ဂရိနိုင်ငံမှာ ဖေဖော်ဝါရီ ၂၈ ရက် ညက ရထားနှစ်စင်း တိုက်မိပြီး လူ ၂၆ ယောက် သေဆုံးကာ အနည်းဆုံး ၈၅ ယောက် ဒဏ်ရာရရှိခဲ့တယ်လို့ မီးသတ်တပ်ဖွဲ့ ပြောရေးဆိုခွင့်ရှိသူ ဗက်ဆီလီစ် ဗာသကို ဂီယန်နစ်စ်က ပြောပါတယ်။

အေသင်မြို့ကနေ မြောက်ဘက် ထက်စာလိုနီကီမြို့ကို သွားနေတဲ့ ခရီးသည်တင်ရထားနဲ့ ထက်စာလိုနီကီမြို့ကနေ လာရစ်ဆာမြို့ကို သွားနေတဲ့ ကုန်တင်ရထားတစင်းတို့ဟာ နိုင်ငံအလယ်ပိုင်းရှိ လာရစ်ဆာမြို့ အပြင်ဘက်မှာ တိုက်မိခဲ့တာဖြစ်ကြောင်း ထက်ဆာလီဒေသရဲ့ အုပ်ချုပ်ရေးမှူး ကွန်စတန်တီနိုစ် အာဂိုရာစတိုစ်က SKAI TV ကို ပြောပါတယ်။

ပထမဆုံး ရထားတွဲ ၄ တွဲ လမ်းချော်သွားပြီး ရှေ့ပိုင်း ၂ တွဲဟာ လုံးဝနီးပါး ပျက်စီးသွားတယ်လို့ ဆိုပါတယ်။

ဒဏ်ရာရထားတဲ့ ခရီးသည် အယောက် ၄၀ လောက်ကို ဆေးရုံပို့ဆောင်ခဲ့ပြီး ခရီးသည် ၂၅၀ လောက်ကို ထက်စာလိုနီကီမြို့ကိုသွားဖို့ ဘတ်စ်ကားတွေပေါ်ကို ဘေးကင်းလုံခြုံစွာ ရွှေ့ပြောင်းပေးခဲ့ကြောင်း အာဂိုရာစတိုစ်က ပြောပါတယ်။

တိုက်မိရတဲ့ အခြေအနေတွေကို ရှင်းရှင်းလင်းလင်း မသိရသေးပါဘူး။ ဗုဒ္ဓဟူးနေ့အစောပိုင်းမှာ ကယ်ဆယ်ရေးသမားတွေဟာ အသက်ရှင်ကျန်ရစ်သူတွေကို ရှာဖွေနေဆဲဖြစ်ပါတယ်။

ရထားပေါ်မှာ ခရီးသည် ၃၅၀ လောက် လိုက်ပါလာတယ်လို့ ဒေသတွင်း မီဒီယာတွေမှာ ဖော်ပြထားပါတယ်။

ယူကရိန်းနိုင်ငံအရှေ့ပိုင်းက ချာပလင်မြို့ကို ရုရှားက ဒုံးကျည်နဲ့တိုက်ခိုက်မှုအပြီး ခရီးသည်တင်ရထားတစီး မီးလောင်ခဲ့လို့ ဩဂုတ် ၂၄ ရက်က လူ ၂၂ ယောက်ထက်မနည်း သေဆုံးပြီး ဒါဇင်ချီ ဒဏ်ရာရခဲ့တယ်လို့ အရာရှိတွေက ပြောပါတယ်။

ရုရှားအစိုးရလွှမ်းမိုးတဲ့ ဆိုဗီယက်ပြည်ထောင်စုကနေ ယူကရိန်းက လွတ်လပ်ရေးရပြီး ၃၁ နှစ်ပြည့် နှစ်ပတ်လည်နေ့ ကျင်းပနေချိန်မှာ ခုလို တိုက်ခိုက်ခဲ့တာပါ။

မြို့ခံတွေဟာ ပျက်စီးသွားတဲ့ အိမ်တွေရဲ့ အပျက်အစီးတွေကြားမှာ ချစ်ခင်သူတွေအတွက် ဝမ်းနည်း ပူဆွေးခဲ့ကြပါတယ်။

“ဘာသံဆို ဘာမှမကြားရဘဲ ပေါက်ကွဲသံတခုပဲ၊ မီးတွေ ပေါက်ကွဲမှုတွေနဲ့ စလိုက်တာ” လို့ ဒေသခံ တာတီယာနာက ရိုက်တာသတင်းဌာနကို ပြောပါတယ်။

သမ္မတ ဗိုလိုဒီမာ ဇလန်းစကီးရဲ့လက်ထောက် ကယ်ရယ်လို တီမိုရှန်ကိုက ရုရှားတပ်တွေဟာ ချာပလင်မြို့ကို ၂ ကြိမ် တိုက်ခိုက်ခဲ့တယ်လို့ ပြောပါတယ်။

ပထမတိုက်ခိုက်မှုအတွင်း ဒုံးကျည်က သူ့အိမ်ကိုထိမှန်လို့ ယောက်ျားလေးတယောက် သေဆုံးခဲ့တာပါ။ ဒုတိယဒုံးကျည်က ရထားဘူတာရုံကို ထိမှန်ပြီး ရထားတွဲငါးတွဲ မီးလောင်ခဲ့လို့ လူ ၂၁ ယောက် သေဆုံးခဲ့တယ်လို့ တီမိုရှန်ကိုက ကြေညာချက်ထဲမှာ ပြောပါတယ်။

လွတ်လပ်ရေးနေ့မှာ ရုရှားက ကျူးကျော်တိုက်ခိုက်မယ့်ဘေးကို ဩဂုတ် ၂၃ ရက်တည်းက သမ္မတက သတိပေးခဲ့ပြီးပါပြီ။

ဒါဟာ ရုရှားတပ်တွေ ယူကရိန်းကို ကျူးကျော်တဲ့ ၆ လပြည့်အတွက် ဖြစ်နိုင်ချေလည်း ဖြစ်ပါတယ်။

ဒီပဋိပက္ခဟာ ဒုတိယကမ္ဘာစစ်အပြီး ဥရောပအတွက် အဆိုးရွားဆုံး ပဋိပက္ခလည်း ဖြစ်လာပါတယ်။