ပြီးခဲ့တဲ့ တလတာကာလအတွင်း အိန္ဒိယမှာ ကိုရိုနာဗိုင်းရပ်စ်ကူးစက်မှု အဆ ၃၀ ကျော် မြင့်တက်လာခဲ့ပေမဲ့ ဇန်နဝါရီ ၁၄ ရက်မှာတော့ ဂင်္ဂါမြစ်ကမ်းတွေပေါ်မှာ ဟိန္ဒူဘာသာဝင်များစွာ ဟာ ရိုးရာအစဉ်အလာအတိုင်း သန့်ရှင်းသောမြစ်ရေနဲ့ ရေချိုးပွဲတော်ကို ဆင်နွှဲခဲ့ကြပါတယ်။

ဘုရားဖူးတွေဟာ ဥတာပရာဒက်ရှ်ပြည်နယ် မြောက်ပိုင်းက မြစ်ကမ်းပါးတွေမှာ စုပြုံနေပြီး နှာခေါင်းစည်း ဝတ်ထားသူလည်း အလွန်နည်းပါတယ်။ 

သူတို့က အရှေ့ဘန်ဂေါပြည်နယ်ကို ဖြတ်စီးဆင်းလာတဲ့ ရေထဲမှာ ခေါင်းနှစ် ရေချိုးကြတာပါ။ အဲဒီပြည်နယ်ဟာ အိန္ဒိယမှာ ကိုရိုနာဗိုင်းရပ်စ်ကူးစက်မှု အမြင့်ဆုံးပြည်နယ်ပါ။

ကူးစက်မြန်တဲ့ အိုမီခရွန်ကြောင့် အိန္ဒိယမှာ ကိုရိုနာဗိုင်းရပ်စ်ပျံနှံ့မှု လတ်တလော မြင့်မားနေပြီး သောကြာနေ့ တရက်အတွင်း လူ ၂၆၄,၂၀၂ ဦး ကူးစက်ခဲ့ပါတယ်။ စုစုပေါင်း ကူးစက်ခံရသူ ၃၆ ဒသမ ၅၈ သန်း ရှိပါပြီ။

ဆရာဝန်တွေက ရေချိုးပွဲတော်ဟာ ဗိုင်းရပ်စ် စူပါဖြန့်ချိမှု ဖြစ်လာနိုင်တာကြောင့် ယခုနှစ် ရေချိုးပွဲတော် မကျင်းပဖို့  အနောက်ဘန်ဂေါပြည်နယ် တရားရုံးကို တောင်းဆိုခဲ့ပေမဲ့ မအောင်မြင်ခဲ့ပါဘူး။

အိန္ဒိယနိုင်ငံ ဂင်္ဂါမြစ်တလျှောက်မှာ ကိုဗစ်-၁၉ ကပ်ရောဂါ ကူးစက်ခံသေဆုံးသူတွေလို့ သံသယရှိတဲ့ အလောင်းတွေကို တွေ့ရတဲ့အတွက် ကူးစက်ရောဂါကပ်ဘေးအတွက် ဆရာဝန်တွေက စိုးရိမ်ကြောင်းပြောခဲ့လို့ ရွာသားတွေ အတော်များများကလည်း  စိုးရိမ်နေကြပါတယ်။

ဥတ်တျာ ပရာဒေ့ရှ်ပြည်နယ် ဂါဇီပူခရိုင်က ဂါမာရွာမှာ မြစ်တလျှောက် အလောင်း ၁၀၀ လောက်ကို မှတ်တမ်းတင်နိုင်ခဲ့တာပါ။

အလောင်းတချို့ မြစ်ကမ်းပါးမှာ ကျန်နေတော ၂ရက်လောက် ရှိနေပြီး အနံ့ကြောင့် ဖြစ်စဉ်ကို ရွာသားတွေ သတိထားမိခဲ့ကြတယ်လို့ ရိုက်တာ သတင်းဌာနရဲ့ မိတ်ဖက် အိန္ဒိယ အခြေစိုက် ANI သတင်းဌာနက ဖော်ပြပါတယ်။

အနားက ဘီဟာပြည်နယ်မှာလည်း အလောင်း ၂ ဒါဇင်လောက် ကမ်းပေါ် လာတင်နေခဲ့တယ်လို့ ဆိုပါတယ်။

ညစ်ညမ်းရေကနေတဆင့် ကိုရိုနာဗိုင်းရပ်စ် ပြန့်ပွားနိုင်သလားဆိုတာ ဆေးဘက် ပညာရှင်တချို့က စိုးရိမ်နေကြပါတယ်။

 ဗိုင်းရပ်စ်ဟာ ရေထဲက အလောင်းတွေကနေတဆင့် ဘယ်လို ကူးစက်နိုင်လဲဆိုတဲ့ ကမ္ဘာလုံးဆိုင်ရာ သုတေသန မရှိသေးပေမဲ့ ရေတွေ ညစ်ညမ်းကုန်ပြီ ဆိုတာကိုတော့ ခိုင်ခိုင်မာမာ ယုံကြည်ပြီး ဘယ်လိုမှ သောက်လို့ မဖြစ်တော့တဲ့အပြင် အလောင်းတွေ ပုပ်ပွလာရင် ပိုပြီး အန္တရာယ်ကြီးလာလိမ့်မယ်လို့ ဆရာဝန် ဒေါက်တာ မိုဆင် ဝါလီက ပြောပါတယ်။

 အိန္ဒိယမှာ မတ် ၁၁ ရက် တစ်ရက်တည်းမှာ ကိုရိုနာဗိုင်းရပ်စ်အသစ် ကူးစက်ခံ ၃၃၀,၀၀၀ နီးပါးရှိပြီး ကူးစက်ခံ သေဆုံးသူ အသစ် ၃၈၇၆ ယောက် ရှိခဲ့ပါတယ်။