၂၀၁၂ ခုနှစ်က ပရီးမီးယားလိဂ်နောက်ဆုံးပွဲစဉ်မှာ မန်စီးတီးအသင်း ချန်ပီယံဖြစ်ဖို့အတွက် ကျူပီအာအသင်းက ကူညီပေးခဲ့တယ်လို့ မန်ယူတိုက်စစ်မှူးဟောင်း ရွန်နီက ပြောပါတယ်။
မန်စီးတီးဟာ အဲဒီအချိန်က ချန်ပီယံဆုအတွက် မန်ယူအသင်းနဲ့အပြိုင် နောက်ဆုံးအချိန်အထိ အကြိတ်အနယ်ကစားခဲ့ရတာပါ။ ကျူပီအာနဲ့နောက်ဆုံးလိဂ်ပွဲစဉ်မှာ နာကျင်အချိန်ပိုရောက်မှ ဂျက်ကို နဲ့ အဂွဲရိုးတို့က ချေပဂိုးနဲ့ အနိုင်ဂိုးတွေသွင်းယူနိုင်ခဲ့ကြတာပါ။
အဲဒီပွဲအနိုင်ရလဒ်ကြောင့် မန်ယူအသင်းနဲ့အမှတ်တူပေမယ့် ဂိုးကွာခြားချက်အသာနဲ့ မန်စီးတီးအသင်း ချန်ပီယံဖြစ်ခဲ့တာပါ။
ကျူပီအာနဲ့ပွဲစဉ်မှာ တိုက်စစ်မှူး အဂွဲရိုးသွင်းယူခဲ့တဲ့ အနိုင်ဂိုးအပါအဝင် သွင်းဂိုးအများစုမှာ ဂိုးသမား ပက်ဒီကမ်နီအနေနဲ့ ပိုကောင်းတဲ့ကာကွယ်မှုလုပ်နိုင်ခဲ့သင့်ကြောင်း ဝိန်းရွန်နီက ပြောပါတယ်။
“စီးတီးက ဒုတိယဂိုးရသွားတော့ ကျူပီအာအသင်းက သူတို့ကိုပြန်လည်ကူညီပေးတာက တခါမှ မေးခွန်းထုတ်ခံရခြင်းမရှိခဲ့ပါဘူး။ ကျနော်ကတော့ ထူးဆန်းတဲ့အချက်ကို တွေ့ခဲ့တယ်။ ပွဲလည်း ပြီးဆုံးသွားတော့ ကျူပီအာ ကစားသမား ဆစ်ဆေးဟာ စီးတီးကစားသမားတွေနဲ့အတူ အောင်ပွဲခံခဲ့တယ်။ ဂိုးသမား ပက်ဒီကမ်နီအနေနဲ့လည်း ပိုကောင်းတဲ့ ကာကွယ်မှုတွေ လုပ်ဆောင်ခဲ့သင့်ပါတယ်” လို့ ဝိန်းရွန်နီက ပြောပါတယ်။
ဒါပေမဲ့ ပွဲပြီးခါနီးမှာသွင်းယူခဲ့တဲ့ ဂိုးကတော့ ပရီးမီးယားလိဂ်သမိုင်းမှာ စိတ်လှုပ်ရှားစရာ အကောင်းဆုံး အခိုက်အတန့်ဖြစ်တယ်လို့ ဝိန်းရွန်နီက မှတ်ချက်ပေးခဲ့ပါတယ်။
မန်စီးတီးအသင်းကို ပထမဆုံးပရီးမီးယာလိဂ်ချန်ပီယံဖြစ်စေခဲ့တဲ့ ကျူပီအာနဲ့ပွဲကအနိုင်ဂိုးက ကစားသမားဘဝတစ်လျှောက် အမှတ်တရအရှိဆုံးဂိုးဖြစ်တယ်လို့ အဂွဲရိုးကပြောပါတယ်။
အဂွဲရိုးဟာ ဘာစီလိုနာ အိမ်ကွင်း နူးကမ့်ကွင်းထဲက စင်မြင့်ပေါ်မှာ နှလုံးပြဿနာကြောင့် ကစားသမားဘဝကနေ အနားယူကြောင်း ကြေညာပြီးနောက် ကစားသမားဘဝအမှတ်တရအဖြစ်ဆုံး ဂိုးအကြောင်းကို ထည့်သွင်းပြောသွားခဲ့တာပါ။
အသက် ၁၆ နှစ်အရွယ်က ရေးဆင်းဘက်ကို သွင်းခဲ့တဲ့ ဂိုးအပါအဝင် ဖူဟမ်နဲ့ ယူရိုပါလိဂ်ဗိုလ်လုပွဲမှာ အက်သလက်တီကိုအတွက် သွင်းခဲ့တဲ့ဂိုးတွေထက် မန်စီးတီးကို ချန်ပီယံဖြစ်စေခဲတဲ့ ကျူပီအာနဲ့ပွဲက အနိုင်ဂိုးက အကောင်းဆုံးအခိုက်အတန့်ဖြစ်တယ်လို့ အဂွဲရိုးက ပြောပါတယ်။
“ကျူပီအာနဲ့ပွဲတုန်းက ဂိုးကို ဘာလို့ ရွေးချယ်ရသလဲဆိုရင် ကျနော့်အတွက် ပထမဆုံး ပရီးမီးယားလိဂ်ချန်ပီယံဆုဖြစ်သလို စီးတီးအတွက်လည်း ပထမဆုံးချန်ပီယံဖြစ်ခဲ့တာတွေကြောင့် ပါ” လို့ အဂွဲရိုးကပြောပါတယ်။
၂၀၁၂ ခုနှစ် မေလ ၁၃ ရက်က ကစားခဲ့တဲ့အဲဒီပွဲစဉ်မှာ မန်စီးတီးက ၉၁ မိနစ်အထိ ၂ ဂိုး ၁ ဂိုး နဲ့ ရှုံးနိမ့်နေပေမယ့် ၉၂ မိနစ်မှာ ဒီဇီကို၊ ၉၄ မိနစ်မှာ အဂွဲရိုးက အနိုင်ဂိုးသွင်းပြီး မန်ယူထက် ဂိုးကွာခြားချက်အသာနဲ့ ချန်ပီယံဆုဖလားရယူသွားခဲ့တာဖြစ်ပါတယ်။
