ဇူလိုင် ၃၀ ရက်က ယှဉ်ပြိုင်ကစားခဲ့ကြတဲ့ လီဗာပူးလ်အသင်းနဲ့ မန်ချက်စတာစီးတီးပွဲစဉ်မှာ လီဗာပူးလ်က ၃-၁ ဂိုးနဲ့ အနိုင်ရသွားပြီး ကွန်မြူနတီဒိုင်းချန်ပီယံဆုကို ရရှိသွားပါတယ်။
လီဗာပူးလ်အသင်းဘက်က ပွဲချိန် ၂၁ မိနစ်မှာ အာနိုး၊ ပွဲချိန် ၈၃ မိနစ်ဆာလာ ၊ ပွဲချိန် မိနစ် ၉၀ မှာ ဆာလာက သွင်းယူခဲ့တာပါ။
မန်စီးတီးအသင်းဘက်ကတော့ ပွဲချိန် မိနစ် ၇၀ မှာအယ်လ်ဗာရက်ဇ်က ချေပဂိုး ၁ ဂိုးပြန်သွင်းယူခဲ့ပါတယ်။
လီဗာပူးလ်အသင်းဟာ ကွန်မြူနတီဒိုင်း ချန်ပီယံဆုကို ၂၀၀၆ ခုနှစ်နောက်ပိုင်း ပထမဆုံးအကြိမ် ဗိုလ်စွဲခဲ့ခြင်းဖြစ်ပြီး ပြိုင်ပွဲသမိုင်းတစ်လျှောက် ချန်ပီယံဆုကို (၁၆) ကြိမ်မြောက်ရယူခဲ့ခြင်းဖြစ်ကာ အာဆင်နယ်အသင်းရဲ့ ဒုတိယအအောင်မြင်ဆုံး မှတ်တမ်းကိုလိုက်မီခဲ့ပါတယ်။
ဒါ့ပြင်လီဗာပူးလ်အသင်းနည်းပြ ယာဂန်ကလော့ပ်ဟာ လီဗာပူးလ်နည်းပြဘဝမှာ ပရီးမီးယားလိဂ်၊ ချန်ပီယံလိဂ်၊ FA ဖလား၊ လိဂ်ဖလား၊ ဥရောပစူပါဖလားနဲ့ ကလပ်ကမ္ဘာ့ဖလားနဲ့ ကွန်မြူနတီဒိုင်းတို့ကိုရယူနိုင်တဲ့ ပထမဆုံးနည်းပြဖြစ်လာခဲ့ပါတယ်။
လက်စတာနဲ့ ကွန်မြူနတီဒိုင်း ဗိုလ်လုပွဲစဉ်မှာ ၂၅ မိနစ်လောက် လူစားဝင်ကစားသွားခဲ့တဲ့ ဂရေးလစ်ရှ်ရဲ့ ခြေစွမ်းအပေါ် နည်းပြ ဂွါဒီယိုလာက ကာကွယ်ပြောသွားပါတယ်။
မန်စီးတီးအသင်းဟာ လက်စတာအသင်းကို ၁ ဂိုး ဂိုးမရှိနဲ့ ရှုံးနိမ့်ခဲ့ပြီး စံချိန်တင် ပေါင်သန်း ၁၀၀ တန် ဂျက်ဂရေးလစ်ရှ်ကို လူစားဝင်ကစားစေခဲ့ပေမယ့်လည်း ၁ ဂိုး ဂိုးမရှိ ရလဒ်ကို ပြောင်းလဲနိုင်ခြင်း မရှိခဲ့တာပါ။
ပွဲအပြီး သတင်းစာရှင်းလင်းပွဲမှာတော့ ဂရေးလစ်ရှ်က ၂၅ မိနစ်စာအတွက် ဝယ်ယူထားတာ မဟုတ်ဘဲ ၅ နှစ်၊ ၆ နှစ်လောက်အထိအတွက် ဝယ်ယူထားတာဖြစ်ပြီး မကြာခင် အကောင်းဆုံးခြေစွမ်းရရှိမှာဖြစ်ကြောင်း နည်းပြ ဂွါဒီယိုလာက ပြောပါတယ်။
“ကျနော်တို့ သူ့ကို ကူညီပေးဖို့လိုပြီး သူ့ရဲ့စွမ်းဆောင်ရည်ကို ပြသခွင့်ပြုရမှာပါ။ သူ လာခဲ့တာ ၂၅ မိနစ်စာအတွက် မဟုတ်ပါဘူး။ ၅ နှစ်၊ ၆ နှစ်စာအတွက် ဖြစ်ပါတယ်။ သူ့ရဲ့ခြေစွမ်း ကောင်းမွန်ခဲ့ပါတယ်။ ပြိုင်ဘက်ခံစစ်တန်းကို နိုင်လိုစိတ်အပြည့်နဲ့ ထိုးဖောက်ဝင်ရောက်ပြီး သူ့ခြေထဲမှာ ဘောလုံးရှိတိုင်း ကစာသမား ၃ ယောက်က ဝိုင်းရံထားတာပါ။ တဆင့်ပြီးတဆင့်နဲ့ အကောင်းဆုံးခြေစွမ်းရလာပါလိမ့်မယ်” လို့ နည်းပြ ဂွါဒီယိုလာက ပြောပါတယ်။
