန်ပစ္စည်းဈေးနှုန်းတွေဟာ တရုတ်ငွေစျေးအတိုင်း ထပ်မံမြင့်တက်နေပါတယ်။

“တရုတ်ငွေစျေးက အရမ်းတက်နေပြီ ၊ အရင်က ၁၀၀၀ ဝယ်ရတဲ့ ပစ္စည်းက ၁၅၀၀ ဖြစ်နေပြီ၊ ၆၀၀၀ တန်က ၁၂၀၀၀ အထိပေးနေရပြီ၊  ကုန်စျေးနှုန်းတွေတက်တယ်”လို့ ဒေသခံတစ်ဦးက ပြောပါတယ်။

တရုတ်ငွေစျေးတက်တာကြောင့် တရုတ်​ငွေကို အဓိကထားသုံးတဲ့ မူဆယ်မြို့မှာ တရုတ်ငွေစျေးအတိုင်းကုန်ပစ္စည်းတွေကို ပေးဝယ်နေရတယ်လို့ ကုန်သည်တွေက ဆိုပါတယ်။

မူဆယ်က ကုန်ပစ္စည်းဆိုင်ပိုင်ရှင်တစ်ဦးက “တရုတ်စျေးတက်တော့ ပစ္စည်းတွေလည်း စျေးတင်ရောင်းရတယ်။ ပစ္စည်းပြန်ဝယ်ရင်လည်း တရုတ်စျေးအတိုင်းပေးဝယ်ရတယ်။ အဲ့တော့ အောင်းနေတဲ့သိုထားတဲ့ ပစ္စည်းတွေကစ စျေးတင်ရောင်းရတယ်။ စျေးကျတော့လည်း ကျတဲ့စျေးနဲ့ရောင်းရတာပဲ”လို့  ဆိုပါတယ်။

တရုတ်ငွေစျေးတွေက ၂၀၂၁ ခုနှစ် မေလကစပြီး ယွမ် ၁၀၀  ကို  ကျပ် ၂၄၀၀၀ ကျပ်အထိ တက်ခဲ့တာဖြစ်ပြီး စက်တင်ဘာလ ၅ ရက် မှာတော့ ယွမ် ၁၀၀ ကို မြန်မာငွေ ကျပ်  ၂၉၀၀၀ အထိ ဈေးပေါက်နေ ပါတယ်။

ငွေလဲလှယ်ပေးသူတစ်ဦးက “ခုချိန်က တရုတ်ငွေလဲသူတွေတော့ ပိုရတာပေါ့။ မြန်မာငွေကနေ တရုတ်ငွေ လဲတဲ့သူကျတော့ ရှုံးပြီ၊ အရင်က ယွမ် ၁၀၀ ကို မြန်မာငွေ ကျပ်  ၂၀၀၀၀  ပဲရှိတာ ၊ ခုက ၂၉၀၀၀ ထိဆိုတော့ မြန်မာငွေကနေ တရုတ်ငွေလာလဲတဲ့သူ နည်းသွားတယ်”လို့  ဆိုပါတယ်။

မူဆယ်မြို့မှာ စက်တင်ဘာလ ၅ ရက် အထိ တရုတ်ငွေလဲလှယ်နှုန်းက ယွမ် ၁၀၀ ကို မြန်မာငွေ ကျပ် ၂၉၀၀၀ အထိရှိနေပြီး မူဆယ်မြို့နာရီစင်အနီးမှာ ငွေလဲလှယ်နှုန်းက ကျပ် ၂၉၀၀၀ ရှိနေပေမဲ့ တရုတ်မြန်မာနယ်စပ်ဂိတ် နန်းတော်ပေါက်အနီးမှာတော့ ယွမ် ၁၀၀ကို  မြန်မာငွေ ကျပ် ၂၈၇၀၀ ထိရှိတယ်လို့ သိရပါတယ်။