ထိုင်းမြောက်ပိုင်း၊ ချင်းမိုင်ခရိုင်ထဲမှာ ပြီးခဲ့တဲ့ စနေနေ့ ညနေပိုင်းက မိုးသက်လေပြင်းကျပြီး မိုးသီးတွေပါကြွေတဲ့အတွက် လူနေအိမ်ခြေပေါင်း ၆၀၀ ကျော်ထိခိုက်ပျက်စီးခဲ့တယ်လို့ ချင်းမိုင်ခရိုင် သဘာဝဘေးအန္တရာယ်ကာကွယ်ရေးနဲ့ ကယ် ဆယ်ရေးဌာနက ထုတ်ပြန်ပါတယ်။ 

အဆိုပါအိမ်ခြေပေါင်း ၆၀၀ ကျော်ဟာ ချင်းမိုင်၊ မဲ့လိမ်း၊ ဆန်ကမ်ဖိုင်းနဲ့ ဆန်ဆိုင်းမြို့နယ် ၄ ခုထဲမှာပါဝင်ပြီး လေပြင်းတိုက်လို့ နေအိမ်၊ အဆောက်အဦ၊ ကားရုံတွေ ခေါင်မိုးလွှင့်ထွက်တာ ၊ မိုးသီးတွေကြွေကျပြီး ခေါင်မိုး အပေါက်တွေဖြစ်ကုန်တာဖြစ်တယ်လို့ ဆိုပါတယ်။ 

ဒါ့အပြင် သက်တမ်းရင့်သစ်ပင်ကြီးတွေ၊  ဓာတ်မီးတိုင်တွေ၊ ဆိုင်းဘုတ်တွေ ပြိုလဲပျက်စီးပြီး နေအိမ်နဲ့ မော်တော်ကား၊ ဆိုင်ကယ်တွေပေါ် ကျိုးကျပျက်စီးခဲ့ရကြောင်း၊ သစ်ပင်နဲ့ ဓာတ်မီးတိုင်တွေ လမ်းပေါ်လဲ ကျတာကြောင့် လမ်းပိတ်ပြီးယာဉ်ကြောပိတ်တာ၊ ရပ်ကွက်အတော်များများ လျှပ်စစ်မီးပြတ်တောက် တာတွေ ဖြစ်ခဲ့တယ်လို့ ဆိုပါတယ်။ 

လေပြင်းနဲ့မိုးသီးဒဏ် အဆိုးရွားဆုံးခံရတဲ့နေရာမှာ ချင်းမိုင်မြို့ ဒွိုင်ဆုထိပ်တောင်ပေါ်ရှိ  ဒွိုင်ဆုထိပ်ရပ်ကွက်မှာ နေအိမ် ၂၂၂ လုံး  ၊ ဖူးဖိင်းရပ်ကွက်မှာ နေအိမ် ၅၇ လုံး ၊ ဒွိုင်ပွီမှာ နေအိမ် ၃၀၀ လို့ဆိုပါတယ်၊ အချို့နေအိမ်တွေမှာ‌ ခေါင်မိုးတစ်ခုလုံးမိုးသီးတွေနဲ့ပြည့်သွားခဲ့ပါတယ်။ 

ချင်းမိုင်မြို့ ဖားဟမ့်ရပ်ကွက် ထိပ်ပန်းယားဆေးရုံရှေ့ မီးပွိုင့်မှာ ဓာတ်မီးတိုင်တွေ ရုတ်တရက်ကျိုးကျလာတဲ့အတွက် မီးနီမှာရပ်စောင့်နေတဲ့ ကား ၃ စီးခန့်ပျက်စီးခဲ့ပြီး အနီးနား ကားဝပ်ရှော့ဆိုင်မှာရပ်ထားတဲ့ကားပေါ်တော့ သစ်ပင်ကြီးတွေကျိုးကျလို့ ပျက်စီးခဲ့ပါတယ်။  

မဲ့လိမ်းမြို့နယ်မှာဆိုရင် ဟွေ့ဆိုင်း ၊ ခိလိတ် ၊ ဆလောင်း ၊ လိမ်းနေ၊ မဲ့ လဲမ်း ၊ လိမ်းတိုက်၊ ဆန်ပုံ စတဲ့ရပ်ကွက်တွေမှာလည်းကောင်း၊ ဆန်ဆိုင်းမြို့နယ်မှာ ဆန်ဆိုင်းနွဲ့၊ မဲ့ဖက်မိုင်၊ ဖန်ဖနစ်၊ နောင်ဟန်စတဲ့ရပ်ကွက်မှာလည်းကောင်း မိုးသက်လေပြင်းနဲ့မိုးသီးတွေကြွေကျခဲ့ကာ ဆန်ကမ်ဖိုင်းမြို့နယ် ဝပ်ဆန်နေကျောင်းတိုက်က သက်တမ်းရင့်သစ်ပင်ကြီး ၂ ပင် ကျောင်းတိုက် အုတ်တံတိုင်းနဲ့ ကားရုံပေါ် လဲပြိုကျလို့ တံတိုင်းနဲ့ ကားရုံထဲက ကား ၃ စီးပျက်စီးခဲ့ပါတယ်။ 

ဖူးဖိင်းရပ်ကွက်နေပြည်သူတယောက်က ဂေါက်သီးလုံးလောက်ရှိတဲ့ မိုးသီးတွေကို ကိုင်ပြပြီး သူ့အသက် ၄၀ ကျော်အတွင်း ဒီလောက်ကြီးတဲ့မိုးသီးတွေကို အခုပထမဆုံးမြင်ရတာလို့ လူမှုကွန်ရက်မှာ လိုက်ဖ်လွှင့်ရင်း ပြောပြပါတယ်။ 

မတ်လ ၁၈ ရက်နေ့မှာလည်း ချင်းမိုင်ခရိုင်မှာ မိုးထပ်ရွာပြီး လေပြင်းတိုက်တာနဲ့ မိုးသီးကျွေတဲ့သတင်းတွေတော့ မတွေ့သေးပါဘူး။ 

ထိုင်းနိုင်ငံ မိုးဇလဌာနထုတ်ပြန်ချက်အရ မတ်လ ၁၉ ရက်မှ ၂၂ ရက်အတွင်း ထိုင်းမြောက်ပိုင်း၊ အရှေ့မြောက်ပိုင်း၊ အလယ်ပိုင်း ( ဘန်ကောက်အနီးတဝိုက်အပါအဝင် ) ၊ နဲ့ အရှေ့ပိုင်းဒေသတွေမှာ မိုးသက်လေပြင်းကျတာ၊ မိုးသီးကျွေတာ၊ မိုးကြိုးပစ်၊ လျှပ်စီးလျှပ်တာတွေ ဖြစ်ပေါ်နိုင်သေးတယ်လို့ ခန့်မှန်းပါတယ်။ 

ကိုးကား - https://www.chiangmainews.co.th/topstories/2909195/

ထိုင်းနိုင်ငံ၊ ချင်းမိုင်ခရိုင်၊ ဆန်ဆိုင်းမြို့ထဲမှာ မြန်မာပြည်၊ မြဝတီဘက်မှာ အလုပ်သွားလုပ်ဖို့ မိန်းကလေးတွေကို လေ့ကျင့်ပေးနေတဲ့ တရားမဝင် Call Center တခုကို ထိုင်းအာဏာပိုင်တွေက ဝင်ရောက်စီးနင်း  ဖမ်းဆီးလိုက်ပါတယ်။ 

ဆန်ဆိုင်းမြို့ လူကုံထံတွေနေတဲ့ အိမ်ရာတစ်ခုထဲမှာ Call Center ဖွင့်ပြီး လိမ်လည်နေတဲ့ ဂိုဏ်းရှိကြောင်း ထိုင်းရဲတပ်ဖွဲ့က စုံစမ်းသိရှိရတဲ့အတွက် နည်းပညာဆိုင်ရာကျွမ်းကျင်တဲ့ တာဝန်ရှိသူတွေ၊ လ.ဝ.က ရဲ၊ နယ်မြေရဲနဲ့ အုပ်ချုပ်ရေးတာဝန်ရှိသူတွေ ပူးပေါင်းပါဝင်တဲ့ အင်အား ၃၀ ကျော်အဖွဲ့က ဇွန် ၈ ရက်မှာ သွားရောက်စစ် ဆေးဖမ်းဆီးခဲ့ပါတယ်။ 

သတင်းရထားတဲ့ တရုတ်နိုင်ငံသားတယောက်ငှားထားတဲ့ တိုက်အိမ်ရဲ့ ဒုတိယထပ်ကို တက်သွားရာမှာတော့ ကွန်ပျူတာတွေရှေ့မှာ ကိုယ်စီအလုပ်လုပ်နေကြတဲ့ ထိုင်းနိုင်ငံသား ၅ ယောက်နဲ့ တရုတ်နိုင်ငံသား ၂ ယောက်ကို တွေ့ရှိခဲ့ပါတယ်။ 

သူတို့တွေဟာ အွန်လိုင်းပေါ်ကနေ ကိုဗစ်-၁၉ ကာလ အလုပ်ပြုတ်သူတွေများလာတဲ့အပေါ် အခွင့် ကောင်းယူပြီး လစာကောင်းတဲ့ အလုပ်ခေါ်စာကို လိမ်လည်ကြော်ငြာတာ၊ ချစ်သူရည်းစား အယောင်ဆောင်ကာ ငွေလိမ်ယူတာ၊ တဘက်သား ယုံကြည်အောင်နည်း အမျိုးမျိုးနဲ့ လိမ်လည်ကာ ငွေချူတာတွေ လုပ်ခဲ့တယ်လို့ဆိုပါတယ်။

ဖမ်းဆီးခံရတဲ့ မိန်းကလေးတွေကတော့ လစာကောင်းလို့ ဒီအလုပ်ကိုလျှောက်ခဲ့ကြောင်း၊ ဥပဒေချိုးဖောက်တဲ့ အလုပ်မှန်းတော့ မသိဘူးလို့ မိမိကိုယ်ကို ကာကွယ်ပြောဆိုပါတယ်။

အဲဒီနေရာဟာ Call Center ပြောတတ်၊ ဆိုတတ်၊ ဆက်သွယ်တတ်အောင်လေ့ကျင့်ပေး တဲ့နေရာသာဖြစ်ပြီး လုပ်ငန်းကျွမ်းကျင်ပါက မြန်မာပြည်ဘက်ခြမ်း မြဝတီမြို့မှာ အလုပ်သွားလုပ်ရကြောင်း၊ လုံခြုံရေးအတွက်လည်း ၁၀၀ ရာခိုင်နှုန်းအာမခံတယ်လို့ပြောကြောင်း ဖမ်းဆီးခံရသူတွေကပြောပါတယ်။

မြဝတီမှာ ပြီးခဲ့တဲ့ဧပြီလက  Call Center မှာအလုပ်လုပ်ရမယ်လို့ပြောပြီး လိုက်သွားတဲ့ ထိုင်းမိန်းကလေးတချို့ ကာစီနိုလောင်းကစားရုံထဲရောက်သွားပြီး ပြည်တန်ဆာအဖြစ်ခိုင်း စေခံရလို့ ထွက်ပြေးလွတ်မြောက်လာခဲ့ပါတယ်။

ပြန်လွတ်လာသူတွေပြောပြချက်အရ ကာစီနိုလောင်းကစားရုံထဲမှာ ပြည့်တန်ဆာအဖြစ် အဓမ္မစေခိုင်းခံနေရတဲ့ ထိုင်းအမျိုးသမီး ၃၀၀ လောက်ရှိနေတယ်လို့ ဆိုပါတယ်။ 

ကိုးကား- ChaingMaiNews