တနင်္သာရီမြို့နယ်အတွင်း စစ်ကောင်စီနဲ့ ဒေသခံ ပြည်သူ့ကာကွယ်ရေးပူးပေါင်းတပ်ဖွဲ့တို့ တိုက်ပွဲဖြစ်ပွားနေတဲ့အတွက် စစ်ရေးအခြေအနေအရ ပြည်သူတွေ ခရီးသွားလာခြင်းမပြုဖို့ တနင်္သာရီမြို့နယ်ပြည်သူ့ကာကွယ်ရေးအဖွဲ့က ဇန်နဝါရီ ၂၅ ရက်မှာ သတိပေးထားပါတယ်။
ပြည်သူ့ကာကွယ်ရေးတပ်ဖွဲ့ဝင်တဦးက “အခုလက်ရှိမှာ တိုက်ပွဲတွေကတော့ စစ်ကောင်စီဘက်ကပစ်တဲ့ လက်နက်ကြီးတွေကြောင့် ပြည်သူတွေ ထိခိုက်သွားတာရှိတယ်။ စစ်ကောင်စီက လက်နက်ကြီးတွေ ရမ်းသန်းပစ်တာတွေကြောင့်၊ နောက်ပြီး တိုက်ပွဲပြင်းထန်လာမှာမို့လို့ ပြည်သူတွေ စစ်ရေးသတိရှိဖို့ ပြောချင်ပါတယ်” လို့ ပြောပါတယ်။
စစ်ကောင်စီယာဉ်တန်းတွေအနီးကပ်သွားတာမလုပ်ဖို့၊ မော်တော်ယာဉ်တွေ တံခါးမှန်ဖွင့် မောင်းနှင်ကြဖို့၊ မော်တော်ယာဉ်ကို အမိုးအကာ (တာလပတ်) အပြည့်ဖုံးအုပ်မထားဖို့၊ တော်လှန်ရေးအဖွဲ့ လုံခြုံရေးအရ စစ်ဆေးတဲ့အခါ ကြည်ဖြူစွာ ပူးပေါင်းပါဝင် ဆောင်ရွက်ပေးကြဖို့နဲ့ ည ၇ နာရီမှ မနက် ၅ နာရီအတွင်း ခရီးသွားခြင်း မပြုဖို့ ထုတ်ပြန်ချက်မှာ ဖော်ပြထားပါတယ်။
တနင်္သာရီမြို့နယ်မှာ ဇန်နဝါရီ ၂၃ ရက်က စစ်ကောင်စီရဲ့ အမြောက်တပ် ၃၀၆ တပ်ရင်းကို ဒေသခံ ပြည်သူ့ကာကွယ်ရေးပူးပေါင်းတပ်တွေက ဝင်ရောက်တိုက်ခိုက်ခဲ့ပြီး ဇန်နဝါရီ ၂၄ ရက်နေ့မှာ တနင်္သာရီတံတား စစ်ဆေးရေးဂိတ်၊ တနင်္သာရီ စရဖရုံး၊ လ.ဝ.က ဦးစီးအရာရှိနေအဆောင်၊ ဗောဓိကမ်းတံတားနေရာတွေကို ဒေသခံ ပြည်သူ့ကာကွယ်ရေးပူးပေါင်းတပ်တွေက ဒရုန်းနဲ့ ဗုံးကြဲတိုက်ခိုက်ခဲ့ပါတယ်။
ကိုဗစ်-၁၉ ရောဂါကူးစက်မှုကြောင့် ထိုင်း၊ ဟောင်ကောင်နဲ့ နယူးဇီလန်နိုင်ငံတွေဆီ ခရီးသွားလာမှုတွေ ရှောင်ကြဉ်ကြဖို့ အမေရိကန်နိုင်ငံရောဂါထိန်းချုပ်ကာကွယ်ရေးဌာန (စီဒီစီ) က နိုင်ငံသားတွေကို သတိပေးထားပါတယ်။
အမေရိကန်နိုင်ငံ ရောဂါထိန်းချုပ်ကာကွယ်ရေးဌာန (စီဒီစီ) က အဆိုပါ နိုင်ငံ ၃ ခုကို ရောဂါ ကူးစက်နိုင်ခြေ “အလွန်မြင့်” အဆင့် ၄ သတ်မှတ်ထားတာဖြစ်ပြီး လက်ရှိအချိန်ထိ ခရီးသွားလာမှု ရှောင်ကြဉ်ကြရမယ့် နိုင်ငံနဲ့ ဒေသစုစုပေါင်း ၁၃၅ ခုလောက် ရှိနေတာ ဖြစ်ပါတယ်။
ဒါ့အပြင် ရောဂါကူးစက်နိုင်ခြေ “မြင့်” အဆင့် ၃ ထဲမှာ တခြားနေရာ ၃၅ ခုကို ထပ်မံထည့် သွင်းလိုက်ပြီး ကိုဗစ်-၁၉ ကာကွယ်ဆေးထိုးနှံခြင်း မပြုရသေးတဲ့ အမေရိကန်နိုင်ငံသား တွေအနေနဲ့ ရှောင်ကြဉ်ကြဖို့ အသိပေးထားပါတယ်။
“တကယ်လို့များ ထိုင်းနိုင်ငံကို သွားရမယ်ဆိုရင် ခရီးမသွားခင် ကိုဗစ်-၁၉ ကာကွယ်ဆေး အချိန်မီ ထိုးနှံပြီးစီးတာ သေချာပါစေ။ အချိန်နဲ့တပြေးညီ ကာကွယ်ဆေးထိုးနှံပြီးတာတောင် ရောဂါပျံ့နှံ့ ကူးစက်ခံရနိုင်ခြေ ရှိနေနိုင်ဆဲ ဖြစ်ပါတယ်။”
ထိုင်းပြည်သူ့ကျန်းမာရေးဝန်ကြီးဌာနကတော့ ပြီးခဲ့တဲ့ ၂၄ နာရီအတွင်း နိုင်ငံတဝန်း ရောဂါ ကူးစက်ခံရသူ ၁၈,၉၄၃ ယောက်နဲ့ သေဆုံးသူ ၆၉ ယောက် ရှိခဲ့တယ်လို့ ထုတ်ပြန်ထားပါတယ်။
ဟောင်ကောင်မှာတော့ ကိုဗစ်-၁၉ ရောဂါကူးစက်မှုအသစ် ၂၅,၁၅၀ ယောက်နဲ့ သေဆုံးသူ အယောက် ၂၈၀ ရှိခဲ့တယ်လို့ ဆိုပါတယ်။ ပြီးခဲ့တဲ့ ၂၀၂၁ ခုနှစ်အတွင်း ဟောင်ကောင်မှာ ရောဂါထိန်းချုပ်နိုင်ခဲ့ပေမယ့် လက်ရှိမှာတော့ ကူးစက်ခံရသူပေါင်း ၅ သိန်းဝန်းကျင်ရှိလာ နေခဲ့တာပါ။ မြို့ကြီးအများစုမှာတော့ ပြီးခဲ့တဲ့ သီတင်း ၂ ပတ်အတွင်း ရောဂါကူးစက်ခံရပြီး သေဆုံးသူ ၂,၂၀၀ ထက်မနည်း ရှိခဲ့တယ်လို့ ဆိုပါတယ်။
ပြီးခဲ့တဲ့ မတ် ၆ ရက်မှာတော့ ဟောင်ကောင်မှာ ကိုဗစ်-၁၉ ကြောင့် သေဆုံးမှု အများဆုံးအဖြစ် စံချိန်တင်ခဲ့ပြီးတဲ့နောက် အမေရိကန်နိုင်ငံ ရောဂါထိန်းချုပ်ကာကွယ်ရေးဌာန (စီဒီစီ) က ပြီးခဲ့တဲ့ သီတင်းပတ်တုန်းက ရောဂါကူးစက်နိုင်ခြေ “မြင့်” အဆင့် ၃ တိုးမြှင့် သတ်မှတ်ခဲ့တာ ဖြစ်ပါတယ်။
